ەلوردادا «تازا قازاقستان: استانا – تازالىق پەن ءتارتىپتىڭ ۇلگىسى» ەكولوگيا ايلىعى قارقىندى ءجۇرىپ جاتىر. وسى اپتادا استانالىقتار «كيەلى مەكەن» اكتسياسى اياسىندا ەسكەرتكىشتەر مەن تاريحي عيماراتتاردىڭ اۋماعىن تازارتۋ جانە اباتتاندىرۋ جۇمىسىمەن اينالىسۋدا. «كيەلى مەكەن» تازالىق اكتسياسى باستالعالى ەلوردادا 50-گە جۋىق ەسكەرتكىش اۋماعى تازارتىلدى. ال الداعى اپتادا «جاسىل ايماق» اكتسياسى ۇيىمداستىرىلىپ, اعاش وتىرعىزۋ مەن كوشەتتەردى اكتەۋ جۇمىسى جۇرگىزىلەدى. ەكولوگيا ايلىعى 11 مامىرعا دەيىن جالعاسادى.
ەسكەرتكىشتەر تازارتىلدى
ەكولوگيا اپتالىعىنا قاتىسۋشىلار ىبىراي التىنسارين ءمۇسىنىنىڭ جانە اباي ەسكەرتكىشىنىڭ اينالاسىن تازالادى. ءىس-شاراعا ءماسليحات دەپۋتاتتارى, مادەنيەت سالاسىنىڭ قىزمەتكەرلەرى, ەرىكتىلەر مەن قالا تۇرعىندارى قاتىستى.
«مەملەكەت باسشىسىنىڭ تاپسىرماسىمەن رەسپۋبليكا بويىنشا «تازا قازاقستان: استانا – تازالىق پەن ءتارتىپتىڭ ۇلگىسى» اۋقىمدى ەكولوگيا اكتسياسى باستالدى. قوعامدىق ورىنداردى, تاريحي ورىنداردى, كوشەلەر مەن اۋلالاردى تازارتۋ ماقساتىندا ىبىراي ءالتىنساريننىڭ ءمۇسىنىن تازالاۋعا جينالدىق. ەلوردادا بارلىعى 117 ەسكەرتكىش بولسا, ونىڭ 46-سى – مەملەكەت قورعاۋىندا. اكتسيا اياقتالعانعا دەيىن قالاداعى بارلىق ەسكەرتكىشتى تازارتۋ جوسپارلانىپ وتىر» دەدى بىرىككەن مۇراجايلار ديرەكتسياسى ديرەكتورىنىڭ ورىنباسارى سامات تەرگەمباەۆ.
تازالىق اكتسياسىنا قاتىسۋشى ەركەبۇلان اعىمباەۆتىڭ ايتۋىنشا, تازالىقتا تاربيەلىك ءمان بار.
«كوكتەمنىڭ كەلۋىمەن قالادا اۋقىمدى ەكواكتسيا باستالدى. ءوز كەزەگىمىزدە قالانى قوقىستان تازارتىپ جاتىرمىز. ايتا كەتەرلىگى, اكتسيانىڭ وسكەلەڭ ۇرپاق ءۇشىن تاربيەلىك ءمانى زور. ءار نىسانعا ۇقىپپەن قاراپ, تازالىق تانىتۋعا شاقىرامىز» دەيدى «ناز» مەملەكەتتىك بي تەاترىنىڭ ديرەكتورى ەركەبۇلان اعىمباەۆ.
اباي ەسكەرتكىشىن كىر مەن قوقىستان تازارتۋ بارىسىندا قوعام بەلسەندىلەرى, ە.راحماديەۆ اتىنداعى مەملەكەتتىك اكادەميالىق فيلارمونيا قىزمەتكەرلەرى مەن اباي مەكتەبىنىڭ وقۋشىلارى تازالىق جۇمىستارىن جۇرگىزىپ قانا قويماي, قازاق باس اقىنىنىڭ ولەڭدەرى مەن قارا سوزدەرىن وقىدى, اندەرىن ورىندادى.
تازالىق شەبىندە –ستۋدەنتتەر
كەشە ەلوردادا «كيەلى مەكەن» تازالىق اكتسياسى اياسىندا ساكەن سەيفۋللين ەسكەرتكىشى اۋماعىن تازالاۋ جۇمىستارى جۇرگىزىلدى. وعان سەيفۋللين مۋزەيى قىزمەتكەرلەرىمەن قاتار, ونەر مەن ادەبيەت وكىلدەرى, سونداي-اق س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ وقىتۋشىلارى مەن ستۋدەنتتەرى بەلسەندى قاتىستى. اكتسياعا قاتىسۋشىلار تەك قانا ەسكەرتكىش اۋماعىن تازالاپ قانا قويماي, كوشە بويىندا دا جۇمىس ىستەدى.
– قالادا ءوتىپ تۇراتىن تازالىق سەنبىلىكتەرىنە ۋنيۆەرسيتەت ستۋدەنتتەرى تۇراقتى قاتىسادى. ال بيىلعى جالپىقالالىق ەكولوگيا ايلىعى ەرەكشە سيپاتتا ءوتىپ جاتقانى بەلگىلى. ءار اپتانىڭ وزىندىك اتاۋى بار, ياعني تازالىق جۇمىستارى بەلگىلى باعىت بويىنشا اتقارىلادى. وسى اپتادا ءوتىپ جاتقان «كيەلى مەكەن» اكتسياسىندا قالامىزداعى تاريحي عيماراتتار مەن ەسكەرتكىشتەردى تازالاۋعا جانە اباتتاندىرۋعا ارنالىپ جاتىر. سوندىقتان ءبىز ساكەن سەيفۋللين ەسكەرتكىشىنە ارنايى كەلىپ, تازالىق جۇمىسىن جۇرگىزىپ جاتىرمىز. ستۋدەنتتەرىمىز مۇنداي ءىس-شارالارعا بەلسەندىلىكپەن قاتىسادى. مۇنداي جۇمىستاردىڭ ءبىر جاعىنان تاربيەلىك ماڭىزى بار دەپ ويلايمىن. ەلوردامىزدىڭ تازا بولۋى ونىڭ ءاربىر تۇرعىنىنا بايلانىستى بولاتىنى ءسوزسىز. سوندىقتان بارشا استانالىقتاردى ەكولوگيا اكتسياسىنا بەلسەندىلىكپەن قاتىسۋعا شىقىرامىن, – دەيدى س.سەيفۋللين اتىنداعى قازاق اگروتەحيكالىق ۋنيۆەرسيتەتى كومپيۋتەرلىك جۇيەلەر جانە كاسىپتىك ءبىلىم بەرۋ فاكۋلتەتى دەكانىنىڭ ورىنباسارى اسەم مۇساتاەۆا.
جالپى كەشە س.سەيفۋللين اتىنداعى قازاق ارگوتەحنيكالىق ۋنيۆەرسيتەتىنىڭ 5 مىڭنان اسا ستۋدەنتى ەكولوگيا ايلىعىن قولداۋ بويىنشا ەكوچەللەندج ۇيىمداستىرىپ, ەستافەتانى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى ستۋدەنتتەرىنە جولدادى. ۇيىمداستىرۋشىلاردىڭ مالىمەتىنشە, ەكوچەللەدج ەلورداداعى 15 جوعارى وقۋ ورنى ستۋدەنتتەرىن قامتىماق.
باتىر ەسكەرتكىشى اينالاسىن تازالادى
ەلوردانىڭ مادەنيەت ۇيىمدارى قىزمەتكەرلەرى مەن «جاس سارباز» پاتريوتتىق قوزعالىسىنىڭ تاربيەلەنۋشىلەرى سارىارقا داڭعىلىندا ورنالاسقان كەڭەس وداعىنىڭ باتىرى, اتى اڭىزعا اينالعان ۇشقىش تالعات بيگەلدينوۆتىڭ ەسكەرتكىشىنە جانە اينالاسىنا تازالىق جۇمىستارىن جۇرگىزدى.
«جاس سارباز» بالالار مەن جاسوسپىرىمدەر اسكەري-پاتريوتتىق قوزعالىسى استانا قالاسى بويىنشا فيليالىنىڭ توراعاسى اسحات نالشىبەكتىڭ ايتۋىنشا, ەكواكتسيا – وسكەلەڭ ۇرپاقتىڭ بويىنا جاقىندارىنا دەگەن قامقورلىق, قۇرمەت سەزىمىن قالىپتاستىرۋدىڭ ۇلگىسى. بارلىعى 50-دەن استام جاس سارباز بەلسەندىلىكپەن جۇمىس ىستەدى.
«ءبىز بۇل اكتسيانى قالامىزدىڭ بارشا تۇرعىندارىنا ۇندەۋ رەتىندە وتكىزىپ جاتىرمىز. ءبىز جاستاردى, ەرىكتىلەردى جانە بارلىق مۇددەلى ادامداردى استانامىزدىڭ اۋلالارى مەن كوشەلەرىن قوقىستان تازارتۋعا جانە ەكولوگيا جاعدايىن جاقسارتۋعا شاقىرامىز. جۇمىس ءالى دە جالعاسادى, ءار اپتا بەلگىلى ءبىر تاقىرىپقا ارنالادى» دەيدى اسحات نالشىبەك.
سەنبىلىكتىڭ تاربيەلىك ءمانى زور
وقۋشىلار سارايى الدىنداعى ءال-فارابي ەسكەرتكىشى اۋماعىندا تازالىق اكتسياسى ءوتتى. ءىس-شاراعا وقۋشىلار مەن «جاستار» سارايى, مۋزەي قىزمەتكەرلەرى قاتىستى.
«تازا قازاقستان: استانا – تازالىق پەن ءتارتىپتىڭ ۇلگىسى» اۋقىمدى ەكولوگيا اكتسياسى جالعاسۋدا. بۇل اپتا سەنبىلىككە قاتىسۋشىلار ءۇشىن «كيەلى مەكەن» ۇرانىمەن ءوتىپ جاتىر. سەنبىلىككە شىققان قالا تۇرعىندارى تاريح جانە مادەنيەت ەسكەرتكىشتەرىنىڭ اينالاسىن قوقىستان تازارتىپ, ولاردى كۇتىپ-باپتاۋعا جانە قورعاۋعا قاتىستى ناسيحات جۇمىسىن قاتار جۇرگىزۋدە.
سامات تەرگەمباەۆ, استانا قالاسى بىرلەسكەن مۇراجايلار ديرەكتسياسى باسشىسىنىڭ ورىنباسارى تازالىق اكتسياسى جايىندا ويىمەن ءبولىستى.
«ناۋقان كەزىندە قالا بويىنشا ەسەپتە تۇرعان تاريح جانە مادەنيەت ەسكەرتكىشتەرىن تۇگەلگە جۋىق قامتىپ, اينالاسىن اباتتاندىرىپ, جوندەۋگە كىرىسىپ كەتتىك. تەك تازالاۋ جۇمىستارىن عانا ەمەس, ءاربىر قاسيەتتى مەكەننىڭ ماعىناسىن, نە ءۇشىن ورناتىلعانى, سوعان بايلانىستى قالالىق مۇراجايلاردان ەكسكۋرسوۆود-گيد كەلىپ, جينالعان قاۋىمعا ءتۇسىندىرۋ-ءتالىم جۇمىستارىن جۇرگىزەدى. جاسىراتىنى جوق, جاسوسپىرىمدەر تاراپىنان ۆانداليزم وقيعالارى كەزدەسىپ جاتادى. ەسكەرتكىشتەردى ءبۇلدىرۋ, ونىڭ تۇعىرىنا شىعىپ, سكەيتبورد, ۆەلوسيپەدپەن سىرعاناپ, ويىن الاڭىنا اينالدىرىپ جاتادى. ونىڭ دۇرىس ەمەستىگىن ايتىپ, ەسكەرتكىشتەرگە كەلتىرەتىن زياننىڭ اۋقىمىن تۇسىندىرەمىز. ءال-فارابي اتىنداعى وقۋشىلار سارايىنىڭ الدىندا ورنالاسقان عۇلاما ەسكەرتكىشىنىڭ اينالاسىنا 100-گە تارتا ەرىكتى كەلىپ, ەڭبەكتىڭ جاڭا مادەنيەتىنىڭ ۇلگىسىن كورسەتتى. جالپى بۇل سەنبىلىكتىڭ جاستار ءۇشىن تاربيەلىك ءمانى زور» دەپ اتاپ ءوتتى س.تەرگەمباەۆ.
عالىم قوجابەكوۆ,
ايگۇل ۋايس,
نۇرلات بايگەنجە
