استانا قالاسىنىڭ اكىمدىگى مەن «Astana Innovations» اق-نىڭ بىرلەسە ۇيىمداستىرۋىمەن «سارىارقا» رەسپۋبليكالىق ۆەلوترەك عيماراتىندا «استانالىق حاكاتون» اتتى IT-جوبالارىنىڭ جارىسى ءوتتى.
بۇل شارا 2012 جىلى مامىر ايىندا تۇڭعىش رەت وتكىزىلىپ, وعان 100-دەن اسا ادام قاتىسقان بولاتىن. بيىل دا وسىنشا ۇمىتكەر باق سىنادى.
سايىسكەرلەردىڭ جاس شاماسىنا ەشقانداي شەكتەۋ قويىلماعان. ولارعا قويىلعان تالاپ – تاۋلىك ىشىندە اقپاراتتىق تەحنولوگيالار سالاسىندا بەلگىلى ءبىر جوبانى ۇسىنىپ, ىسكە اسىرۋ. شارت بويىنشا باعدارلاماشىلار, ديزاينەرلەر مەن جوبالاۋشىلار, IT-ماركەتولوگتار وزدەرىنىڭ IT-جوبالارىن جاسايدى.
جارىستىڭ سىياقى قورى بىلتىرعىداي – 1 ميلليون تەڭگە. جىكتەپ ايتقاندا, «استانا Innovations» اق تاعايىنداعان ول جۇلدە قورىنىڭ 500 مىڭ تەڭگەسىن «يننوۆاتسيالىق يدەيالاردى دامىتۋعا جاردەم» كومانداسى, 300 مىڭ تەڭگەسىن «نانو اتس», ال, 200 مىڭ تەڭگەسىن «كودتىڭ 50 جولى» توبى جەڭىپ الدى. مەديالىق قولداۋ اتالىمىندا «Yvision» بلوگ-پلاتفورماسىنان «كازتاكسي» مەن «وزگەرىس.kz» كومانداسى توپ جارسا, «نانو اتس» كومانداسى ىنتالاندىرۋ سىيلىعى رەتىندە ءوزىنىڭ IT-ونىمىنە «كونسالت-ينفو نس» كومپانياسىنان تاپسىرىس الدى. ال, «Nexus» پلانشەتى ۆسەۆولود لەونوۆ پەن «Embarcadero» مەن «Cheap Taxi» كوماندالارىنا بەرىلدى.
سونداي-اق, «C.A.P.» تالداۋ جانە بولجاۋ ورتالىعى» قوعامدىق قورىنىڭ ارنايى دەمەۋشىلىگىمەن «IT-باستامالاردى قولدايمىز» تاقىرىبى اياسىندا مەملەكەتتىك ءتىلدى دامىتۋدى كوزدەيتىن قازاقتىلدى ءۇش جوباعا قوسىمشا 300 مىڭ تەڭگە سىياقى بەرىلدى. ونىڭ 150 مىڭى «كودتىڭ 50 جولى» جوباسىنا بۇيىرسا, ەكىنشى ورىن العان «پەرنەبايگە» مەن «كازتاكسي», ءۇشىنشى ورىن العان «AstanaAR» ارقايسىسى 50 مىڭ تەڭگەدەن يەلەندى. مۇنداعى ماقسات – اقپاراتتىق تەحنولوگيالار سالاسىندا قازاقتىلدى جاستاردىڭ بەلسەندىلىگىن ارتتىرۋ. وسىعان وراي, www.startupkoldau.kz ۆەب-پورتالى دا اشىلعان بولاتىن. ول جەردەن جاس كاسىپكەرلەردىڭ يدەياسىن تياناقتاپ, جارىققا شىعارۋ ءۇشىن ءتيىستى كەڭەستەر مەن تەگىن حوستينگ الۋىنا بولادى.
«جالپى, ءبىز «Smart Astana» باستاماسى اياسىنداعى ۇزدىك جوبالارعا قولداۋ جاساۋدى كوزدەيمىز. جەڭىمپازداردى ءبىزدىڭ مەكەمە ءوزىنىڭ بيزنەس ينكۋباتورىنا قوسىپ, شەتەلدىك ۆەنچۋرلىق قورلارمەن جۇمىس جاساپ, قارجىلاي جانە ماركەتينگ جاعىنان كومەك كورسەتەدى» دەيدى «Astana Innovations» اق سەرۆيستىك-تەحنولوگيالىق قولداۋ دەپارتامەنتىنىڭ جەتەكشىسى باتىربەك داۋىتباەۆ.
ءسويتىپ, زاماناۋي يگىلىكتەردىڭ «جىلىگىن شاعىپ, مايىن ىشكەن» يننوۆاتورلار, باعدارلاماشىلار جانە ءىت سالاسىندا ەڭبەك ەتەتىن جاستاردىڭ وزىق ويلى يدەيالارى مەن جۇيەلى جوبالارى ەلوردامىزدىڭ ءومىر ءسۇرۋ ساپاسىن ارتتىرۋعا ارنالعان جاڭاشىلدىقتارىن ورتاعا سالدى. تالاپكەرلەرگە قازاقستاننىڭ ەڭ تاجىريبەلى ماماندارى مەن مەنتورلارى كومەكتەستى.
«ەندى ەڭ ۇتقىر يننوۆاتسيالىق تەحنولوگيالار مەن شەشىمدەردى «Smart Astana» – «اقىلدى قالا» جوباسى اياسىندا استانالىقتاردىڭ تۇرمىسىنا ەنگىزەتىن بولامىز» دەيدى ۇيىمداستىرۋشىلار.
