اتا-انالاردى بالانىڭ بوس ۋاقىتىن ءتيىمدى ۇيىمداستىرۋ ماسەلەسى ءجيى مازالايدى. اسىرەسە, ءۇش ايلىق جازعى دەمالىس كەزىندە. مۇندايدا تاپتىرماس شەشىمنىڭ ءبىرى – اۋلا كلۋبتارى. بۇگىندە ولاردىڭ سانى 13-كە جەتكەن. قالا اكىمدىگىنە قاراستى «استانا جاستارى» ۇيىمى بارىنە قىزىقتى باعدارلاما دايىنداعان. ءار كلۋبتىڭ وزىندىك باعىتى بار, ديزاينى بىرىنەن-ءبىرى وتەدى. ال, وقۋشىلار قانداي ىسكە ءۇيىر؟ قىزىعۋشىلىقتارىن بىلمەك نيەتپەن ەلورداداعى ەڭ ۇلكەن اۋلا كلۋبى – «جاس قاناتقا» جول تارتتىق.
«جاس قانات» جالىقتىرمايدى
ابىلاي حان داڭعىلى 49/3-ءۇيدىڭ تومەنگى قاباتىندا ورنالاسقان اۋلا كلۋبى جاستار مەن جەتكىنشەكتەردى قۋانا قارسى الادى. ورتالىققا 5-29 جاس ارالىعىنداعى تۇرعىندار كەلەدى. ءيا, قاتە وقىمادىڭىز. ويتكەنى مۇندا بالاسىمەن بىرگە دەمالۋعا اكە-شەشە دە اۋەس ەكەن. ماسەلەن, ۇلكەندەر كىشكەنتايلارىمەن ۇستەل تەننيسىن وينايدى, شاحماتتا وي جارىستىرادى. وعان اكىمشىلىكتىڭ ەش قارسىلىعى جوق. كەرىسىنشە, بالاعا جاقىندارى كوبىرەك كوڭىل بولسە, ونىڭ قارىم-قابىلەتى دە اشىلا تۇسەدى دەيدى قىزمەتكەرلەر.
جالپى, جاسقاناتتىقتارعا يوگا, بەينەلەۋ ونەرى, سكاۋتينگ, ۇستەل تەننيسى, تەحنيكالىق شىعارماشىلىق, فۋتبول, شاحمات سەكىلدى ۇيىرمەلەر قاراستىرىلعان. ءبىز بارعان كەزدە ورتالىقتا «مودەلدەۋ» ساباعى ءوتىپ جاتتى. بالالار بار زەيىنىمەن سىزبا-نۇسقالارعا قاراپ, تانك, كەمە, جۇك كولىگى سەكىلدى ءتۇرلى تەحنيكانىڭ ۇلگىسىن جاساپ وتىر ەكەن. ساباقتاردان بوساعان كىشكەنتاي تەحنيكتەر دەمالىس ۋاقىتىندا ۇيىرمەگە اپتاسىنا ءتورت رەت كەلەدى. ولار ۇساق بولشەكتەردى جيناپ, اسكەري ماشينالاردىڭ مودەلدەرىن قۇراستىرادى. «بۇل ۇيىرمەگە بالانى توعىز جاستان باستاپ قابىلدايمىز. پايداسى وتە مول. موتوريكاسى داميدى, تەحنيكالىق ءبىلىم الادى, اناليتيكالىق ويلاۋ قابىلەتى كۇشەيەدى. سونداي-اق, حالىقارالىق جارىستاردان دا قالماۋعا تىرىسامىز. ماسەلەن, بىلتىر ماسكەۋدە وتكەن «تانك ءوليمپى» كوپساتىلى جارىسىندا ءۇشىنشى ورىن الساق, بيىل ءساۋىر ايىندا تاعى قاتىسىپ, باس جۇلدەنى يەلەنىپ قايتتىق» دەيدى «مودەلدەۋ» ۇيىرمەسىنىڭ جەتەكشىسى ەركىن ماجيدوۆ.
«جاس قانات» اۋلا كلۋبىنىڭ اكىمشىلىگى بەرگەن مالىمەتكە سايكەس, مۇنداعى ۇيىرمەلەرگە 200-گە جۋىق بالا قاتىسادى. قۋانتارلىعى, كانيكۋل ۋاقىتىندا دا قىزىعۋشىلىق تانىتقاندار قاتارى سيرەمەپتى.
بالالارعا ءبارى تەگىن
ال, «ارمانداستار» مەن «ميراس» اۋلا كلۋبىنىڭ جەتەكشىسى ازامات كاريموۆتىڭ ايتۋىنشا, بۇگىندە استاناداعى 13 اۋلا كلۋبىنداعى ۇيىرمەلەرگە 3 مىڭعا جۋىق بالا جازىلعان. «بۇل ورتالىقتار جاس ەلوردالىقتار ءۇشىن كوپ فۋنكتسيونالدى مادەني-سپورت ورتالىقتارىنا اينالىپ وتىر. ورتالىقتاردا بوكس, كۇرەس, كاراتە سەكتسيالارى, حورەوگرافيا, ۆوكال, ءىس تىگۋ, قولونەر سىندى ءتۇرلى ۇيiرمەلەر جۇمىس ىستەيدى. العاشىندا اۋلا كلۋبتارىنىڭ جۇمىسىنا جاتىرقاي قاراعان قالا تۇرعىندارى بۇگiندە بەلسەندiلiك تانىتىپ, كلۋب جۇمىستارىن جاقسارتۋعا اتسالىسىپ ءجۇر. ساباقتان تىس ۋاقىتتا بالالار مەن جاسوسپiرiمدەر سەندەلiپ بوس جۇرمەي, دەنساۋلىعىنا پايدالى iسپەن شۇعىلدانادى. جاسوسپiرiمدەرمەن تاجiريبەلi مۇعالiمدەر, پسيحولوگ ماماندار جەكە جۇمىس iستەيدى. تاربيەلەنۋشىلەر ءاردايىم كلۋب اكiمشiلiگi مەن وقىتۋشىلاردىڭ, پسيحولوگ مامانداردىڭ قاداعالاۋىندا. قاۋىپسىزدىك ماقساتىندا وسى جىلى ءار ورتالىققا بەينەباقىلاۋ كامەرالارى دا ورناتىلدى. ەڭ باستىسى, بالالار بۇل قىزمەتتىڭ ءبارىن تەگىن پايدالانادى» دەيدى ازامات كاريموۆ.
مۇنداعى جەتكىنشەكتەر اۋداندىق جانە قالالىق دەڭگەيدەگى مادەني-رۋحاني جانە سپورتتىق شارالارعا بەلسەنە اتسالىسادى. كلۋبتاردىڭ ەڭ ۇزدىك توپتارى رەسپۋبليكالىق جارىستارعا جىبەرىلەدى. جالپى, اۋلا كلۋبتارىنىڭ جاسوسپىرىمدەردىڭ بوس ۋاقىتىن ءتيىمدى ۇيلەستىرۋگە, ولاردى سالاۋاتتى ءومىر سالتىنا باۋلۋعا, شىعارماشىلىعىن دامىتۋعا زور ىقپال ەتىپ وتىرعان ۇلكەن تاربيە مەكتەبىنە اينالعانى قۋانتادى.
ءمادينا جاقىپ
