ءتىسىڭىزدى اقىسىز ەمدەتۋگە قاقىڭىز بار

«امسق» جانە «ءمامس». ءبىرىنشىسى – «الەۋمەتتىك مەديتسينالىق ساقتاندىرۋ قورى» كوممەرتسيالىق ەمەس اكتسيونەرلىك قوعام. ونىڭ قۇرىلعانىنا بيىل 4 جىل بولدى. ال ءمامس, ياعني مىندەتتى الەۋمەتتىك مەديتسينالىق ساقتاندىرۋ – جوعارىدا اتالعان قور ارقىلى جۇزەگە اسىرىلاتىن جۇيە. بۇل جۇيە بيىلدان باستاپ ىسكە قوسىلدى. ياعني, ءسىز جۇمىس ىستەيتىن بولساڭىز, اي سايىن جالاقىڭىزدىڭ 1 پايىزى قاڭتاردان باستاپ ءمامس جۇيەسىنە جارنا رەتىندە بولىنەدى. وسى ارقىلى دەنساۋلىعىڭىزدى ساقتاندىراسىز. جۇمىس ىستەمەيتىندەر وزدەرى قورعا اقشا سالۋى كەرەك. ودان بولەك اقشا سالماسا دا, جۇيەدە ءتۇرلى مەديتسينالىق كومەكتى تەگىن الاتىن ساناتتار بار. سونىڭ ىشىندە ستوماتولوگيالىق كومەكتى اقىسىز الۋ مۇمكىندىكتەرى تۋرالى سۇراقتارعا «امسق» كەاق مەديتسينالىق كومەك ساپاسىن باقىلاۋ دەپارتامەنتىنىڭ ديرەكتورى ءلاززات شومانوۆا جاۋاپ بەردى.– ءمامس جۇيەسى ارقىلى تەگىن ستوماتولوگيالىق كومەككە كىمدەر جۇگىنە الادى؟
– ءبىزدىڭ جۇيەدە جوسپارلى ستوماتولوگيالىق كومەك 18 جاسقا دەيىنگى بالالار مەن جۇكتى ايەلدەرگە كورسەتىلەدى. ال شۇعىل ستوماتولوگيالىق كومەكتى اتالعان ەكى ساناتقا قوسا ۇلى وتان سوعىسىنىڭ ارداگەرلەرى, 1, 2, 3-توپتاعى مۇگەدەكتەر, «التىن القا», «كۇمىس القاسى» بار كوپ بالالى انالار, اتاۋلى الەۋمەتتىك كومەك الۋشىلار, زەينەتكەرلەر, الەۋمەتتىك ءمانى بار اۋرۋلارمەن اۋىراتىندار, مۇگەدەك بالاعا كۇتىم جاسايتىن جۇمىس ىستەمەيتىن ادامدار, بالا كەزىنەن ءبىرىنشى توپتاعى مۇگەدەككە كۇتىم جاسايتىن, جۇمىس ىستەمەيتىن ادامدار الادى. ورتودونت كومەگى جاقسۇيەك-بەت انوماليالارىن جويۋ­عا ارنالعان اپپاراتتى پايدالانا وتىرىپ, جاقسۇيەك-بەت ايماعىنىڭ تۋا بىتكەن پاتولوگياسى بار كامەلەت جاسقا دەيىنگى بالالارعا كورسەتىلەدى.
– ال از قامتىلعان وتباسىلار بۇل ساناتقا كىرمەي مە؟
– بيىل الەۋمەتتىك مەديتسينالىق ساقتاندىرۋ قورى ءمامس پاكەتى بويىنشا الەۋمەتتىك قورعالماعان وتباسىلاردان شىققان بالالاردى, ياعني اتاۋلى الەۋمەتتىك كومەك الۋشىلاردى قولداۋدى باستادى. 6-دان 12 جاسقا دەيىنگى بالالارعا ءتۇرلى جاقسۇيەك-بەت ايماعىنىڭ اۋىتقۋلارى كەزىندە ورتودونتيالىق كومەك كورسەتىلەتىن بولادى. بۇل كومەكتى 9 مىڭنان استام بالا الادى, وعان وسى جىلدىڭ سوڭىنا دەيىن 415 ملن تەڭگە قاراستىرىلعان.
– شۇعىل ستوماتولوگيالىق كومەككە نە جاتادى؟
– وعان ءتىس جۇلۋ, ءستوماتيتتى ەمدەۋ, ەسكى پلومبانى الىپ تاستاۋ, پلومبالاۋ­دىڭ ءتۇرلى تاسىلدەرى, ستوماتولوگ-تەراپەۆت, ستوماتولوگ-حيرۋرگ, ورتودونت, ورتوپەد قىزمەتتەرى, جاق رەنتگەنى, انەستەزيا تاسىلدەرى, بالالاردىڭ تۋا ءبىتتى جاق سۇيەكتەرىنىڭ اقاۋىن ەمدەۋ جاتادى.
– ەگەر جۇكتى ايەل بۇرىن جۇمىس ىستەمەگەندىكتەن ءمامس جۇيەسىندە تىركەلمەگەن بولسا, وعان ءتىس ەمدەۋ بويىنشا تەگىن كومەك كورسەتىلە مە؟
– جۇكتى ايەل بۇرىن جۇمىس ىستەمەسە دە, ستوماتولوگيالىق كومەكتى تەگىن الۋىنا بولادى. باستىسى ول ءوز ەمحاناسىنا جۇكتىلىگى بويىنشا تىركەلسە بولدى. ءسويتىپ ول وسى كومەكتى الاتىن 15 ساناتتىڭ تىزبەسىنە كىرەدى دە, ءتىسىن تەگىن ەمدەتۋگە قۇقىلى بولادى.
– قازىر تەك مەملەكەتتىك قانا ەمەس, جەكە مەنشىك ءتىس ەمحانالارى دا ءمامس جۇيەسى بويىنشا ءسىزدىڭ قورمەن شارت جاساپ, حالىققا تەگىن قىزمەت كورسەتۋدە. ولار سول كورسەتكەن قىزمەتتەرى ءۇشىن قوردان ءوز ۇلەسىن الا ما؟
– ارينە, الادى. جەكە ءتىس ەمحانالارى تەگىن ەم كورسەتپەيدى. ولاردىڭ قىزمەتىنە ءبىزدىڭ قوردان اقشا بولىنەدى. اتالعان ءتىس كلينيكالارىمەن سۋبمەردىگەرلىك شارت جاسالادى. سول ارقىلى ولار كورسەتكەن قىزمەتتەرى ءۇشىن اي سايىن اقىلارىن الىپ وتىرادى. كورسەتىلگەن قىزمەتتەرگە اقى تولەۋ پاتسيەنتتىڭ تىركەلگەن جەرى بويىن­شا مەديتسينالىق-سانيتارلىق العاشقى كومەك كورسەتۋ ۇيىمدارى, ياعني ەمحانالار ارقىلى جۇرگىزىلەدى. ماسەلەن, بيىل 8 ايدا الەۋمەتتىك مەديتسينالىق ساقتاندىرۋ قورى حالىققا 2,8 ملن-نان استام ستوماتولوگيالىق قىزمەت كورسەتكەنى ءۇشىن ەمحانالارعا 5,1 ملرد تەڭگە تولەدى.
– قورمەن شارت جاساعان ءتىس ەمحانالارىنىڭ ءتىزىمىن قايدان الۋعا بولادى؟
– ولاردىڭ ءتىزىمى ءبىزدىڭ قوردىڭ سايتىندا تۇر. ەلىمىزدىڭ 17 ايماعى بويىنشا قورمەن شارت جاساسقان بارلىق جەكە جانە مەملەكەتتىك ءتىس ەمدەۋ ورىندارىنىڭ اتاۋلارى, ورنالاسقان مەكەنجايى, تەلەفوندارىنا دەيىن سايتتا كورسەتىلگەن. سودان قاراپ, اركىم وزىنە ەڭ جاقىن جەردەگى ءتىس ەمحاناسىنا بارسا بولادى. 2020 جىلعى 1 قىركۇيەكتەگى جاعداي بويىنشا ەلىمىزدە 626 جەتكىزۋشى ستوماتولوگيالىق قىزمەت كورسەتەدى. ولاردىڭ ىشىندە 346-سى مەملەكەتتىك جانە 280-ءى جەكە كلينيكالار.
– ستوماتولوگيالىق شۇعىل كومەك الۋ ءۇشىن دارىگەردەن جولداما الۋدىڭ قاجەتى بار ما؟
– جوق. شۇعىل جانە جوسپارلى ستوماتولوگيالىق كومەك كورسەتۋ پاتسيەنتتىڭ تاڭداۋىمەن جۇزەگە اسىرىلادى, بالا – اتا-انا نەمەسە زاڭدى وكىل بولعان جاعدايدا جانە پاتسيەنتتىڭ تىركەلگەن جەرى بويىنشا ۋچاسكەلىك دارىگەر جولداماسىنىڭ بولۋى تالاپ ەتىلمەيدى. قىزمەت كورسەتۋ فاكتىسى جانە ستوماتولوگيالىق كومەك كولەمى اقپاراتتىق جۇيەدە تىركەلەدى. ستوماتولوگيالىق كومەك الۋ ءۇشىن پاتسيەنت ەمحاناعا دا, ستوماتولوگيالىق كلينيكاعا دا جۇگىنە الادى.
– ەگەر ەمحانا دارىگەرى تەگىن ءتىس ەمدەۋ قىزمەتى جوق دەسە, نە ىستەۋ كەرەك؟ بۇل رەتتە كىمگە حابارلاسۋ قاجەت؟
– تەگىن قىزمەتتەردى جاسىرۋدىڭ ەشكىمگە دە قاجەتى جوق. ال ەگەر سولاي ەتىپ جاتسا, سول ەمحانانىڭ كىرەبەرىسىندە ءىلىنىپ تۇراتىن تەگىن كەپىلدىك بەرىلەتىن كومەك تىزبەسىن قاراۋ كەرەك. سونىڭ ىشىندە كورسەتىلگەن ساناتقا جاتاتىن بولساڭىز, وسى اقپاراتتان حاباردار ەكەنىڭىزدى دارىگەرىڭىزگە ايتۋ كەرەك. وعان دا بولماي جاتسا, ەمحانانىڭ باس دارىگەرىنىڭ ورىنباسارى نەمەسە سول ەمحانادا ىشكى اۋديت بويىن­شا مامانعا بارىپ ايتۋعا بولادى. بۇعان دا بولماسا, ءبىزدىڭ 1406 بايلانىس ورتالىعىنا قوڭىراۋ شالۋ كەرەك. مەديتسينالىق كومەك كورسەتۋدەن باس تارتقان جاعدايدا, الەۋمەتتىك مەديتسينالىق ساقتاندىرۋ قورىنا Qoldau 24/7 موبيلدىك قوسىمشاسى ارقىلى جۇگىنۋ قاجەت. قوسىمشانى Play Market جانە App Store ارقىلى ورناتۋعا بولادى.
– ءمامس جۇيەسىندەگى مۇمكىندىكتەردى حالىقتىڭ كوبى بىلە بەرمەيتىن سەكىلدى…
– ءيا, ءبىز جۇيەدەگى جاقسى جاڭالىقتار تۋرالى ايتۋداي-اق ايتىپ, جازۋداي-اق جازىپ, بارلىق جەردە جاريالاپ جاتىرمىز. بىراق حالىقتىڭ كوبى سونى دۇرىس وقىپ, تۇسىنبەيدى نەمەسە سەنبەيدى. سوندىقتان جاڭا جۇيە جەمىسىن بەرىپ جاتقانىن ازاماتتارعا تۇسىندىرگىمىز كەلەدى. بارلىق جەڭىلدىكتەر مەن مۇمكىندىكتەردى fms.kz سايتىنان وقىپ, ءبىلىپ جۇرسەڭىزدەر ەكەن.