بالالار جاس مولشەرىنە بايلانىستى ءوزىن كۇتىپ تۇرعان قاۋىپ-قاتەر دارەجەسىن ءوز بەتىنشە باعامداي المايدى. سوندىقتان جاسوسپىرىمدەردىڭ قاۋىپتىڭ الدىن الۋعا قاتىستى ءبىلىمىن جەتىلدىرۋ قاجەت. وسى ماقساتتا جاقىندا استانادا «قۇتقارۋشى» سپورت كەشەنىنىڭ اۋماعىندا وقۋشىلار اراسىندا جاس قۇتقارۋشىلاردىڭ قالالىق جارىسى ءوتتى.
استانا قالاسى توتەنشە جاعدايلار دەپارتامەنتىنىڭ ۇيىمداستىرۋىمەن وتكەن سايىسقا ەلوردالىق توتەنشە جاعدايلار دەپارتامەنتىنىڭ باستىعى, گەنەرال-مايور قۋانار بازارباەۆ, «توتەنشە جاعدايلار ورگاندارى ارداگەرلەرىنىڭ قازاقستاندىق ۇيىمى» قوعامدىق بىرلەستىگى ارداگەرلەر كەڭەسىنىڭ توراعاسى, وتستاۆكاداعى گەنەرال-مايور مەيرام ىسقاقوۆ جانە «وركەن» بالالار-جاسوسپىرىمدەر دەنە تاربيەسى ورتالىعىنىڭ ديرەكتورى نۇرلان تياجەنوۆ قاتىسىپ, قۇتتىقتاۋ ءسوز سويلەدى.
جارىستار ءورت-قۇتقارۋ سپورتىنىڭ بارلىق باعىتىن قامتىپ, بىرنەشە كەزەڭنەن تۇردى. اتاپ ايتقاندا, پسيحولوگيالىق تەستىلەۋ «ۆيزيت كارتوچكاسى» كونكۋرسى, كوماندالار اراسىندا ۇزدىك ءانۇران, تۋ, كيىم ۇلگىسى, ءوزىن تانىستىرۋ, «گازەت – جارناما قالقانى» بايقاۋى, العاشقى كومەك كورسەتۋ جانە اۆاريالىق-قۇتقارۋ جۇمىسىن جۇرگىزۋ, تەحنوگەندى اپات ايماعىنداعى قۇتقارۋ جۇمىسى, تابيعي ورتا جاعدايىنداعى ىزدەستىرۋ-قۇتقارۋ جۇمىسى, سۋ اكۆاتورياسىنداعى قۇتقارۋ جۇمىسى, ءورت ءسوندىرۋ ەستافەتاسى ءوتىپ, مۇندا نورماتيۆتەر عانا ەمەس, جاتتىعۋلاردىڭ دۇرىس ورىندالۋى دا ەسكەرىلدى.
تارتىستى دوداعا قاتىسقان 16 كوماندا اراسىندا ا.بايتۇرسىنۇلى اتىنداعى №48 مەكتەپ-ليتسەيىنىڭ جاس قۇتقارۋشىلارى جەڭىس تۇعىرىنان كورىندى. ال جۇلدەلى 2-ورىن №65 مەكتەپ-گيمنازيانىڭ كومانداسىنا بەرىلسە, №8 مەكتەپ-ليتسەيدىڭ جاس قۇتقارۋشىلارى 3-ورىندى يەلەندى. جەڭىمپازدارعا گراموتا, مەدال, كۋبوكپەن قاتار, باعالى سىيلىقتار تابىستالدى.
شىنار ءابيىر,
ل.گۋميلەۆ اتىنداعى
ەۋرازيا ۇلتتىق ۋنيۆەرسيتەتىنىڭ 3-كۋرس ستۋدەنتى
