ەلوردانىڭ تورىندەگى بۇل الاڭدى «تاۋەلسىزدىك الاڭى», «قازاق ەلىنىڭ باس الاڭى» دەپ اتايدى. الماتى اۋدانىندا ورنالاسقان الاڭ فورماسىنا قاراي تىك تورتبۇرىشقا ۇقسايدى. ول تاۋەلسىزدىك داڭعىلىنىڭ بويىمەن وڭتۇستىك-باتىستان سولتۇستىك-شىعىسقا قاراي سوزىلىپ جاتىر. كولدەنەڭ باعىتتا الاڭنىڭ ءبىر شەتى احمەت بايتۇرسىنۇلى جانە جۇمەكەن ناجىمەدەنۇلى كوشەلەرىمەن قيىلىسىپ جاتىر.
الاڭنىڭ تۋرا ورتاسىندا تاۋەلسىز قازاقستاننىڭ ازاتتىعى مەن گۇلدەنۋىنىڭ سيمۆولى – «قازاق ەلى» مونۋمەنتى تۇر. الاڭنىڭ اينالاسىندا ەلوردانىڭ ەڭسەسىن تىكتەپ تۇرعان ازىرەت سۇلتان مەشىتى, قازاق ۇلتتىق ونەر ۋنيۆەرسيتەتى, بەيبىتشىلىك قابىرعاسى, تاۋەلسىزدىك سارايى, قازاقستان رەسپۋبليكاسىنىڭ ۇلتتىق مۋزەيى, بەيبىتشىلىك جانە كەلىسىم سارايى, پرەزيدەنتتىك پارك ورنالاسقان.
بۇل الاڭ 2009 جىلى «قازاق ەلى» مونۋمەنتىن تۇرعىزۋمەن ءبىر مەزگىلدە پايدا بولدى. مونۋمەنتتىڭ جانىندا بىرنەشە مۇسىندىك بەينەلەر جانە سۋبۇرقاقتار بار. 2015 جىلى قىركۇيەك ايىندا وسى الاڭدا قازاق حاندىعىنىڭ 550 جىلدىعىنا ارنالعان سالتاناتتى شارالار ءوتتى. سول مەرەكەلىك شارالار كەزىندە الاڭ تاريحي اۋىلدىڭ بەينەسىنە وزگەردى.
سونىمەن قاتار, «قازاق ەلى» الاڭىندا وتان قورعاۋشىلار كۇنى جانە كونستيتۋتسيا كۇنىنە وراي اسكەري شەرۋلەر وتكىزىلدى. 2015 جىلى 7 مامىردا وتكەن جەڭىستىڭ 70 جىلدىعىنا ارنالعان اسكەري شەرۋ كەزىندە جەڭىس تۋىنىڭ كوشىرمەسى الاڭنان سالتاناتتى تۇردە كورسەتىلدى. ناۋرىز مەيرامىندا دا بۇل الاڭ مەرەكەلىك ءىس-شارالاردىڭ كورىگى قىزعان جەرگە اينالادى.
2018 جىلى تاۋەلسىزدىك الاڭىنىڭ كورنەكتى تۇسىنان, «قازاق ەلى» مونۋمەنتىنىڭ ىرگەسىنەن بوي كوتەرگەن نىساندى ەلوردانىڭ 20 جىلدىعىنا اقتوبە وبلىسى تارتۋ ەتتى.
ساۋلەتشىلەردىڭ ويىنشا, ءبىرتۇتاس بولىپ بىرىكتىرىلگەن قابىرعا جەر بەتىندەگى حالىقتاردى قورعاپ تۇراتىن جاپىراق ءتارىزدى شاتىردى بەينەلەيدى. ءارى ءداستۇرلى تۇرىك قۇرىلتايىنىڭ بەلگىسىمەن ۇلتتاردى ۇيىستىرىپ, ءبىر شاڭىراقتىڭ استىنا جينايدى. مەتالل مەن تابيعي تاستاردان تۇرعىزىلعان كەشەن ءۇش بولىكتەن تۇرادى. ءبىرىنشى بولىگى – بولشەكتەۋ مەن وقشاۋلاۋدى, ەكىنشىسى – ءۇمىت, ەركىندىك پەن تاۋەلسىزدىكتى, ءۇشىنشىسى بەيبىتشىلىك پەن ۇلتارالىق كەلىسىمدى ساقتاۋعا اپاراتىن جولدى بەينەلەيدى. مونۋمەنتتىڭ جالپى ۇزىندىعى – 111 مەتر, ەنى – 18,4 مەتر, بيىكتىگى – 17,5 مەتر.
