سىرتقى ىستەر مينيسترلەرى كەڭەسىنىڭ كەزەكتى وتىرىسى ءوتتى

قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ مەن قىرعىز رەسپۋبليكاسىنىڭ سىرتقى ىستەر ءمينيسترى جەەنبەك كۋلۋباەۆتىڭ توراعالىعىمەن قازاقستان جانە قىرعىزستان سىرتقى ىستەر مينيسترلەرى كەڭەسىنىڭ كەزەكتى وتىرىسى ءوتتى, دەپ حابارلايدى astana-akshamy.kz

ءىس-شارا بارىسىندا قىرعىز رەسپۋبليكاسىنىڭ پرەزيدەنتى سادىر جاپاروۆتىڭ 2024 جىلعى 18-19 ءساۋىر ارالىعىندا قازاقستانعا رەسمي ساپارى شەڭبەرىندە مەملەكەت باسشىلارىنىڭ توراعالىعىمەن وتەتىن قازاقستان رەسپۋبليكاسىنىڭ جانە قىرعىز رەسپۋبليكاسىنىڭ جوعارى مەملەكەتارالىق كەڭەسىنىڭ 6-شى وتىرىسىن وتكىزۋگە دايىندىق ماسەلەلەرى قارالدى.

سىرتقى ساياسي ۆەدومستۆولاردىڭ باسشىلارى ەكىجاقتى ىنتىماقتاستىقتىڭ وزەكتى اسپەكتىلەرىن تالقىلادى. دوستىق, باۋىرلاستىق, قۇرمەت پەن تاتۋ كورشىلىك نەگىزىندە وداقتاستىق قاتىناستاردى ودان ءارى تەرەڭدەتۋگە جانە كەڭەيتۋگە ءوزارا بەيىلدىلىگىن راستادى.

مينيسترلەر سونداي-اق وڭىرلىك جانە حالىقارالىق كۇن تارتىبىندەگى وزەكتى ماسەلەلەر بويىنشا «ساعاتتارىن تەڭەستىردى», كوپجاقتى قۇرىلىمدار شەڭبەرىندەگى سىندارلى ىنتىماقتاستىقتى جانە ەكى مەملەكەتتىڭ حالىقارالىق باستامالارىن ءوزارا قولداۋىن اتاپ ءوتتى.

وتىرىستىڭ قورىتىندىسى بويىنشا سىرتقى ساياسي ۆەدومستۆولار باسشىلارى قازاقستان رەسپۋبليكاسى مەن قىرعىز رەسپۋبليكاسى جوعارى مەملەكەتارالىق كەڭەسىنىڭ 6-شى وتىرىسى شەشىمىنىڭ جوباسىنا قول قويدى.