تازا, قاۋىپسىز ءارى جاسىل قالا
استانادا 15 قىركۇيەكتەن 15 قازانعا دەيىن «تازا, قاۋىپسىز, جاسىل قالا» اكتسياسى وتەدى. اكتسيانىڭ باستى مىندەتى – ەلوردا تۇرعىندارى مەن قوناقتارىنىڭ قاۋىپسىزدىگىن قامتاماسىز ەتۋ جانە ەكولوگيالىق ايلىق اياسىندا قالا اۋماعىن تازارتۋ, اباتتاندىرۋ.
ەكولوگيالىق ايلىق اياسىندا 17 ساياباق پەن گۇلباقتاردا جاسىل كوشەتتەردى كۇتۋ بويىنشا ماۋسىمدىق اگروتەحنيكالىق جۇمىستار جۇرگىزىلەدى, گۇلزارلار اباتتاندىرىلادى, رۇقسات ەتىلمەگەن قوقىس ورىندارى مەن لاستانعان ورىندار جويىلادى.
ال 24 قىركۇيەكتە جالپىقالالىق سەنبىلىك وتەدى. بۇل كۇنى استانا اكىمدىگى ەسىل, اقبۇلاق جانە سارىبۇلاق ارنالارىن قوقىستان جانە تۇرمىستىق قالدىقتاردان تازارتۋ ماقساتىندا «تازا وزەندەر» ەكولوگيالىق شاراسىن ۇيىمداستىرادى.
سونىمەن قاتار, قالالىق جانە رەسپۋبليكالىق ۇيىمداردىڭ قاتىسۋىمەن 7000 اعاش وتىرعىزۋ جوسپارلانعان.
اتالعان اكتسيا ەلوردا تۇرعىندارىن قالانى اباتتاندىرۋعا شاقىرادى. ۇساق بۇزاقىلىققا نازار اۋدارۋ ەلوردانىڭ قاۋىپسىزدىگىن ارتتىرارى ءسوزسىز. بۇعان قوسا, بالالار مەن جاسوسپىرىمدەر اراسىندا ۇساق بۇزۋشىلىقتاردىڭ الدىن الۋعا, اپاتتىق جاعدايلاردى بولدىرماۋعا جانە بالالار اراسىندا جاراقات الۋدى ازايتۋعا مۇمكىندىك بەرەدى.
«تازا, قاۋىپسىز, جاسىل قالا» اكتسياسى اياسىندا قازاقستان رەسپۋبليكاسىنىڭ ءىىم ۇلتتىق ۇلان اسكەري قىزمەتكەرلەرىنىڭ جانە استانا قالاسىنىڭ ىشكى ىستەر دەپارتامەنتىنىڭ قىزمەتتەرى مەن بارلىق بولىمشەلەرىنىڭ جەكە قۇرامىنىڭ قاتىسۋىمەن ناشاقورلىقپەن, بالالار جانە جاسوسپىرىمدەر اراسىنداعى قىلمىسپەن كۇرەس, ۋچاسكەلىك ينسپەكتورلاردىڭ, يۋۆەنالدى پوليتسيانىڭ جۇمىسىن كۇشەيتۋ بويىنشا جەدەل الدىن الۋ ءىس-شارالارى وتەدى.