الەمدە 30 ميلليوننان اسا, ال ەلىمىزدە 142 مىڭ ادام بۇل كۇنگە دەيىن عاسىر دەرتىن جۇقتىرىپ ۇلگەردى. ءار ەل ودان قال-قادەرىنشە قورعانۋدا. ساقتانۋدىڭ ءبىر جولى – ۆيرۋستىڭ جۇققان-جۇقپاعانىن ءبىلۋ ارقىلى الداعى كۇنگە قام جاساۋ. وسى ورايدا قر پرەزيدەنتى قاسىم-جومارت توقاەۆ ەلىمىزدە پتر-تەست تاپسىرۋ قۇنىنىڭ كوپ ادام ءۇشىن قىمبات ەكەنىن سىناعان. مىنە, ەندى «ۇلتتىق عىلىمي مەديتسينالىق ورتالىق» اق الەۋمەتتىك از قامتىلعان ازاماتتارعا تەگىن تەست تاپسىرۋ شاراسىن وتكىزۋدە.
شارا اياسىندا COVID-19 ينفەكتسياسى بويىندا بار-جوعىن جىلىنا ءبىر رەت تەگىن تەكسەرتۋگە كىمدەردىڭ مۇمكىندىگى بار؟ ورتالىق ماماندارى بەرگەن مالىمەتتەر بويىنشا, بۇل ساناتتارعا: ۇوس ارداگەرلەرى, باسقا مەملەكەتتەر اۋماعىنداعى اسكەري ۇرىستارعا قاتىسۋشىلار, 1,2-توپتاعى مۇگەدەكتەر, مۇگەدەك بالالارى بار وتباسىلار, جەتىم بالالار جانە كامەلەت جاسقا جەتپەي اتا-اناسىنان ايىرىلعان بالالار 29 جاسقا تولماعان بولسا, جاسىنا قاراي زەينەتكەرلەر, بارلىعى 200 ادام جاتادى.
ەل مەديتسيناسىنىڭ جۇقپالى اۋرۋلاردىڭ تارالۋىمەن كۇرەستە دايىندىق دەڭگەيىن ارتتىرۋ ءۇشىن بۇل يگىلىكتى ىسكە «Samruk-Kazyna Trust» الەۋمەتتىك جوبالاردى دامىتۋ قورى دەمەۋشىلىك ەتۋدە. ولار اتالعان ورتالىقتىڭ زەرتحانالىق كلينيكاسىنا AutoMag-96 قۇرىلعىسىن الۋعا كومەك بەردى. بۇل كلينيكا ەلدە كوروناۆيرۋس ينفەكتسياسى ءورشىپ, كۇنىنە پتر تەست تاپسىرۋ ۇلگىلەرى مىڭعا جەتكەندە سونداي جابدىققا قاتتى ءزارۋ بولعان ەدى. ەندى ورتالىقتا كۆي-گە قاتىستى تالداۋ جاساتقان پاتسيەنتتەر سىناق ناتيجەلەرىن دەر كەزىندە قولدارىنا الاتىن بولادى.
جوعارىدا اتالعان ساناتتارعا جاتاتىن ازاماتتار تەگىن پتر-تەست تاپسىرۋ تۋرالى تولىق اقپارات الۋ ءۇشىن دۇيسەنبى مەن جۇما كۇندەرى ارالىعىندا ساعات 8.00-دەن 17.00-گە دەيىن 8 (7172) 57-76-29 بايلانىس نومىرىنە حابارلاسسا بولادى. ءبىر ەسكەرەتىن جايت, اقىسىز تەست تاپسىراتىندار اتالعان ساناتتارعا جاتاتىندىعىن راستايتىن قۇجاتتارىن كورسەتۋلەرى كەرەك.
بۇعان دەيىن قر دەنساۋلىق ساقتاۋ ءمينيسترى الەكسەي تسوي پتر تەست ارزاندايتىنىن جانە ول قانداي سومادا بولاتىنىن ايتقان ەدى. «قازىرگى كەزدە بولجامدى تۇردە 11 مىڭ تەڭگەدەن 8 900-گە دەيىن تومەندەۋى ءتيىس. بۇل باعىتتا ءتيىستى ەسەپ-قيساپ جۇرگىزىلۋدە. قاجەتتى قادامداردى سالاداعى قاۋىمداستىقتارمەن, «اتامەكەن» ۇكپ-پەن پىسىقتاپ جاتىرمىز» دەگەن ەدى. ەندى كۇنى كەشە عانا باسەكەلەستىكتى قورعاۋ جونىندەگى اگەنتتىگى «INVIVO» جانە «وليمپ» زەرتحانالارىندا پتر-تەستىلەۋ قىزمەتىنىڭ باعاسى 9000 تەڭگەگە دەيىن ارزانداعانىن حابارلادى. ياعني, كلينيكالىق-دياگنوستيكالىق زەرتحانالارمەن انتيمونوپوليالىق كومپلاەنس اكتىسىنە قول قويىلعان, زەرتحانالار باعالاردى ءوز ەركىمەن تومەندەتكەن.
