ەكى عاسىر توعىسىندا تاۋەلسىزدىك تاڭى اتتى. ۇلى كوش باستالدى. بۇل – جاڭا بەلەسكە, جاڭا كەزەڭگە ءوتۋ كوشى. بۇگىنگى قازاق ەلى – ابىرويى اسىپ, مەرەيى ۇستەم بولعان, بۇكىل الەم كوز تىگىپ وتىرعان جاس مەملەكەت. دەربەس ەل بولعالى 25 جىل بولدى. وسى ۋاقىت ىشىندە ءبىز تالاي بەلەستەردى باعىندىرىپ, تالاي اسۋلاردى وتكەردىك.
جاس قازاقستان دۇنيەجۇزىلىك ارەنادا ءوز ورنىن تاپتى. تاۋەلسىزدىكتەن ارتىق, ودان قىمبات, ودان كيەلى ۇعىم جوق! وسى ءتاۋ ەتەر جالعىز كيەمىزگە داق تۇسىرمەي, قادىرلەپ ءوتۋ – ءار قازاقستاندىقتىڭ پارىزى.
سارىارقا تورىنە, اق بۇلتتار ەتەگىنە ورناعان الىپ قالا استانانىڭ تاريحى بۇل كۇندە تاۋەلسىزدىگىمىزدىڭ التىن ءارىپتى شەجىرەسىنە اينالدى. قىلاۋ تۇسپەگەن اق قاعازداي جازيرا دالانىڭ بەتىنە ەلباسىنىڭ شاقىرۋىمەن كەلگەن شەتەلدىك جانە قازاق ساۋلەتشىلەرى جاس قالانىڭ نوبايىن سىزدى.
استانا – بىرلىكتىڭ, ىنتىماقتىڭ, بەيبىتشىلىكتىڭ قالاسى. ۇلتارالىق كەلىسىمنىڭ, رۋحانيات پەن عىلىمي ۇدەرىستىڭ, ءتۇرلى قۇرىلتايلار مەن اسسامبلەيالاردىڭ ورتاسى. ول – تاتۋلىق, دوستاستىق سەكىلدى كەلىسىم اتاۋلىنى الاقانىنا سىيدىرعان, جاڭادان بوي كوتەرگەن جاڭا عاسىردىڭ ساۋلەتتى الىپ ورداسى.
العاش ەڭبەك جولىمدى قاراپايىم اۋىل مەكتەبىنەن باستاپ, ارمانىمدى استانامەن ۇشتاستىرۋعا وسى قالاعا كەلدىم. مەنىڭ ەڭبەك جىلدارىم تاۋەلسىزدىك جىلدارىمەن قاتارلاسىپ كەلەدى. وسى جىلدار ىشىندە ءبىلىم بەرۋ سالاسىندا قانشا وزگەرىستەر بولدى. مەنىڭ بالا كەزىمدەگى اعارتۋشىلىق قىزمەت پەن قازىرگى تاڭداعى ءبىلىم بەرۋ سالاسى مۇلدە باسقاشا. بۇگىنگى ۇستاز شاكىرتىنە ءبىلىم بەرىپ قانا قويماي, ونى دۇنيەجۇزىلىك ءبىلىم, اقپارات, ەكونوميكا كەڭىستىگىنە شىعۋعا, باسەكەگە قابىلەتتى ەتىپ تاربيەلەۋى قاجەت.
مەن بولاشاقتا كوز الدىما قازاقستانىمدى ازيادان شىققان الپاۋىت مەملەكەت رەتىندە ەلەستەتەمىن. ەكونوميكامىز قارىشتى دامىعان, سۇڭقار اقىن ساكەن, تۇلپار اقىن ءىلياس سويلەگەن انا ءتىلىمىز سالتانات قۇرعان, تاماشا سالت-ءداستۇرىمىز ساقتالعان, ۇلى يماندى, قىزى يبالى بولىپ وسكەن ەل رەتىندە كورەمىن.
گۇلجازيرا ىسقاقوۆا,
رەسپۋبليكالىق فيزيكا-ماتەماتيكا مەكتەبىنىڭ قازاق ءتىلى مەن ادەبيەتى ءپانىنىڭ مۇعالىمى
