تسەزار كيۋيدىڭ بالالارعا ارنالعان «ەتىك كيگەن مىسىق» مۋزىكالىق سپەكتاكلىنىڭ پرەمەراسى, كىشكەنتاي كورەرمەندەر ءۇشىن حالىقارالىق بالالاردى قورعاۋ كۇنىنە وراي تاماشا سىي بولدى. شارل پەررونىڭ سيۋجەتى بويىنشا قويىلعان ەرتەگى «استانا وپەرانىڭ» كۇلاش بايسەيىتوۆا اتىنداعى كامەرالىق زال ساحناسىندا ەكى كۇن قاتارىنان ءوتتى.
– «ەتىك كيگەن مىسىق» بالالار وپەراسىنىڭ پرەمەراسى – X مەرەيتويلىق ماۋسىمنىڭ ءسانىن كەلتىرەتىن كەرەمەت وقيعا, – دەدى «استانا وپەرا» ديرەكتورى, قازاقستاننىڭ ەڭبەك سىڭىرگەن قايراتكەرى عالىم احمەدياروۆ. قويىلىمنىڭ رەجيسسەرى رەتىندە Digital Opera جانە «نانو-وپەرا» حالىقارالىق بايقاۋلارىنىڭ لاۋرەاتى ەرەنباق تويكەنوۆ تەر توكتى.
ەرتەگى جەلىسى كوپشىلىككە بالا كەزدەن تانىس: اكەسىنىڭ ولىمىنەن كەيىن اعالارى مۇرانى بولىسكە سالادى, ناتيجەسىندە كەنجە باۋىرلارىنا تەك مىسىق قانا بۇيىرادى. الايدا, بۇل جانۋار ءوزىنىڭ جاڭا يەسىنىڭ ءومىرىن تۇبەگەيلى وزگەرتە الاتىن بولىپ شىقتى. مىسىق ديىرمەنشىنىڭ كىشى ۇلىنىڭ ادال دوسىنا اينالىپ, وعان بايىپ كەتۋگە عانا كومەكتەسپەيدى, سونىمەن قاتار ايداي سۇلۋ حانشايىمعا ۇيلەنۋىنە سەبەپشى بولادى.
– عاسىردان استام ۋاقىت بۇرىن كومپوزيتور تسەزار كيۋي اتاقتى جازۋشى شارل پەررو ەرتەگىسىنىڭ جەلىسىمەن جاساعان «ەتىك كيگەن مىسىق» وپەراسى قازىرگى كەزگە دەيىن وزەكتىلىگىن جوعالتقان جوق. مەنىڭ ويىمشا, ونىڭ باستى يدەياسى اتا-انا دانالىعىنىڭ قۇندى ەكەنى جونىندە. ەرتەگى ەشقاشان ەڭسەنى تۇسىرۋگە بولمايتىنىن, العا قويعان ماقساتتارعا باتىل قادام جاساۋ كەرەكتىگىن ۇيرەتەدى, سوندىقتان بۇل ەرتەگىنى ىنتالاندىرۋشى دەپ اتاۋعا بولادى,– دەپ اڭگىمەلەدى رەجيسسەر.
وپەرا قويىلىمىنىڭ ەڭ ماڭىزدى, اجىراماس ەلەمەنتى – ءان ايتۋ, ول ادام مۇمكىندىگىنىڭ, مول تاجىريبەسىنىڭ باي گامماسىن ەڭ جاقسى رەڭكتەردە جەتكىزەدى.
سپەكتاكلگە جاس بۋىن ەرەكشە ەڭبەك ەتتى. تەاتر باسشىلىعى دا ولارعا بەلسەندى قولداۋ بىلدىرۋدە. ەرەنباق تويكەنوۆپەن قاتار, بالالار وپەراسىنىڭ جۇمىسىنا مۋزىكالىق رەداكتسيا اۆتورى ءاليحان ىدىرىسوۆ, قويۋشى ديريجەر ەلمار بورىباەۆ, بالالار حورىنىڭ جەتەكشىسى التىنعانىم احمەتوۆا, ستسەنوگراف ماليكا تولەگەنوۆا, كوستيۋمدەر بويىنشا سۋرەتشى داريعا تايشىقوۆا جۇمىلا جۇمىس جاسادى.
سوليست رەتىندە جاس ۆوكاليستەر ونەر كورسەتەدى, ولاردىڭ قاتارىندا ASTANA OPERA حالىقارالىق وپەرا اكادەمياسىنىڭ تىڭداۋشىلارى بار. مىسىقتىڭ پارتياسىن رامزات بالاكيشيەۆ پەن ارتۋر گابديەۆ, كىشى ۇلدى (ماركيزدى) تالعات اللابيرينوۆ پەن ءاليحان زەينوللا ورىندايدى. حانشايىمدار – قازاقستاننىڭ ەڭبەك سىڭىرگەن قايراتكەرى جاميليا دجاركيمباەۆا, نازىم ساعىنتاي, ەلەنا گانجا جانە ۇلپان اۋباكىروۆا.
بۇگىندە كورەرمەندەردى تاڭعالدىرۋ بۇرىنعىدان دا قيىن, اسىرەسە بالالاردى– مۇنىڭ بارلىعى زاماناۋي تەحنولوگيالاردىڭ دامۋىمەن, كومپيۋتەرلىك ويىنداردىڭ, اسەرلى انيماتسيالىق فيلمدەردىڭ كوپتىگىمەن بايلانىستى. سوندىقتان بىزدەر, قويۋشىلار, ءاردايىم جاڭا يدەيالاردى ىزدەۋگە تىرىسامىز. تەحنيكالىق شەشىمدەردەن, ارنايى جارىق ەففەكتىلەرى مەن پروەكتورلاردى قولدانۋدان بولەك, ۆيزۋالدىق بولىك بويىنشا شەبەرلەردى تارتامىز, – دەدى ەرەنباق تويكەنوۆ.
گاۋھار امانگەلدى
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى
جۋرناليستيكا فاكۋلتەتىنىڭ 2-كۋرس ستۋدەنتى
