ەل تاۋەلسىزدىگىنىڭ 30 جىلدىعىن مەرەكەلەۋ اياسىندا نۇر-سۇلتان قالاسىنىڭ اكىمدىگى, تىلدەردى دامىتۋ جانە ارحيۆ ءىسى باسقارماسى «مەنىڭ تۋىم!» اتتى پاتريوتتىق شارا وتكىزدى.
شارا قازاقستان رەسپۋبليكاسىنىڭ مەملەكەتتىك تۋىن ناسيحاتتاۋ, ەلوردا تۇرعىندارىنىڭ بويىندا پاتريوتتىق سەزىم قالىپتاستىرۋ ماقساتىندا ۇيىمداستىرىلدى. اكتسيا بارىسىندا جاستار ساياساتى ماسەلەلەرى باسقارماسى «استانا جاستارى» جاستار رەسۋرستىق ورتالىعىنىڭ ەرىكتىلەرى نۇرسۇلتان نازارباەۆ حالىقارالىق اۋەجايىندا, ۆوكزالداردا جانە باسقا دا ورىنداردا ورنالاسقان جولاۋشىلاردى تاسىمالدايتىن كولىك جۇرگىزۋشىلەرىنە 3000 دانا مەملەكەتتىك جالاۋشا تاراتتى.
– شارا تاۋەلسىزدىكتىڭ تورقالى تويى اياسىندا «ءتىل جانە ءرامىز» دەگەن ۇرانمەن ءوتىپ جاتىر. دايىنداعان جالاۋشالاردى ەڭ ءبىرىنشى تاكسي جۇرگىزۋشىلەرىنە ۇلەستىرەمىز. ويتكەنى قالاعا العاش اياق باسقان قوناقتى كۇتىپ الاتىن دا, تۇرعىنداردىڭ ءجيى مىنەتىنى دە وسى كولىكتەر. ال قوعامدىق كولىكتەن ارتىلعان جالاۋشالاردى كوشەدەگى حالىققا تاراتامىز. كەلەر جىلى مەملەكەتتىك رامىزدەرىمىزگە 30 جىل تولادى. سوندىقتان بۇل اكتسيا ءالى دە كەڭ اۋقىمدا جالعاسىن تابادى. تۇرىكتەر قىزىل بايراقتارىن ۇيلەرىنە دە, بالكوندارىنا دا ءىلىپ قويادى. بىزدە شىن پاتريوت ەكەنىمىزدى وسىلاي كورسەتۋىمىز كەرەك. بيىل پرەزيدەنتىمىز مەملەكەتتىك رامىزدەردى قولدانۋ اياسىن كەڭەيتۋ جايلى ارنايى زاڭ قابىلداعان ەدى. سوندىقتان كوك بايراعىمىزدى كوبىرەك كورسەتۋىمىز كەرەك, – دەدى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ.
يگى شارا ورتالىق ساياباقتان باستاۋ الدى. ەرىكتىلەر 30-عا جۋىق «Region» تاكسيلەرىنە كوك جالاۋشالاردى زور سەنىممەن تابىستادى.
– اكتسياعا قاتىسۋعا قۋانا كەلىستىك. ويتكەنى مەملەكەتتىك تۋ – ەلىمىزدىڭ تاريحى جانە ونىڭ بۇگىنى, حالقىمىزدىڭ بىرلىگى مەن تاۋەلسىزدىگىنىڭ نىشانى. سوندىقتان كەز كەلگەن قازاقستاندىق مەملەكەتتىك تۋىمىزدى قۇرمەتتەپ, تورىنەن ورىن بەرۋى ءتيىس. كومپانيا جۇرگىزۋشىلەرى اتالعان شاراعا شىن نيەتىمەن قاتىسۋدا, – دەدى «Region» تاكسي كومپانياسىنىڭ ديرەكتورى سامات قالىمبەتوۆ.
https://youtu.be/JZBDoNc7KLA
