«استانا وپەرا» تەاترىندا اتالمىش تەاتر مەن قىتاي ۇلتتىق وپەرا تەاترىنىڭ بىرلەسكەن جوباسى – دجاكومو ءپۋچچينيدىڭ «تۋراندوت» وپەراسىنىڭ پرەمەراسى ءوتتى. ديريجەرلىك ءپۋلتتى ايگىلى ماەسترو, قر ەڭبەك سىڭىرگەن قايراتكەرى, وپەرانى قويۋشى ديريجەر الان بورىباەۆ باسقاردى. جوبا ەلوردانىڭ 20 جىلدىعىنا وراي قر مادەنيەت جانە سپورت مينيسترلىگىنىڭ قولداۋىمەن جۇزەگە استى. پرەمەراعا اۆستريالىق سوپرانو مارتينا سەرافين مەن بولگار تەنورى كامەن چانەۆ قاتىستى.
«كالافتىڭ پارتياسىن الەمنىڭ قانشاما ساحنالارىندا سان رەت ورىندادىم. بۇل ءرول تەحنيكالىق تۇرعىدان العاندا كۇردەلى. ەڭ الدىمەن اكتەرلىك شەبەرلىكپەن جوعارى دەڭگەيدە ورىنداۋ ءۇشىن ەموتسيونالدىق جاعىنان دايىندالۋ كەرەك. مۇندا ليۋدىڭ كالافقا دەگەن ەرەكشە ماحابباتى ويدان شىعارىلعان وقيعا ەمەس. ليۋ مەن تۋراندوت پارتيالارىن ورىنداۋشىلار, تانىمال قازاقستاندىق ارتىستەر مايرا مۇحامەدقىزى, جاننات باقتاي جانە جۇپار عابدۋللينامەن بىرگە دۋەت ورىنداۋ مەن ءۇشىن ۇلكەن مارتەبە ءارى زور قۋانىش» دەيدى كامەن چانەۆ.
وپەرانىڭ سيۋجەتى قاتىگەز تۋراندوت حانشايىم مەن كالاف حانزادا اراسىنداعى ماحاببات وقيعاسىنا نەگىزدەلگەن. قىز وزىنە ءسوز سالا كەلگەن كۇيەۋ جىگىتتەردى سىناپ, ءۇش جۇمباق جاسىرادى. ەگەر ءتۇيىنىن شەشكەن جان بولسا, حانشايىم ونىڭ جارى اتانادى, ال جاۋابىن تاپپاسا, ۇمىتكەر جازاعا كەسىلەدى.
«استانا وپەرا» ساحناسىندا حانزادالاردى جازالاۋ-جازالاماۋ كورىنىستەرىن رەجيسسەر داۆيدە ليۆەرمور اسسيستەنتتەرى سالۆاتورە نيكوسيا جانە دجانكارلو يۋديكا كورديليامەن (يتاليا) بىرگە قويدى. جارىق بويىنشا سۋرەتشى ۆينچەنتسو راپوني (يتاليا) جانە پروەكتسيالار بويىنشا ديزاينەر كارلو كامورالي («D-wok» كومپانياسى). ساحناداعى وقيعالاردى اسەرلى ەتۋگە سوفيا تاسماعامبەتوۆا مەن پاۆەل دراگۋنوۆ ۇلەس قوستى. سونداي-اق, سۋرەتشى ستسەنوگرافتار قويىلىمداعى ەكى جۇزدەن اسا كوستيۋمدى ازىرلەدى.
تۋراندوت حانشايىمنىڭ پارتياسىن مارتينا سەرافين (اۆستريا) جانە قازاقستاننىڭ ەڭبەك سىڭىرگەن قايراتكەرى جۇپار عابدۋللينا ورىندايدى. ليۋ – قازاقستاننىڭ ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى مايرا مۇحامەدقىزى مەن قازاقستاننىڭ ەڭبەك سىڭىرگەن ءارتىسى جاننات باقتاي. كالاف – كامەن چانەۆ (بولگاريا).
امانعالي قالجانوۆ
