«ستوپ, تۋبەركۋلەز!» ۇرانىمەن وتكىزىلگەن كەڭ اۋقىمدى قالالىق شارا بيىل 23 قىركۇيەك پەن 23 قازان ارالىعىندا ءوتتى. ءبىر اي بويى قالا تۇرعىندارىنا قۇرت اۋرۋىنىڭ الدىن الۋ, ءار ادامنىڭ ءوز دەنساۋلىعىنا قاتىستى بەلسەندى جەكە ومىرلىك ۇستانىمىن قالىپتاستىرۋ تۇرعىسىندا اعارتۋشىلىق-ناسيحات جۇمىستارى جۇرگىزىلدى.
اۋرۋدىڭ الدىن الۋ ماقساتىندا تۇرعىندار تەگىن فليۋوروگرافيالىق تەكسەرۋدەن ءوتتى. ءتورت بىردەي جىلجىمالى فليۋوروگرافيالىق تسيفرلىق قوندىرعىلار كۇن سايىن بازارلاردا, ساۋدا ورتالىقتارىندا, قالانىڭ تۇرعىن ءۇي الاپتارىندا قىزمەت ەتتى. سونىمەن بىرگە ادامدار كوپ شوعىرلانعان «داۋلەت», «ارتەم», «الەم», «جاننۇر», «دجافار», «باحۋس», «اسەم» «ماگنۋم», «استىقجان» ساۋدا ۇيلەرىندە, ساۋدا, ويىن-ساۋىق ورتالىقتارىنىڭ اۋماقتارىندا وسىنداي تەكسەرۋلەر جۇرگىزىلدى.
«پرومىشلەننىي», «تەلمان», «كۇيگەنجار», «ميچۋرين», «زارەچنىي» «پريگورودنىي», «جەلەزنودوروجنىي», «ءوندىرىس», «كوكتال» كەنتتەرىندە جۇرگىزىلگەن جىلجىمالى فليۋوروگرافتا تەكسەرۋ اسا ناتيجەلى بولدى. وسى شارا اياسىندا 6000-نان استام ادام فليۋوروگرافيالىق تەكسەرۋدەن ءوتتى.
بۇدان باسقا, تۋبەركۋلەزدىڭ الدىن الۋ ماسەلەلەرى بويىنشا دارىگەر- فتيزياترلار كەڭەس بەرىپ, قۇرت اۋرۋىنىڭ بەلگىلەرىن ءتۇسىندىرىپ, ساۋالناما جۇرگىزدى. بۇل شاراعا جۇكتى ايەلدەر مەن جاستار ورتالىقتارى قامتىلدى. ايلىق اياسىندا قالا مەكتەپتەرى دە نازاردان تىس قالعان جوق. مەكتەپ وقۋشىلارىنا وسى تاقىرىپ بويىنشا 212 سىنىپ ساعاتى ۇيىمداستىرىلدى, 24 كوللەدج ستۋدەنتتەرىن قوسقاندا 2000-داي قالا جاستارىمەن كەزدەسۋ وتكىزىلدى. قالالىق ءىىد-ءنىڭ قولداۋىمەن بەيىمدەۋ ورتالىعىنداعى بەلگىلى تۇراعى جوق 59 ادام تەگىن تەكسەرىلدى.
«ستوپ, تۋبەركۋلەز» اكتسياسىن ۇيىمداستىرۋشى – نۇر-سۇلتان قالاسى اكىمدىگى, قوعامدىق دەنساۋلىق ساقتاۋ باسقارماسى, نۇر-سۇلتان قالاسى ءىىد, جانە قالالىق فتيزيوپۋلمونولوگيالىق ورتالىق.
جالپى, ەلىمىزدەگى وسى دەرتكە قارسى باعدارلامانى جۇزەگە اسىرۋدىڭ ماڭىزدى ناتيجەلەرى تۋرالى ايتۋعا بولادى. سوڭعى بەس جىلدا رەسپۋبليكادا ناۋقاستار سانى 1,3 ەسەگە تومەندەدى. ەگەر 2014 جىلى رەسپۋبليكادا 11,5 مىڭعا جۋىق جاڭا اۋرۋ جاعدايى انىقتالسا, 2018 جىلدىڭ قورىتىندىسى بويىنشا 8,8 مىڭ وقيعا ورىن الدى. سونداي-اق سوڭعى 5 جىلدا قازاقستاندا قۇرت اۋرۋىنان بولاتىن ءولىم-ءجىتىم 2 ەسەگە تومەندەدى. ەلوردادا وتكەن اۋقىمدى شارانىڭ ەپيدەميولوگيالىق جاعدايدىڭ جاقسارۋىنا اسەرى مول.
