تۇرعىنداردى تازالىققا ۇندەدى
جانىبەك تارحان كوشەسىندەگى №9 ءۇيدىڭ اۋلاسىندا «تازا اۋلا, تازا كىرەبەرىس» اتتى اكتسيا ءوتتى.
جاستار ساياساتى ماسەلەلەرى باسقارماسىنىڭ قولداۋىمەن ستۋدەنتتىك قۇرىلىس جانە جاستار ەڭبەك جاساقتارى شتابى وسى شارانى جىل سايىن ۇيىمداستىرىپ تۇرادى. بىلتىر كەنەسارى كوشەسىندەگى «كاميننىي» تۇرعىن ءۇي كەشەنى اۋماعى تازالانسا, بيىل قالا تۇرعىندارىنىڭ ءوتىنىشى بويىنشا اكتسيا وتكىزۋ ورنى بولىپ وسى مەكەنجاي تاڭدالىپتى.
تۇرعىنداردى تازالىق ساقتاۋعا شاقىرۋ ماقساتىندا ۇيىمداستىرىلعان بۇل اكتسيا جۇمىسىنا «جاسىل ەل» جاساعىنىڭ قىرىققا جۋىق بەلسەندىسى قىزۋ كىرىسىپ, اۋلانىڭ تەحنيكالىق جانە سانيتارلىق جاعدايىن جاقسارتۋعا بار كۇش-جىگەرىن سالدى. «كوپشىلىك تۇرعىندار ۇيلەرىنە كىرىپ-شىعۋدى عانا ءبىلىپ, اۋلانىڭ جاعدايىنا نازار اۋدارۋدى ۇمىت قالدىرىپ جاتادى. سوندىقتان, بۇل شارا ولارعا ۇلگى بولادى دەگەن ويدامىز» دەيدى اتالعان شتاب توراعاسىنىڭ ورىنباسارى مەرەكە پوشانوۆ.
اكتسيا بارىسىندا ون التى ءتۇپ اعاش اكتەلىپ, ءتۇبى قوپسىتىلدى. 1,3 گەكتار ءارامشوپ جۇلىندى. سونىمەن بىرگە, 700 مەتردەي جول جيەگى اعارتىلىپ, اۋلاداعى قوقىس جينالدى.
ءمادينا جاقىپ