ەلوردادا Pressclub Silteme ءباسپاسوز ورتالىعىنىڭ ۇيىمداستىرۋىمەن «ازىق-تۇلىك قاۋىپسىزدىگى: قازاقستاندىقتارعا قاۋىپ ءتونىپ تۇر» دەگەن تاقىرىپپەن ءباسپاسوز ءماسليحاتى ءوتتى.
بۇل تاقىرىپ بۇگىندە وتە وزەكتى. سەبەبى ددۇ دەرەگى بويىنشا جىل سايىن 600 ميلليونعا جۋىق ادام (بۇل شامامەن الەمدەگى ون ادامنىڭ ءبىرى) 200 ءتۇرلى تاعامنان بولاتىن اۋرۋمەن اۋىرادى. ال جىل سايىن 420 مىڭ ادام دۇرىس تاماقتانباعاننىڭ سالدارىنان كوز جۇمادى. اسىرەسە بالالار كوپ زارداپ شەگۋدە. دۇرىس تاماقتانباعاننىڭ سالدارىنان دەنساۋلىعىنا زيان كەلتىرەتىندەردىڭ 40 پايىزى – 5 جاسقا دەيىنگى بالالار. ونىڭ ىشىندە جىل سايىن 125 مىڭ بالا قايتىس بولادى. قازاقستاندا دا جاعداي الاڭداتارلىقتاي. جيىندا پروفەسسور بالعاباي مايقانوۆ ەلىمىزدەگى تاعام ونىمدەرىنىڭ قاۋىپسىزدىگى ماسەلەسىنە الاڭدايتىنىن ايتتى. قازاقستاندىق عالىمنىڭ پىكىرىنشە, تاعام ونىمدەرىنىڭ ساپاسىنا باقىلاۋدى كۇشەيتۋ قاجەت.
«پراكتيكالىق تۇرعىدان تاعام ونىمدەرىنىڭ ساپاسى مەن قاۋىپسىزدىگىن باقىلاۋ جەتكىلىكسىز دەڭگەيدە. بۇل ماسەلە جىلدان-جىلعا شەشىمىن تاپپاي كەلەدى. ونىڭ بىرنەشە سەبەبى بار. ول – ازىق-تۇلىك قاۋىپسىزدىگىن باقىلاۋعا كوزقاراستىڭ ءارتۇرلى بولۋى, تاماق ونىمدەرىنىڭ قاۋىپسىزدىگىن ساراپتاۋدا باقىلاۋدىڭ السىزدىگى, حالىقارالىق ۇسىنىستاردى بىلمەۋ نەمەسە ەلەمەۋ, codex alimantarius ازىق-تۇلىك ستاندارتتارىنا نەگىزدەلگەن ءتيىستى قىزمەتتەر مەن تاۋەكەلدەردى باعالاماۋ جانە تالداماۋ» دەدى ب.مايقانوۆ.
عالىم رەسپۋبليكالىق ۆەتەرينارلىق زەرتحانانىڭ بارلىق وبلىستىق بولىمدەرىندە تاعام ونىمدەرىندە بوگدە زاتتاردىڭ بولۋ-بولماۋىنا (انتيبيوتيكتەر, گورموندار, راديوبەلسەندى زاتتار, پەستيتسيدتەر, افلاتوكسيندەر جانە ت.ب.) ۇنەمى مونيتورينگ جاساپ, تاعام قاۋىپسىزدىگى زەرتحانالارىن الەمدىك ستاندارتتارعا سايكەس جابدىقتاۋ جانە جاڭعىرتۋ, اگرارلىق جوعارى وقۋ ورىندارىنداعى «ۆەتەرينارلىق سانيتاريا» ماماندىعىنىڭ اتىن «تاعام قاۋىپسىزدىگى» دەپ اۋىستىرۋ قاجەت ەكەنىن العا تارتتى.
جانسايا ابيربەكوۆا,
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 2-كۋرس ستۋدەنتى
