تاۋەلسىزدىك ۇعىمى قاشاننان قاستەرلى. قانداي فورماتسيا, قانداي ەل, قانداي ۇلت بولماسىن, تاۋەلسىزدىكتى ەڭ ءبىرىنشى قاجەتتىلىك دەپ ساناعان. تاۋەلسىزدىك – ول ەڭ الدىمەن ەركىندىك. تاۋەلسىزدىك – ەركىن ويلاۋ, ەركىن سويلەۋ, قوعامدا ءوزىڭدى ەركىن سەزىنۋ. ەركىن سەزىنە وتىرىپ, ەل دامۋىنا ۇلەس قوسۋ. الايدا بۇل جەتىستىككە كەز كەلگەن ەل جەتە بەرمەگەن. تاۋەلسىزدىك باقىتىنا يە بولۋ قازاقتىڭ پەشەنەسىنە جازىلىپتى. بيىل – تاۋەلسىزدىگىمىزگە 30 جىل.
تاۋەلسىز قازاقستاننىڭ تىزگىنىن مىقتاپ ۇستاپ, تۇعىرىن بيىكتەتكەن قازاق ەكەنىمىزدى الەمگە تانىتقان, الپاۋىت ەلدەردى مويىنداتا العان ەلباسىمىز تۋرالى قانداي تەڭەۋ ايتساق تا جاراسىمدى. ەلىمىز تاۋەلسىزدىك جاريالاعان كۇننەن باستاپ, دۇنيەجۇزىلىك قوعامداستىق قۇرامىنا ەنە وتىرىپ, ادام قۇندىلىقتارىن ساقتاۋ, دامىتۋ جونىندە وزىنە مىندەتتەمەلەر العان جاڭا مەملەكەتكە 20 سىن-قاتەر باستى نازاردا بولدى. ەڭ العاشقى مىندەتتەمە 1991 جىلى سەمەي يادرولىق پوليگونىن جابۋ ەدى. قازاقستان بۇكىل ادامزات الدىنداعى ازاماتتىق بورىشىن وتەدى, بۇل تاۋەلسىزدىك تاريحىنداعى العاشقى داۋىرلىك تاريحي شەشىمنىڭ باستاماسى عانا ەدى. العاشقى وتكىر شەشىمدەر وسىلايشا قابىلداندى. الەم جۇرتى تاڭعالدى, تاڭدايىن قاقتى, تاۋەلسىز جاس قازاقستاندى تانۋ پروتسەسى, ءداۋىرى باستالدى. ءدال وسى ناقتى شەشىم سانالى ادامعا جەر بەتىندەگى شەكارامىز شەگەندەلىپ, قارۋلى كۇشتەرىمىز پايدا بولدى. قازاقستان تۋرالى جاعىمدى قوعامدىق پىكىر قالىپتاستىرۋدىڭ العاشقى باسپالداعى وسىلايشا سالىندى. فرانتسيا پرەزيدەنتى فرانسۋا ميتتەران «كەڭەس وداعىنا كىرگەن ەلدەر اراسىندا ەڭ تۇراقتى جانە كوپ ءۇمىت كۇتتىرەتىن مەملەكەتتەردىڭ ءبىرى» دەپ قازاقستان تۋرالى پىكىر ايتىپ, سۇحبات بەردى دەپ 1993 جىلدىڭ 14 قىركۇيەگىندە ەليسەي سارايىنىڭ ءباسپاسوز قىزمەتى اقپارات تاراتتى. سول جىلى ءتول تەڭگەمىزدى الاقانىمىزعا سالىپ, قارجىلىق تاۋەلسىزدىككە قول جەتكىزدىك.
العاشقى اتا زاڭىمىز قابىلداندى, ۋاقىت تالابىنا ساي وعان وزگەرىستەر مەن تولىقتىرۋلار ەنگىزىلىپ كەلەدى. ەل, كوپ ۇلتتى حالىق بولىپ زاڭنىڭ ۇستەمدىگىن مويىنداۋدامىز.
ەلباسىنىڭ جىل سايىنعى حالىققا ارناعان جولداۋلارى بەلگىلى ينستيتۋت بولىپ قالىپتاستى. جولداۋ ارقىلى جىل سايىنعى ەلدىڭ ساياسي, ەكونوميكالىق دامۋى ناقتىلانىپ, مەملەكەتتىڭ ستراتەگيالىق باعىتىن جۇزەگە اسىرۋدىڭ تەتىكتەرى قامتىلدى.
1997 جىلدان باستاۋ العان جولداۋلاردىڭ قاي-قايسىسىن الساڭىز دا ءبارى شەتىنەن ماڭىزدى, تەك قانا وركەندەۋگە ۇمتىلادى. ءمۇدىرىس بولعان ەمەس, وعان ەل كۋا, ۋاقىتپەن قاتارلاسىپ ءجۇرىپ وتىردى. وڭىرلەردى دامىتۋ باعدارلاماسى قابىلدانىپ, سالالىق, وڭىرلىك دامۋ باعىتتارى, تاسىلدەرى ناقتىلاندى. وسى قۇجاتتاردى تالداپ قاراي وتىرىپ, ەلباسىمىز ناعىز تابىستى رەفورماتور دەپ ايتقىم كەلەدى. ەل بىرلىگىن ساقتادى. حالىقتار اسسامبلەياسى قۇرىلدى. قازاقستاندىق ءبىلىمدى جاستار لەگى «بولاشاق» باعدارلاماسىمەن وركەنيەتتى شەت ەلدەردە وقي باستادى.
1997 جىلى قابىلدانعان «قازاقستان-2030» ستراتەگياسى ءوز مىندەت-ماقساتتارىن تولىعىمەن ورىنداپ, ەلدى ءارى قاراي دامىتۋدىڭ «قازاقستان-2050» ستراتەگياسى «ماڭگىلىك ەل» يدەياسى دۇنيەگە كەلدى. ۇلتتىڭ ءوزىن-ءوزى تانۋىنا, بويداعى تۋا بىتكەن ۇلتتىق سانانى مەملەكەتتىك سانامەن ۇشتاستىرۋدىڭ ۋاقىتى كەلىپ جەتتى.
ءار قازاقتىڭ نامىسىن وياتاتىن «رۋحاني جاڭعىرۋ» تاريحقا, داستۇرگە قۇرمەت, بولاشاققا باعىت دۇنيەگە كەلدى. كوكىرەك كوزىمىز اشىلىپ, ۇلتتىق رۋح كوتەرىلدى. اللادان باسقا ەشكىمگە تاۋەلدى ەمەستىگىمىزدى ۇقتىق. ەلباسىنىڭ «100 ناقتى قادامىنا» كەلسەك, بۇل دامىعان ەلدەردىڭ 30-دىعىنا كىرۋگە ارنالعان, بۇكىل قاۋىپ-قاتەردى ەسكەرگەن, قوعام مەن مەملەكەتتى جاقىنداتاتىن جوسپار بولدى. وسى قىرۋار ەڭبەكتىڭ ءبارى – تاۋەلسىزدىكتى نىعايتۋ ءۇشىن جارىپ شىققان ەل قاجەتىن وتەيتىن, حالىق قامىن كوكسەيتىن ناتيجەلى دۇنيەلەر.
استانادا دىندەر كوشباسشىلارىنىڭ سەزىندە ن.نازارباەۆ «لاڭكەستىكتى يسلام دىنىنە تەلۋدىڭ ەشقانداي نەگىزى جوق» دەپ دالەلدى ويىن كەسىپ ايتۋى دا تاۋەلسىزدىككە ارقا سۇيەۋ ەدى. بۇل سول كەزدەگى باتىل ءارى ورىندى وي بولاتىن. سونىمەن قاتار تاۋەلسىزدىك كەزىندە جەتكەن جەتىستىگىمىز بەيبىتشىلىك پەن كەلىسىم ادامزاتتىڭ تاڭداۋى بولىپ كۇن تارتىبىندە كەلە جاتىر. وسىلايشا ەلىمىز ەكونوميكالىق پراگماتيزمگە قول جەتكىزىپ, نازارباەۆ كوشباسشىلىق جولدارى الەمدى مويىنداتتى, ەلىمىز ەقىۇ-عا توراعالىق ەتۋ مۇمكىندىگىنە يە بولدى, تاۋەلسىز قازاقستاننىڭ مارتەبەسى بيىكتەدى.
ديپلومات نۇرلان ونجانوۆتىڭ جازبالارىندا تۇڭعىش پرەزيدەنتىمىز ن.نازارباەۆتىڭ ازەربايجان مەن ارمەنيامەن قانتوگىس كەزىندە تاۋلى قاراباققا بارىپ تاراپتاردى بىتىمگە كەلتىرۋى, كەسىمسوز ايتۋى تاۋەلسىزدىكتىڭ باعاسىن ودان سايىن ەسەلەي ءتۇستى دەپ كورسەتەدى. ال قازاقستاندىق ۇشقىشتاردىڭ 2010 جىلى قىرعىزستان پرەزيدەنتى باكيەۆتى دجالالابادتان الىپ شىعۋىن ساراپشىلار بىتىمگەرلىكتىڭ ەتالونى رەتىندە باعالادى.
«ەڭبەك قوعامىنا قاراي 20 قادام» باعدارلاماسى ادام كاپيتالىنا ارقا سۇيەۋگە نەگىز بولىپ, قوعامداعى ەڭبەك ادامىنىڭ ورنى بەلگىلەندى. ادامدار ىنتالانا باستادى.
«حاققا قىزمەت ەتۋ حالىققا قىزمەت ەتۋدەن باستالادى» دەپ ايتىلعان 149 حيكمەت-ولەڭدەردەن قۇرالعان قوجا احمەت ءياساۋيدىڭ «ديۋاني حيكمەتى» رۋحاني قۇندىلىق بولىپ عاسىرلاردان-عاسىرعا وشپەس مۇرا بولىپ جەتىپ وتىر. وسى شەشىم بارشا جۇرتشىلىققا ادال قىزمەت ەتۋ جولىنداعى تۇركىستاننىڭ وبلىس ورتالىعى بولۋى بىردەن-ءبىر ۇتقىر ۇيعارىم, رۋحاني جاڭعىرۋدىڭ تامىرىنا ناقتى ءنار بەردى. بۇكىل حالىقتىڭ كوڭىلىنەن شىققان ءدال وسى شەشىمى ءۇشىن ەلباسىعا قوجا احمەت ياساۋي ىلىمدەرىندە دارىپتەلەتىن «كەمەل ادام» مارتەبەسىن ابدەن-اق بەرۋگە بولادى. تۇركىستان دەكلاراتسياسى تۇركىستاندى تۇركى تىلدەس ەلدەردىڭ رۋحاني استاناسى مارتەبەسىنە كوتەردى, تۇركىستاندى مويىنداۋعا كۋا بولۋ باقىتى بارشامىزعا بۇيىردى. تاۋەلسىزدىك جىلدارىندا وڭتۇستىك وڭىرىمىزدە عانا قازىرگى تۇركىستان وبلىسىندا 12114 شارشى مەتر ءۇي بەرىلىپ, مەملەكەتتىك بيۋدجەت ەسەبىنەن 606 مەكتەپ, 593 ءىرى دەنساۋلىق سالاسىنىڭ نىسانى سالىنىپتى. مەكتەپكە بالالاردى وقۋمەن قامتۋ 13,5 پايىزدان 98,5 پايىزعا ارتقان.
ەلباسىنىڭ دومنا پەشتەرىندە بولات قورىتىپ شىڭدالعان كەزى, بۇكىل ءومىر جولى, بار بولمىسى – جاستارعا ۇلگى. جاس ۇرپاقتىڭ بويىندا تۇڭعىش پرەزيدەنتكە ەلىكتەۋشىلىك, قىزىعۋشىلىق سەزىمدەرى قالىپتاسىپ, بۇل قاسيەتتەر ەلگە دەگەن سۇيىسپەنشىلىككە جالعاسىپ, ءپاتريوتيزمنىڭ نىعايۋىنا بىردەن-ءبىر ىقپال ەتتى. تاۋەلسىزدىك ۇعىمى تۇڭعىش پرەزيدەنت ەسىمىمەن ۇندەسىپ, ساباقتاستىق, ادىلدىك, ورلەۋ ۇعىمدارىمەن بىتە قايناستى. ۇرپاقتار ساباقتاستىعى ۇعىمى ءوز فۋنكتسياسىن ورىنداۋدا. سەنىم ارتقان تۇلعاعا – ق.توقاەۆقا سەندى.
مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ – بارىمىزگە ورتاق مىندەت» دەپ, ازاماتتىق قوعامنىڭ مۇمكىندىكتەرىن وسى ارناعا قولدانۋ كەرەكتىگىن ناقتىلادى, حالىقپەن كەرى بايلانىس ورناتۋدىڭ ءتيىمدى جولدارىن ايقىندادى. وسىلايشا ساباقتاستىق جولى ءوز جەمىسىن ناقتى تۇردە بەرە باستادى. بۇل دا ەلدىڭ سىرتقى كۇشتەرگە توتەپ بەرە الاتىن تاۋەلسىز ەلىمىزدىڭ تاۋەلسىز ستراتەگياسى ومىرشەڭدىگىنىڭ بەلگىسى.
ەلباسى – تۇڭعىش پرەزيدەنتىمىز, Nur Otan پارتياسى توراعاسىنىڭ باستاۋىمەن Nur Otan پارتياسىن جاڭعىرتۋدىڭ 7 سەرپىنى جۇيەلى تۇردە ورىندالۋدا. سونىڭ ءبىرى – حالىقتى ءدۇر سىلكىندىرگەن پرايمەريز. مەن دە پرايمەريز قاتىسۋشىسىمىن. ساياسي دودادا جەڭىپ, جوعارى رەيتينگپەن تۇركىستان وبلىستىق دەپۋتاتى بولىپ سايلاندىم. جالپىعا بىردەي تەڭ مۇمكىندىك بەرىلدى. زاڭدارعا وزگەرىس ەنگىزىلگەننىڭ ارقاسىندا ايەلدەر كۆوتاسى جاساقتالدى. Nur Otan پارتياسىنىڭ تسەنتريزم ساياساتى ءوزىنىڭ دالدىگىن كورسەتىپ, پارتيا ۇستانىمى جۇرتشىلىق كوڭىلىنەن شىقتى.
بيلىك پەن ازاماتتىق قوعام وكىلدەرىنىڭ اراسىندا دەموكراتيالىق اشىق ديالوگ دامۋدا. تۇرعىندار, تۇپتەپ كەلگەندە, مەملەكەت پەن اراداعى الەۋمەتتىك ماسەلەلەردە دەلدالداردى قاجەت ەتپەيدى. «ءبىز بىرگەمىز» شاراسى حالىق اراسىندا قولداۋ تاۋىپ, ۇلكەن ريزاشىلىق تۋعىزۋى – سونىڭ ءبىر دالەلى. ەلباسى ەلمەن بىرگە بولۋدىڭ, باۋىرمالدىقتىڭ جيىنتىق ۇلگىسىن كورسەتتى. بۇل – ءاربىر سوققان جۇرەك ءلۇپىلىنىڭ, تاۋەلسىز سانانىڭ مەملەكەتشىلدىكپەن ۇندەسۋى, پاتريوتتىق سەزىمنىڭ شىڭدالۋى.
ەلباسى قاشان دا اتا-بابا سالت-ءداستۇرىن ساقتاۋدى الدىڭعى ورىنعا قويعان. بىرلىكتىڭ, اۋىزبىرشىلىكتىڭ تەرەڭ تامىرى عاسىرلاردى ارتقا سالىپ, قانىمىزبەن كەلە جاتقان قازاقيلىعىمىزدا ەكەنىن ءدۇيىم جۇرتقا ايتۋدان ەشقاشان جالىققان ەمەس.
جەتى – كيەلى سان. قازاقتا «جەتى قازىنا» بەرەكە مەن قۇت, باق-داۋلەت دەسە, «جەتى جارعى» ادىلەتتىكتىڭ تۋى – قازاق دالاسىنىڭ زاڭى. بابالارىمىز ىقىلىم زاماننان ادىلەتتىككە سۇيەنىپ, جۇيەلى سوزگە تۇرعان, «جەتى جارعى» زاڭىنىڭ ۇستەمدىگىن مويىنداعان. ەلباسىنىڭ قاي باعدارلامالىق قۇجاتىن الساڭىز دا ءبىر-بىرىمەن ۇشتاسىپ, بايلانىس ۇزىلمەيدى. ءبىرىنشى قۇجاتتاعى ينديكاتورلاردىڭ جالعاسى كەلەسى قۇجاتتا جاۋاپ بولىپ الدىڭىزدان شىعادى. وقىپ وتىرىپ ويدان وي تۋىنداعانىنا كوزىڭىز جەتەدى. جالپى ەلباسى رەفورمالارى ساباقتاس رەت-رەتىمەن جاسالىپ, كەزەڭ-كەزەڭگە ارنالىپ, ابدەن سارالانىپ, ناقتى مەجەلەرگە باعىتتالعان. ەلباسىنىڭ «جالپىعا بىردەي ەڭبەك قوعامىنا قاراي 20 قادامى», «بولاشاققا باعدار «رۋحاني جاڭعىرۋى», «ۇلى دالانىڭ جەتى قىرى» – ءبارى وسى «ەلدىكتىڭ جەتى تۇعىرىنىڭ» تابان تىرەپ كوتەرىلەر باسپالداعى.
ساياسي, الەۋمەتتىك, ەكونوميكالىق تۇرعىدان قاراساڭىز دا استارىندا وتاندى ءسۇيۋ, پاتريوتيزم جاتىر. جالاڭ ۇراندى پاتريوتيزم ەمەس, شىنايىلىق, ەلگە دەگەن سۇيىسپەنشىلىككە شاقىرۋ.
ەلباسى ءاردايىم حالىقتىڭ ويىمەن ساناسىپ, ۋاقىت تالابىنا ۇتىمدى جاۋاپ بەرەدى. سوندىقتان بولار تۇڭعىش پرەزيدەنتىمىز ن.نازارباەۆ 2011 جىلعى جولداۋىندا «حالىقتىڭ ەركى بارىنەن دە جوعارى» دەپ حالىق سوزىنە قۇلاق اساتىنىن ءبىر سويلەممەن-اق جەتكىزىپ, ءتۇيىندى ءسوزدىڭ شۇرىپپەسىن ءدوپ باستى. ەلباسى جولداۋلارىندا قولدانىلعان ەۆوليۋتسيالىق دامۋ تىركەسى قوعام دامۋىنىڭ كريتەريى بولىپ قالا بەرەدى. ەۆوليۋتسيالىق دامۋ بارلىق سالادا رەت-رەتىمەن ورىندالىپ جاتقان بولسا, تەرەڭ تامىرى سالت-داستۇردە, ادەت-عۇرىپتا, قازاقي بولمىستا جاتىر. ۇلتتىق مىنەزبەن تاربيە العان ۇرپاق رۋحى مىقتى وتباسىنىڭ ۇستاحاناسىنداعى جالىنى ۇرىپ تۇرعان كورىگىنەن شىققان وتكىر قارۋ سياقتى. قاي جەردە بولماسىن وتكىرلىگىن كورسەتەدى.
ەلدىك بولمىستىڭ وزەگىن جۇرەگىنىڭ تۇبىندە, ساناسىنىڭ تۇكپىرىندە, كوزىنىڭ وتىندا, تىلىندە ساقتايدى. وسىلايشا نامىستى, رۋحى اسقاق ۇلت قالىپتاساتىنىن كەلەشەكتىڭ كىلتى ءبىلىم مەن ەڭبەكتە, ۇلتتىق مادەنيەتتە ەكەنىن, وزگەلەردى وسىلايشا مويىنداتۋعا بولاتىنىن ەلباسى تايعا تاڭبا باسقانداي ەتىپ ۇرپاققا ۇندەۋ تاستادى. وتباسىن ساقتاۋدا اتا ءداستۇردىڭ ماڭىزدىلىعىنا ۇلكەن ءمان بەردى. بۇگىندە وتباسىن قۇرا سالا اجىراسىپ كەتىپ جاتقان بۋىننىڭ ارەكەتتەرىنە توقتاۋ سالاتىن تەك ۇلتتىق مادەنيەت, ۇلتتىق تاربيە دەدى.
ۇندەۋ, سالماقتى وي تاستاپ, ورتانى قاق جارىپ وي سالدى. اتا-بابا ءداستۇرىن ەسكە سالىپ, وسكەلەڭ ۇرپاقتى ىنتالاندىردى, جىلى لەبىزىمەن ماڭدايىنان سيپاي وتىرىپ شيراتتى.
ءمۇلت كەتكەن جوق. وشپەيتىن قۇندىلىقتارىمىزعا جەتى تۇعىرلاپ بارىپ توقتادى, ءوزىنىڭ ساياسي تاجىريبەسىن, تاۋەلسىز ەل كوشباسشىلىعىنىڭ ناقتى كورىنىسىن كورسەتتى.
نەنى نەگىزگە الۋ كەرەك, نەنى مويىنداۋ كەرەك دەگەندە تاۋەلسىزدىك ەڭ باستى قۇندىلىعىمىز, ءتاۋەلسىزدىكتى ۇرپاقتان-ۇرپاققا شايقالتپاي جەتكىزۋ, ونى نىعايتا ءتۇسۋ ءۇشىن كۇش سالۋ ءبارىمىزدىڭ پارىزىمىز دەگەن نۇكتەلى تۇجىرىم جاسادى. ەلدىكتىڭ ءمان-ماعىناسىن, قاسيەتىن, بارلىق تۇشىمدى جاۋاپتى قاعيداتتىڭ ىشىنەن تاباسىز. تاۋەلسىزدىك ۇعىمى سانانىڭ ويانىپ, رۋحتى كۇشەيۋىنە اسەرىن ۇندەۋدىڭ باس ابزاتسىنان باستاپ سەزىنەسىز. قاعيداتتاعى ءار تۇعىر السىرەپ جاتقان ادام اعزاسىنىڭ جاسۋشالارىنا ءنار بەرىپ وياتادى. «تاۋەلسىزدىكتى نىعايتۋ حالىقتىڭ ءوز قولىندا» دەپ قوعامدىق ساناعا قوزعاۋ سالدى, پاتريوتتىق سەزىمنىڭ شوعىن ۇرلەيدى, پاتريوتتىق يممۋنيتەتتى كوتەرەدى. ەلباسىنىڭ ەلدىك دەگەن ءبىر اۋىز ءسوزى وزگە ۇلتتارعا, ۇلكەن-كىشىگە, كوپكە وي سالدى, بىرلىككە شاقىردى. تاۋەلسىز ەل بولىپ الەمگە تانىلدىق, الەم كارتاسىندا قازاقستان دەگەن مەملەكەت پايدا بولدى, وسى ۋاقىت ىشىندە 9,5 ميلليون ءسابي دۇنيەگە كەلدى. رەسەي مەن قىتاي سياقتى الپاۋىت ەلدەرمەن شەكارالاسپىز, شەكارامىز شەگەندەلگەننىڭ ارقاسىندا الاساپىران سوعىس دەگەننەن امانبىز دەدى.
ەلباسى تاۋەلسىزدىك جەر-بىرلىك, وتباسى, ۇلتتىق مادەنيەت, ءبىلىم مەن ەڭبەك ۇعىمدارىن پراگماتيزم پرينتسيپتەرىنە شەگەلەدى. ەلباسى جۇرتشىلىقتى ۇلتتار بىرلىگىنىڭ يادروسى – «ماڭگىلىك ەل» يدەياسى اياسىندا ادىلەتتى, الەۋمەتتىك, قۋاتتى ەكونوميكالى قوعام دامۋى جولىندا مەملەكەت باسشىسى قاسىم-جومارت توقاەۆتىڭ توڭىرەگىنە شوعىرلاندىرۋعا ەلدىككە شاقىردى. قۇندىلىقتارىمىز بارىمىزگە ورتاق دەگەن ويدى ەلدىك دەگەن ءبىر-اق سوزبەن, ءبىر عانا ۇعىممەن جەتكىزدى. ەلدى وركەندەتۋ ءۇشىن تاۋەلسىزدىگىمىزدى نىعايتىپ, جەرىمىزدى, قازاقي بولمىسىمىزدى, ۇلتتىق مادەنيەتتىڭ مايەگىن ساقتاي وتىرىپ, تەرەڭ بىلىمگە, عىلىمعا بويۇسىنۋ, ونى تىنىمسىز ەڭبەكپەن ۇشتاستىرۋ ۇلتتىڭ وركەنيەتتى بولۋىنا تىكەلەي اسەرىنە توقتالىپ, تۇجىرىمىن ناقتىلىققا, پراگماتيزم پريتسيپتەرىنە شەگەلەپ, تۇيىندەپ بايلادى. «جەتى تۇعىردىڭ» وشپەيتىن شوعى رۋحاني قۇندىلىق ەكەنىنە باسىمدىق بەردى.
وسىلايشا تاۋەلسىزدىكتى نىعايتۋدىڭ جاڭا كەزەڭى باستالدى, وعان باعدار بەرەتىن جول سىلتەۋ كارتاسى «ەلدىكتىڭ جەتى تۇعىرى» دۇنيەگە كەلدى, پاتريوتتىق يممۋنيتەتتى كوتەرۋدىڭ ءادىسى جاريالاندى.
ەلباسىنىڭ «ەلدىكتىڭ جەتى تۇعىرى» – حالىققا جولداعان وي ۇزارتارى, سانانى قوزعايتىن يدەولوگيالىق سيپاتتاعى ماقساتتى جوسپارى.
قالىيما جانتورەەۆا,
Nur Otan پارتياسى تۇركىستان وبلىستىق فيليالى توراعاسىنىڭ ورىنباسارى,
وبلىستىق فيليال ساياسي كەڭەسى بيۋرو مۇشەسى, «قۇرمەت» وردەنىنىڭ يەگەرى, تۇركىستان وبلىسىنىڭ قۇرمەتتى ازاماتى
