ءىىم تەرروريزم اكتىسى تۋرالى جالعان حابار تاراتقانى ءۇشىن جاۋاپكەرشىلىك بارىن ەسكە سالادى, دەپ حابارلايدى astana-akshamy.kz
18 ساۋىردە Telegram مەسسەندجەرىندە استانا قالاسىنداعى مەكتەپتەرگە شابۋىل جاساۋ قاۋپى تۋرالى حابارلامالار تارالا باستادى.
تەرروريزم اكتىسى تۋرالى كورىنەۋ جالعان حابارلاۋ فاكتىسى بويىنشا سوتقا دەيىنگى تەرگەۋ باستالدى. بارلىق قاجەتتى تەرگەۋ ارەكەتتەرى جۇرگىزىلۋدە. حابارلامادا كورسەتىلگەن ورىنداردا قاۋىپسىزدىكتى قامتاماسىز ەتۋ جانە كۇزەتتى كۇشەيتۋ بويىنشا شارالار قابىلداندى. وسىعان بايلانىستى دۇربەلەڭگە سالىنباي, رەسمي اقپارات كوزدەرىنە سەنۋگە شاقىرامىز, – دەدى ۆەدومستۆودا.
سونىمەن قاتار جۇرگىزىلگەن تەكسەرۋدە انىقتالعانداي, بۇعان دەيىن رەسەي فەدەراتسياسىنىڭ بىرقاتار وڭىرىندە وسىنداي حابارلامالار تارالعان.
Telegram-دا جاريالانعان ۆيدەو جالعان جانە 2024 جىلدىڭ 31 قاڭتارىندا رەسەي فەدەراتسياسىنىڭ كالۋگا قالاسىندا جاريالانعان.
ايتا كەتەيىك, بيىل اقپان ايىندا اقتوبە, اتىراۋ, الماتى, پاۆلودار, قاراعاندى جانە قوستاناي قالالارىندا وسىنداي حابارلامالار تاراعان بولاتىن.
جالعان حاباردى تاراتقانى ءۇشىن قاراعاندى جانە قوستاناي قالالارىندا كامەلەتكە تولماعان بالالار ۇستالدى. ولاردىڭ جاسى ەسكەرىلىپ, اتا-انالارى اكىمشىلىك جاۋاپكەرشىلىككە تارتىلدى.
سونداي-اق جالعان اقپارات تاراتاتىن ارنالاردى بۇعاتتاۋ تۋرالى مەسسەندجەر اكىمشىلىگىمەن جۇمىس جۇرگىزىلىپ جاتىر.
ءىىم تەرروريزم اكتىسى تۋرالى كورىنەۋ جالعان حابارلاعانى ءۇشىن 5 جىلعا دەيىن باس بوستاندىعىنان ايىرۋ جازاسى كوزدەلەتىنىن ەسكە سالادى.
