ول حاتتا نە جازىلعان؟
بىرەر اپتا بۇرىن قوس كورەيا اراسىندا وتكەن سامميتتە كيم چەن ىن اقش پرەزيدەنتى دونالد ترامپقا مۋن چجە ين ارقىلى حات جولداعان. ونى وقىپ شىققان اقش باسشىسى ءوز ريزاشىلىعىن ءبىلدىردى.
– كيم چەن ىن سولتۇستىك كورەيانىڭ بولاشاعىنان زور ءۇمىت كۇتىپ وتىر. ونىڭ باستى ماقساتى – كورەي تۇبەگىن يادرولىق قارۋدان ارىلتىپ, مەملەكەتتىڭ ەكونوميكالىق دامۋىنا كوڭىل ءبولۋ. قازىر بۇل ەل دۇرىس باعىتتا ءجۇرىپ بارادى. بۇرىنعىداي وڭدى-سولدى زىمىرانداردى سىناقتان وتكىزۋدى توقتاتتى. سىناق پوليگوندارىنىڭ بەلگىلى ءبىر بولىگى جابىلدى. دەگەنمەن كحدر يادرولىق قارۋدان تولىعىمەن تازارمايىنشا, سانكتسيالار ءوز كۇشىندە قالادى. ال ءبىز ەكىنشى سامميت وتكىزۋدى اسىعا كۇتىپ وتىرمىز. بۇل جاقىن ۋاقىتتا بولۋى مۇمكىن, – دەدى دونالد ترامپ.
ايتا كەتەيىك, اقش پەن كحدر اراسىنداعى العاشقى تاريحي سامميت وسى جىلدىڭ ماۋسىم ايىندا سينگاپۋردە وتكەن.
يران قارسى سوققى بەردى
تەگەران احۆازدا قاندى شابۋىل ۇيىمداستىردى دەگەن ايىپپەن سيرياداعى راديكالدى توپتاردى بالليستيكالىق زىمىراندارمەن اتقىلادى.
يراننىڭ Fars اقپارات اگەنتتىگىنىڭ حابارلاۋىنشا, سوققىنىڭ ناتيجەسىندە سيريانىڭ شىعىسىنداعى البۋ-كامال لاگەرىندە بىرنەشە سودىردىڭ كوزى جويىلدى.
ايتا كەتەيىك, بىرەر اپتا بۇرىن يراننىڭ احۆاز قالاسىنداعى اسكەري شەرۋ كەزىندە سودىرلار شابۋىل جاسادى. سالدارىنان 28 ادام قازا بولسا, 60-تان استامى ءتۇرلى دەڭگەيدە جاراقات العان. كوپ ۇزاماي قاندى ارەكەتتى سيرياداعى «ال-احۆازيا» مەن دايش توپتارى ءوز موينىنا العان. وسىدان كەيىن يران ۇكىمەتى قىلمىستىق ۇيىمدارعا قارسى سوققى بەرىلەتىنىن حابارلاعان بولاتىن.
تسۋنامي 1200 ادامدى سۇلاتتى
يندونەزيانىڭ سۋلاۆەسي ارالىندا قۋاتى 7,7 بالدى قۇرايتىن جەر سىلكىنىسى بولىپ, ارتى تسۋناميگە ۇلاستى. سالدارىنان 1200-دەن اسا ادام قازا بولسا, مىڭداعان تۇرعىن زارداپ شەكتى.
Reuters اگەنتتىگىنىڭ حابارلاۋىنشا, ءبىراز ادام ۇيىندىلەر استىندا قالعان. سول سەبەپتى قازا بولعاندار سانى الداعى ۋاقىتتا ارتۋى مۇمكىن. قازىرگى ۋاقىتتا اپات اۋماعىندا ەرىكتىلەر مەن ارنايى قۇرىلعان توپ قۇتقارۋ جۇمىستارىن جۇرگىزىپ جاتىر.
قۋاتتى ءزىلزالا سوڭى بيىكتىگى ەكى مەتردەن اساتىن سۋ تاسقىنىنا ۇلاستى. ناتيجەسىندە ايماقتاعى مىڭداعان ءۇي مەن اۋرۋحانالار, ءتۇرلى عيماراتتار قيراپ قالدى.
ايتا كەتەيىك, يندونەزيا تابيعي اپاتتار ءجيى بولاتىن ەلدەردىڭ بىرىنە جاتادى. ماسەلەن, 2004 جىلى 9,1 بالدى جەر سىلكىنىسى مەن سۋ تاسقىنىنان باس-اياعى 220 مىڭ ادام قازا بولعان.
