بيىل «ءتىل تۋرالى» زاڭنىڭ قابىلدانعانىنا 30 جىل تولدى. 1989 جىلى 22 قىركۇيەكتە ەل تاريحىندا العاش رەت «قازاق كەڭەستىك سوتسياليستىك رەسپۋبليكاسىنىڭ ءتىل تۋرالى» زاڭى قابىلداندى. بۇل – تۋعان ءتىلىمىزدىڭ كوكجيەگىن كەڭەيتۋگە باستاۋ بولعان العاشقى قادام ەدى.
ال ەلىمىز تاۋەلسىزدىك الىپ, ءوز الدىنا دەربەس, ەگەمەن مەملەكەت بولعاندا, 1995 جىلى 30 تامىزدا قابىلدانعان كونستيتۋتسيامىزدا قازاق ءتىلى – مەملەكەتتىك ءتىل بولىپ بەكىتىلدى. سونىڭ ناتيجەسىندە انا ءتىلىمىز ۇلتارالىق قاتىناس تىلىنە اينالىپ, رەسمي قۇجاتتار مەملەكەتتىك تىلدە جازىلاتىن بولدى.
«انا ءتىلىمىزدىڭ ابىرويىن ارتتىرىپ, ايبارىن اسىرعان, مارتەبەسىن بەكىتىپ, مەرەيىن وسىرگەن اتاۋلى داتاعا بايلانىستى رەسپۋبليكا شەڭبەرىندەگى ءتىل جاناشىرلارىنا پرەزيدەنت قاسىم-جومارت توقاەۆتىڭ «العىس حاتى» بەرىلدى.
اقوردا رەزيدەنتسياسىندا مەملەكەت باسشىسىنىڭ ىقىلاسىن پرەزيدەنت اكىمشىلىگى باسشىسىنىڭ ءبىرىنشى ورىنباسارى دارحان كالەتاەۆ جەتكىزدى. ولاردىڭ قاتارىندا مىرزاتاي جولداسبەك, ومىرزاق ايتباەۆ, مۇحتار شاحانوۆ, امانگەلدى ايتالى, سماعۇل ەلۋباي, اسىلى وسمان, ساۋلە مەشىتباي, سايلاۋ باتىرشا-ۇلى, كەنجەحان ماتىجانوۆ, مەرەكە قۇلكەنوۆ, ءشامشيدين پاتتەۆ, دوس كوشىم, قاينار ولجاي, كامال الپەيىسوۆا, ەركىن قىدىر, ۆلاديسلاۆ تەن, ماكسيم روجين سەكىلدى مەملەكەتتىك ءتىلدىڭ كەڭ كولەمدە قولدانۋىنا ەلەۋلى ۇلەس قوسىپ جۇرگەن جۇزدەن اسا ازامات بار. سونىمەن قاتار «انا ءتىلى» ۇلت اپتالىعى, «جاس قازاق» قوعامدىق-ساياسي گازەتى مەن الماتى وبلىستىق «جەتىسۋ» تەلەارناسىنىڭ «ءتىل ساقشىسى» باعدارلاماسىنىڭ ۇجىمدارىنا دا «العىس حات» تابىس ەتىلدى.
