ەلىمىزدىڭ باس سانيتارلىق دارىگەرى جانداربەك بەكشين جاڭا ەپيدەميولوگيالىق ماۋسىمدا قازاقستاندىقتارعا تۇماۋدىڭ ءۇش ءتۇرى (ا(H1N1) – «ميچيگان»; ا (H3N2) – «سينگاپۋر»; ۆ شتاممى) قاۋىپ توندىرەتىنىن حابارلاعان بولاتىن. دارىگەرلەردىڭ بولجاۋىنشا, تۇماۋ جۇقتىرۋدىڭ العاشقى وقيعالارى قازان ايىنىڭ سوڭى مەن قاراشا ايىندا تىركەلەدى. ال تۇماۋ قىسقى كانيكۋلدان كەيىنگى كەزەڭدە, شامامەن 2019 جىلدىڭ قاڭتار ايىندا بەلەڭ الۋى مۇمكىن. وسىعان وراي, ەلىمىزدە 5 مىڭعا جۋىق ناۋقاس ەمدەلەتىن ورىندار دايىندالعان. سونداي-اق تۇماۋ مەن وزگە دە جۇقپالى ينفەكتسيالاردىڭ جاپپاي تارالۋى بولعان جاعدايدا ناۋقاستاردى قابىلدايتىن ۇيىمدار دا انىقتالىپتى.
جانداربەك بەكشين استانا مەن قوستاناي وبلىسىندا تۇماۋعا قارسى ەگەتىن ءدارى-دارمەك پەن ۆاكتسينانىڭ تاپشىلىعى بارىن جاسىرماي ايتتى. «ۆاكتسينا ساتىپ الۋعا ءبىز بايقاۋ وتكىزدىك. استانادا وسى ماسەلەنى شەشتىك. وزىمىزدە بۇرىن 30 مىڭ دوزا بار ەدى, تاعى 50 مىڭ دوزا ۆاكتسينا ساتىپ الدىق» دەدى ول. بۇعان قوسا, ەلىمىز بويىنشا ناۋقاستارعا كومەكتەسەتىن تۇماۋعا قارسى ەگىلەتىن 50 مىڭ قوراپ «تاميفليۋ» جانە 10 مىڭ قوراپ «رەلەنزا» پرەپاراتتارىنىڭ قورى جينالعان. دەمەك, استانالىقتارعا الاڭداۋعا نەگىز جوق.
باس سانيتارلىق دارىگەر ج.بەكشين ءدۇيىم جۇرتتى ەلەڭدەتكەن تۇماۋعا قاتىستى بىرەر ساۋالدارعا جاۋاپ بەردى. ونىڭ ايتۋىنشا, تۇماۋعا قارسى ەگىلەتىن ۆاكتسينا قاۋىپسىز. «كوپتەگەن ەلدەردە ناۋقاستى كوشەدە, مەترودا ەگەدى. بۇرىن ءبىز ۆاكتسينانى ينەمەن ەگەتىن ەدىك, ال قازىر جەكە ينە-دوزامەن سالامىز. ءىس جۇزىندە ۆاكتسينالاۋدان ەشقانداي قاۋىپ جوق» دەدى ول. سونىمەن قاتار بيىل تۇماۋعا قارسى ەگىلگەندەردىڭ سانى ارتقان كورىنەدى. ماسەلەن, 2016 جىلى 250 ادام باس تارتسا, 2018 جىلدىڭ 8 ايىندا 2220 ادام ءوزىنىڭ پىكىرىن وزگەرتىپ, ۆاكتسينانى ەككىزگەن. اتاپ ايتارلىعى, ەپيدەميولوگيالىق ماۋسىمعا دايىندىق الدىندا ەلىمىزدەگى بارلىق ەمحانالار جۇمىس كۇندەرىن 20.00-گە دەيىن ۇزارتادى. ال دەمالىس كۇندەرى كەزەكشى دارىگەرلەر ناۋقاستاردى قابىلدايدى.
