ماجىلىستەگى ۇكىمەت ساعاتىندا تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين «سبەربانك»-پەن اراداعى مەموراندۋمعا قاتىستى دەپۋتاتتاردىڭ ساۋالدارىنا جاۋاپ بەردى.
ءماجىلىس دەپۋتاتى ەرلان سايروۆ تسيفرلىق پلاتفورمانى قۇرۋعا بايلانىستى رەسەيدىڭ «سبەربانكى» اراسىنداعى قويىلعان مەموراندۋم جۇرتشىلىق ىشىندە رەزونانس تۋعىزعانىن ەسكە سالدى. «جوبانى ىسكە اسىرۋعا قاتىستى سۇراقتار ءالى بىتكەن جوق. ءبىز جوبانى ىسكە اسىرۋ ادىلەتتىلىك پرينتسيپتەرىنە سايكەس كەلۋى كەرەك دەپ ەسەپتەيمىز. ياعني تسيفرلىق پلاتفورما بويىنشا ناقتى كورسەتكىشتەرى بار, ءتيىستى تەحنيكالىق تاپسىرما ازىرلەنىپ, جوبادا قازاقستاندىق ۇلەستى قامتۋ جوعارى دەڭگەيدە بولۋى كەرەك. قازاقستاننىڭ تسيفرلىق پلاتفورماسىن ازىرلەۋگە حالىقارالىق اشىق تەندەر جاريالانعانى ابزال. وندا ەلدىڭ تسيفرلىق تاۋەلسىزدىگىنە, ازاماتتاردىڭ دەرەكتەرىن قورعاۋعا قاتىستى بارلىق تالاپتار بەلگىلەنۋى قاجەت. جوبانى وتاندىق تسيفرلىق يندۋستريانى دامىتۋ مەن ارتاراپتاندىرۋعا قۋاتتى سەرپىن بەرەتىندەي ەتىپ ىسكە اسىرۋعا ءتيىسپىز. وسى ورايدا ناقتى تەحنيكالىق تاپسىرما بار ما؟ جوبانى جۇزەگە اسىرۋعا اشىق كونكۋرس قاشان جاريالانادى؟» دەپ سۇرادى دەپۋتات.
باعدات مۋسين بۇل باعىتتا ءتيىستى ءتۇسىندىرۋ جۇمىستارى ءجۇرىپ جاتقانىنا توقتالدى. «ناقتى ايتساق, مەموراندۋمعا قول قويىلدى. ول ەشقانداي كەلىسىمشارت ەمەس. تەحنيكالىق نەگىزدەمە مەن تەحنيكالىق قۇجاتتاما دايارلاۋ ءۇشىن زەرتتەۋ جۇمىستارىن جۇرگىزىپ جاتىرمىز. 15 جەلتوقسانعا دەيىن زەرتتەۋ اياقتالعاننان كەيىن, تەحنيكالىق قۇجاتتاماعا كوشەمىز. الداعى جىلعى 15 اقپانعا دەيىن تەحنيكالىق قۇجاتتامانى دايىندايمىز. سول تەحنيكالىق قۇجاتتاما نەگىزىندە تەحنيكالىق ءارى ەكونوميكالىق نەگىزدەمە ازىرلەنەدى. وسى راسىمدەر جاسالماي, ەشقانداي كەلىسىمشارت بەكىتىلمەيدى. ەكىنشىدەن, پلاتفورماعا توقتالساق, ءبىز بۇگىنگە دەيىن جالپى وسى تەحنولوگيالاردى, ياعني ەلىمىزدە جاسالماعان پلاتفورمالاردىڭ ارقاسىندا تسيفرلاندىرۋدى جۇرگىزدىك. بىراق شەتەلدىك پلاتفورمالاردى الىپ, ءوزىمىزدىڭ قازاقستاندىق مامانداردىڭ بىلىكتىلىگىمەن قازىرگى تسيفرلاندىرۋ دەڭگەيىنە جەتتىك. ەندى ونى ارى قاراي ىلگەرىلەتۋ ءۇشىن, پروبلەمالاردى شەشۋ ءۇشىن جاڭا پلاتفورمالىق مودەلگە كوشۋ كەرەك ەكەنىن ايتىپ جاتىرمىز. سوندىقتان بۇل قادامدار زاڭعا سايكەس جۇرگىزىلەدى. وسى باعىتتا تالقىلاۋ ءجۇرىپ جاتىر. وسىعان دەيىن قول قويىلعانى – ول مەموراندۋم. نەلىكتەن ءبىز وعان قول قويدىق؟ ويتكەنى اشىق كودتاردى بەرۋگە نيەتتى قازىرگى كەزدە تەك سول پلاتفورما عانا بولىپ تۇر. ەگەر باسقا دا بارلىق تەحنولوگيالارى ءارى بىرىكتىرىلگەن ءبىر پلاتفورماسى بارلار بولسا, سونداي-اق بىزگە اشىق كودتاردى بەرسە, ءوزىمىز سول اشىق كودتاردىڭ ارقاسىندا سۇيەمەلدەۋ جۇمىستارىن جۇرگىزە الساق, وندا ولاردى دا قاراستىراتىن بولامىز» دەپ ءتۇسىندىردى مينيستر.
