دوستىق ۇيىندە نۇر-سۇلتان قالاسى قازاقستان حالقى اسسامبلەياسىنىڭ ۇيىمداستىرۋىمەن «ءتىل – دوستىقتىڭ التىن كوپىرى» اتتى بايقاۋ ءوتتى.
شاراعا قوعام قايراتكەرلەرى, ەلوردالىق ەتنومادەني بىرلەستىكتەردىڭ جانە قحا جاستارىنىڭ وكىلدەرى قاتىستى. «مەملەكەتتىك ءتىلدى مەڭگەرۋ – بارشامىزدىڭ مىندەتىمىز. بۇل بايقاۋ ەلوردالىق قحا جاستارىنىڭ قانشالىقتى بەلسەندى ءارى قازاق تىلىنە دەگەن قۇرمەتىنىڭ جوعارى ەكەندىگىن كورسەتەدى» دەپ اتاپ ءوتتى نۇر-سۇلتان قالاسى قازاقستان حالقى اسسامبلەياسى كەڭەسىنىڭ مۇشەسى امانگەلدى سىزدىقوۆ.
بايقاۋعا قاتىسۋشىلار 3 كەزەڭ بويىنشا باق سىنادى. ءبىرىنشى كەزەڭدە ەتنوقاتىسۋشىلار «مەنىڭ وتانىم – قازاقستان» تاقىرىبىندا اۋىزشا تانىستىرىلىم جاسادى. ەكىنشى كەزەڭدە بايقاۋ قاتىسۋشىلارى توپتىق جۇمىسپەن, «ءتىل – دوستىقتىڭ التىن كوپىرى» اتتى تەاترلاندىرىلعان قويىلىمدى كورەرمەندەر نازارىنا ۇسىنسا, شەشۋشى كەزەڭدە قازاق ادەبيەتى كلاسسيكتەرىنىڭ جانە قازىرگى زامان ادەبيەتى اقىندارى مەن جازۋشىلارىنىڭ شىعارمالارىن مانەرلەپ وقىدى.
تارتىستى بايگەدە قازىلار القاسىنىڭ شەشىمى بويىنشا 1-ورىندى نۇر-سۇلتان قالاسى ۇيعىر ەتنومادەني ورتالىعى, 2-ورىندى «Polacy» قوعامدىق بىرلەستىگى السا, «يۋنچي» دۇنگەن ەتنومادەني ورتالىعى 3-ورىندى يەلەندى.
