وڭتۇستىك قازاقستان وبلىسىنان 4 مىڭعا جۋىق بالا ەكسپو كورمەسىن تەگىن تاماشالاۋعا مۇمكىندىك الدى.
بۇگىنگە دەيىن شىمكەنتتەن استاناعا 1200 بالا كەلىپ, كورمەنى قىزىقتاپ قايتتى. الداعى ۋاقىتتا وبلىستان تاعى ەكى مىڭ وقۋشى كەلەدى دەپ كۇتىلۋدە. تۋريستىك كومپانيانىڭ وكىلى عاني نازاربەكتىڭ ايتۋىنشا, وقۋشىلار وسىمەن توعىزىنشى لەكپەن كەلىپ وتىر. «ءاربىر ساپاردا 150-دەي بالانى ەرتىپ كەلەمىز. بارلىعى شىمكەنت قالاسىنان, 24 شىلدەدەن باستاپ وبلىستىڭ مەكتەپ وقۋشىلارىن تارتا باستايمىز. ولاردىڭ جول شىعىندارى مەن بيلەتتەرىن بيۋدجەت پەن دەمەۋشىلەر تولەپ وتىر» دەيدى ول.
– بالا دەگەن اسەرشىل عوي. ەنەرگيانى قانداي جولمەن الۋعا بولاتىنىن ءوز كوزىمەن كورگەن ولار ەنەرگيا ۇنەمدەۋدىڭ ماڭىزدىلىعىن تۇسىنە باستايدى. ۇيگە قايتىپ بارا جاتىپ, جول-جونەكەي ءوزارا پىكىر الماسىپ, اسەرلەرىمەن بولىسەدى. كەيدە تىڭ تۋىندىلارىن دا ۇسىنىپ جاتادى. بۇل دەگەنىمىز, بارلىعى بەكەر كەتپەگەنىن بىلدىرەدى, – دەيدى عاني نازاربەك.
بۇل – الەۋمەتتىك جاعىنان از قامتىلعان وتباسىلارعا كومەك رەتىندە جاسالىپ وتىرعان يگى ءىس. سەبەبى استاناعا ءبىر رەت بولسىن كەلىپ, ەكسپو-نى كورىپ قايتۋ – كوپتەگەن بالاقايلاردىڭ ارمانى.
وڭتۇستىكتەن كورمەگە كەلگەن تۋريست-وقۋشىلار نازارباەۆ ۋنيۆەرسيتەتىنىڭ جاتاقحاناسىندا تۇراقتانادى. بالاقايلارعا سول جەردە ءۇش مەزگىل تاماعى بەرىلىپ, بارلىق جاعدايى جاسالادى. ەكى كۇنگە جالعاساتىن ساپاردىڭ العاشقى كۇنى ەكسپو قالاشىعىندا وتسە, سوڭعى كۇنىندە بالالار استانانىڭ ايشىقتى جەرلەرىن ارالايدى.
گۇلدانا تالعاتقىزى
