تۋعان توپىراقتى ءسۇيۋ
تاياۋدا فەيسبۋكتەگى دوستارىمنىڭ ءبىرىنىڭ پاراقشاسىنان ۇشاقتان تۇسكەن بويدا جاتا قالىپ جەردى ءسۇيىپ جاتقان ءبىر اقساقالدىڭ سۋرەتىن كوزىمىز شالدى. اينالاسى – قاۋمالاعان كوپشىلىك. ءبىرى ساجدە قىلعانداي جەردى ءسۇيىپ جاتقان اقساقالعا تاڭىرقاي قاراسا, ەندى بىرەۋلەر كوڭىلى بوساپ, تەبىرەنىپ, الگى كىسىنىڭ بويىنداعى سۇراپىل سەزىمدەرگە, قايتالانباس كوڭىل-كۇيىنە ورتاقتاسىپ وتىر.
سۇراستىرا بىلگەنىم, سۋرەت اۆتورى – قىرىق جىل بويى موينىنا فوتواپپاراتىن اسىنىپ, ەل كەزگەن جۋرناليست بولات وماراليەۆ ەكەن. ول اتامەكەنىنە اڭساپ جەتكەندە ساعىنىشى تۋلاپ, كۇمىس ساقالى ءمولت-ءمولت تامعان كوز جاسىنا شىلانعان جانە ءون بويىن كەرنەگەن سول سەزىمىن ىرىكپەي, تۋعان توپىراعىنا ساجدە ەتكەن اقساقالدىڭ قايتالانباس ءساتىن, تىلمەن ايتىپ جەتكىزگىسىز سۇراپىل سەزىمدەرىن ءبىر كادرعا سىيدىرعان ەكەن.
اۆتورمەن تىلدەسكەنىمدە: «1992 جىلدان باستاپ شەت ەلدەگى قانداستاردىڭ العاشقى لەگى كەلە باستادى. قىزىلوردا جەرىنە دە ۇلكەن ۇشاقپەن جۇزدەن اسا ورالمان كەلدى. اۋعانستاننان. مەن ولاردىڭ وتانىمىزعا اياق باسقانداعى سەزىمىن سۋرەتپەن جەتكىزگىم كەلدى. سونداعى ساعىناي قارابازار دەگەن اقساقالعا تاياپ: «اكەي, تۋعان جەردىڭ توپىراعى قالاي ەكەن؟» دەدىم. سول-اق ەكەن, اقساقال تىزە بۇگىپ جاتا قالىپ, جەردى سۇيە باستادى. مەن ساسىپ قالدىم دا, سىرتىلداتىپ سۋرەتكە تۇسىرە بەردىم» دەدى بولات اعا.
ول تۇستا بولات وماراليەۆ قىزىلوردا وبلىستىق گازەتىنىڭ ءفوتوتىلشىسى بولىپ ىستەيدى ەكەن. سۋرەتتەگى كىسىلەردىڭ اتاجۇرتقا ورالۋىنا مۇرىندىق بولعان وتان,داسىمىز – پامير كامالوۆ دەگەن ازامات. ول اۋعانستانداعى ەشقانداي قۇجاتى جوق قازاقتاردى ءبىر جەرگە جيناپ, بىرنەشە جۇك كولىگىنە وتىرعىزىپ, تۇركيا جەرىنە وتكىزىپ, وندا تۇرىكتەردىڭ كومەگىمەن ۇشاق جالداپ قازاقستانعا الىپ كەلگەن.
بۇل سۋرەتكە قاراپ, اتامەكەنگە اڭساپ ورالۋدىڭ قانداي بولاتىنىن سەزىنەسىڭ.