ءيا, دۇنيەدەن تاعى ءبىر جاقسى ادام ءوتتى. ول – بەلگىلى جۋرناليست, اقجارقىن ازامات ايتقادىر تىلەۋوۆ.
ايتقادىر ءشامشىۇلى – ۇلت ۇياسى اتانعان ۇلىتاۋدىڭ پەرزەنتى. جاسىنان قارت اكە-شەشەنىڭ قازاقى تاربيەسىن بويىنا ءسىڭىرىپ وسكەن بالا العىر جىگىت بولىپ ەرجەتەدى. الماتىداعى ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتىنىڭ جۋرناليستيكا فاكۋلتەتىنە وقۋعا ءتۇستى. ونى ويداعىداي تامامداعاننان كەيىن تۋعان جەرىنە ورالىپ, جەزقازعان راديوسىندا, وبلىستىق تەلەارنادا قىزمەت ىستەدى. قاتارداعى تىلشىدەن رەداكتورلىق دەڭگەيگە كوتەرىلدى. ءوڭىردىڭ وزەكتى ماسەلەلەرىن قوزعاپ, جۇرتقا اتى تانىلدى. ەلدىڭ باس ورداسى الماتىدان ارقاعا قونىس اۋدارعاندا, ايتقادىر دا جەزقازعاننان اقمولاعا تابان تىرەدى. بۇگىنگى «استانا اقشامى» گازەتىنە جۇمىسقا ورنالاستى. باسىلىمنىڭ ەكونوميكا ءبولىمىنىڭ مەڭگەرۋشىسى بولدى. جاڭا شاڭىراق تىكتەپ جاتقان باس قالانىڭ تىنىس-تىرشىلىگىن قارا سوزبەن ءوردى. التى جىل بويى وسى گازەتتە تابان اۋدارماي ەڭبەك ەتىپ, قالامى جۇيرىك جۋرناليسكە اينالدى. كەيىنگى جىلدارى سىرقاتتانىپ جۇرسە دە ۇكىمەتتىڭ ءباسپاسوز قىزمەتىندە, رەسپۋبليكالىق «ساقشى» گازەتىندە ابىرويلى قىزمەت اتقاردى.
ايتقادىردىڭ بولمىسى دا بەكزات ەدى. ناعىز قازاقتىڭ سىرباز ازاماتى بولاتىن. ۇلكەنگە دە كىشىگە بايىپتى مىنەزىمەن جانى جاقىن تامىرلاس, ەلدەس بولا ءبىلدى. ۇلگىلى وتباسىنىڭ يەسى, ەكى ۇلىنىڭ جاناشىر اكەسى, نەمەرەلەرىنىڭ ارداقتى اتاسى ەدى. امال نە… حالقىمىز «جازمىشتان وزمىش جوق» دەپ بەكەر ايتپاعان. باقۇل بول, اسىل ازامات!
