وتكەن عاسىردىڭ الپىسىنشى جىلدارى دومبىراشىلار ءانسامبلى بولىپ قۇرىلعان استانا قالاسىنداعى گۋمانيتارلىق كوللەدجدىڭ كوركەمونەرپازدار وركەسترى بۇگىنگى تاڭدا ەلىمىزگە تانىلعان ونەر ۇجىمىنا اينالىپ وتىر.
بۇل ۇجىمعا ۇزاق جىلدار بويى كاسىبي مۋزىكانت, ءداستۇرلى كۇيشى, كومپوزيتور جاقسىلىق مۇقانۇلى جەتەكشىلىك ەتىپ, تالاي اسىل ءان-كۇيلەرىمىزدى وركەستر رەپەرتۋارىنا قوستى. سول كەزەڭدە شىعارماشىلىق ۇجىم رەسپۋبليكالىق بايقاۋلارعا قاتىسىپ, جۇلدەگەرلەر قاتارىنان كورىندى.
ودان كەيىن وركەسترگە استاناعا جولدامامەن كەلگەن جاس مامان ماحاببات رىسبەكقىزىنىڭ دا سىڭىرگەن ەڭبەگى زور. كاسىبي ونەرپازدىڭ كەزىندە ءانسامبلدىڭ اسپاپتىق قۇرامىنا قوبىز قوسىلىپ, داۋىسى تۇرلەندى. ونەرپازداردىڭ شەبەرلىگى دە شىڭدالىپ, كاسىبي قابىلەتى ارتتى.
بۇگىندە كوپشىلىككە تانىلعان شىعارماشىلىق ۇجىمعا بەلگىلى مۋزىكانت ساپارعالي احمەتجانۇلى جەتەكشىلىك ەتەدى. ونىڭ ۇتىمدى ۇيىمداستىرۋشىلىعىنىڭ ارقاسىندا وركەستر ۇجىمى ەكى ەسە ءوسىپ, قۇرامىنداعى ونەرپازداردىڭ تالانتى دارالانا ءتۇستى. ارنايى مۋزىكالىق باعدارلاما جاسالدى. قۇرمانعازىنىڭ «سارىارقا», «بالبىراۋىن», دينا نۇرپەيىسوۆانىڭ «اسەمقوڭىر» جانە نۇرعيسا تىلەنديەۆتىڭ «مۇراگەر» كۇي پوەماسى وركەستر رەپەرتۋارىنا قوسىلدى. انسامبلدەگى ۇلتتىق مۋزىكالىق اسپاپتاردىڭ قۇرامى كوبەيدى.
ۇلاعاتتى ۇستازدىڭ دارىندى شاكىرتتەرى دە جەتەرلىك.اسىرەسە, ولاردىڭ اراسىندا مەملەكەتتىك «دارىن» سىيلىعىنىڭ يەگەرى انار مۇزداحانوۆا , قر ەڭبەك سىڭىرگەن ءارتىسى گۇلنار حامزينا, ءداستۇرلى كۇيشى ءسالىم ىزتىلەۋوۆ, ءانشى بوتاگوز دۇبىرباەۆا سەكىلدى ونەرپازداردىڭ ەسىمدەرىن ماقتانىشپەن ايتۋعا بولادى. جاس ۇرپاققا سانالى تاربيە مەن شىعارماشىلىق تابىستارى ءۇشىن س.احمەتجانۇلى استانا قالاسى اكىمىنىڭ العىس حاتىمەن ماراپاتتالعان.
تۇيىندەپ ايتقاندا, ۇلتتىق مۇرامىزدى ناسيحاتتاپ, باسقالارعا عاجايىپ ونەرىمىزدى تانىتىپ جۇرگەن وركەستر استاناداعى گۋمانيتارلىق كوللەدجدىڭ عانا ەمەس, تۇتاس ەلىمىزدىڭ ماقتانىشى دەپ ايتۋعا بولادى.
ازامات ەسەنجول
