ەلورداداعى بىرقاتار مەديتسينالىق نىساندار جاڭعىرتۋدى قاجەت ەتەدى. سونىڭ ىشىندە تەمىرجول اۋرۋحاناسى بويىنشا ۇكىمەت ءتيىستى شارالاردى قابىلداپ جاتىر. كەشە قالا اكتيۆىنىڭ ماجىلىسىندە وسى تۋرالى ايتقان ەلوردا اكىمى التاي كولگىنوۆ اتالمىش نىسان بويىنشا تۇرىك ينۆەستورلارىمەن مەموراندۋم جاسالعانىن جەتكىزدى.
– اۋرۋحانا جاڭادان سالىنادى. ينۆەستورمەن بىرگە ونىڭ قۇرىلىسى جوسپارلانىپ جاتقان جەردى كورىپ كەلدىك. ەسكى عيماراتتىڭ ورنىنا جاڭا نىسان بوي كوتەرەدى. ونىڭ جانىندا پەرزەنتحانا بولادى. قۇرىلىستى باستاۋ ءىسى – ۋاقىتتىڭ ەنشىسىندە. قازىر ءتيىستى جۇمىستار بەلسەندى جۇرگىزىلىپ جاتىر, – دەدى قالا باسشىسى.
اكىمنىڭ ايتۋىنشا, بۇعان قوسا, پسيحيكالىق دەنساۋلىقتىڭ مەديتسينالىق ورتالىعى, №1 جانە №3 ەمحانالار كۇردەلى جوندەۋدەن وتكىزىلىپ, قالالىق بالالار اۋرۋحاناسىنىڭ ناۋقاستاردى قابىلداۋ ءبولىمى جاڭعىرتىلىپ, اتالعان نىساندار تەحنيكالىق تۇرعىدان كۇشەيتىلەدى.
