تاۋەلسىزدىك تاريحى سۋرەتشىلەر كوزىمەن
ەلورداداعى تاۋەلسىزدىك سارايىندا وتاندىق جانە شەتەلدىك سۋرەتشىلەر توبىنىڭ «Art Balaban» كورمەسى ۇيىمداستىرىلدى.
– تاقىرىبىنىڭ ەرەك ەستىلەتىنىن بىلەمىز. بالابان دەگەنىمىز – وتە سيرەك كەزدەسەتىن, جىلدام ۇشاتىن, سۇڭقار تارىزدەس قۇس. ءبىز دە ونەر الەمىنە سونى سەرپىن, جاڭا لەپ اكەلگىمىز كەلەدى. ويلاسا كەلە قازاقستانداعى جانە كورشىلەس مەملەكەتتەردەگى قىلقالام شەبەرلەرىنىڭ باسىن قوسىپ, وسىنداي توپ قۇرۋدى شەشتىك, – دەدى استانا قالاسىنىڭ جاس سۋرەتشىلەر بىرلەستىگى توراعاسى ءومىرالى يسمايلوۆ. ءوزى كورمەگە بىرنەشە جۇمىستارىن ۇسىنىپتى. اراسىنداعى «ۇلى دالا ەلى» جانە «بايقوڭىر» اتتى تريپتيحتەرىن ءبىر دەممەن جازىلعان دۇنيە ەكەنىن ايتتى.
كورمەگە نەگىزىنەن ابستراكتسيا, رەاليزم جانرىنداعى كارتينالار قويىلىپتى. قوناقتار, اسىرەسە, تابيعات كورىنىسىن بەينەلەيتىن سۋرەتتەرگە قاتتى قىزىعۋشىلىق تانىتتى.
– قىرعىزستاندىق سۋرەتشى رۋسلانبەك ءجۇنىساليەۆتىڭ كارتينالارىنان اۋىلدىڭ, دالانىڭ, قىر قىزعالداقتارىنىڭ ءيىسى اڭقيدى. وسىدان-اق سۋرەتشىنىڭ شەبەرلىگىن اڭعارۋعا بولادى ەمەس پە؟! – دەپ اعىنان اقتارىلدى قازاق ۇلتتىق اگرارلىق ۋنيۆەرسيتەتىنىڭ وقىتۋشىسى بايان اقايداروۆا.
ەل ەگەمەندىگىنىڭ 25 جىلدىعى مەن «ەكسپو – 2017» كورمەسىنە ورايلاستىرىلعان بۇل شارا الداعى ۋاقىتتا رەسپۋبليكانىڭ وزگە دە وڭىرلەرىندە وتەدى.
بوتاگوز ماراتقىزى