تاۋەلسىز بولۋ دەگەنىمىز – ۇلى ۇعىم. تاۋەلسىز ەلدىڭ ەڭ باستى تۇعىرى – ول قوعامنىڭ, سول مەملەكەتتەگى جەرگىلىكتى ۇلتتىڭ رۋحى, جىگەرى, قوعامدىق ساناسى.
قازاقستاننىڭ بۇگىنگى تاڭداعى تاۋەلسىزدىگىنىڭ قۇدىرەتتى كۇشى ۇلتتار دوستاستىعى, ەل بىرلىگى جانە ەلباسىمىزدىڭ ساليقالى ساياساتىندا جاتىر.
مەملەكەتىمىز وسىنداي از عانا ۋاقىت ىشىندە كوپتەگەن ءىرى ەكونوميكالىق, ساياسي جانە الەۋمەتتىك جەتىستىكتەرگە قول جەتكىزدى. ەلىمىزدىڭ اياعىنان نىق تۇرۋى, ۇلتتىق قاۋىپسىزدىكتى قامتاماسىز ەتۋى جانە ەكونوميكامىزدىڭ جەدەل قارقىنمەن دامۋى – نەگىزگى ستراتەگيالىق باعىتتاردىڭ جۇزەگە اسىرىلۋىندا.
وسى ورايدا, حالىققا جولداۋىندا قازاقستان پرەزيدەنتى نۇرسۇلتان نازارباەۆ تاۋەلسىز مەملەكەت اتانعانىمىزدىڭ 25 جىلدىعىنا اياق باسقالى تۇرعانىمىزدى ايتا كەلىپ: «بۇل – تاۋەلسىزدىكتى نىعايتۋ جولىنداعى ولشەۋسىز ەڭبەگىمىزدىڭ شيرەك عاسىرلىق بەلەسىن قورىتىندىلايتىن مەرەيلى ءسات. تاۋەلسىزدىكتى باياندى ەتۋ وعان قول جەتكىزۋدەن دە قيىن. مەملەكەتتىگىمىزدىڭ تۇعىرىن مىزعىماستاي نىعايتا ءتۇسۋ ءۇشىن بىزگە ءالى تالاي وتكەلى كۇردەلى, وكپەگى كوپ بۇرالاڭ جولداردان وتۋگە تۋرا كەلەدى» دەپ الداعى كەزەڭدە كەزدەسەتىن سىن-قاتەرلەردەن مۇدىرمەي وتۋگە شاقىردى.
قازىرگى تاڭدا ەلىمىزدىڭ كەز كەلگەن ازاماتى تاۋەلسىزدىكتىڭ قادىرىن جەتە ءتۇسىندى. ەشكىمگە تاۋەلدى بولماۋ, ءوز مەملەكەتىڭ, تۋىڭ, ەلتاڭباڭ بولۋ – ۇلكەن باقىت. ەندىگى ماقساتىمىز – جاس مەملەكەتىمىزدىڭ دامۋىنا ۇلەس قوسۋ. الدىمىزدا ءالى تالاي اسۋلار جاتىر. اسىرەسە, ابىرويىمىزدى الەمگە اسقاقتاتاتىن جاھاندىق ەكسپو كورمەسىنە ۇلكەن دايىندىقپەن كەلۋىمىز كەرەك. ونىڭ جوعارى دەڭگەيدە وتۋىنە ارقايسىسىمىز اتسالىسۋعا ءتيىسپىز.
مەملەكەتىمىزدىڭ بولاشاق ءوركەندەۋى, دامۋى, گۇلدەنۋى, يماندى, ءبىلىمدى, ونىڭ ىشىندە مەملەكەتتىك ءتىلدى جاقسى مەڭگەرگەن, بارلىق حالىقتىڭ ءداستۇرىن قۇرمەتتەيتىن جىگەرلى جاستارعا بايلانىستى. اتا-بابالارىمىزدىڭ ارمانىن اقتاپ, تاۋەلسىزدىگىمىزدى اسقاقتا بەرەيىك, اعايىن!
گ.مولدابەكوۆا,
اسكەري سوتتاردىڭ قىزمەتىن
قامتاماسىز ەتۋ ءبولىمىنىڭ
باس مامانى
