حالىقارالىق مامانداندىرىلعان «ەكسپو 2017» كورمەسىنىڭ باستالۋىنا از ۋاقىت قالدى. سوندىقتان ەلورداداعى قىزمەت كورسەتۋ ساپاسىن ارتتىرۋعا جاردەمدەسەتىن جۇمىستار بارىنشا بەلسەندى جۇرگىزىلۋدە. بۇل ورايدا قوناق ۇيلەر مەن مەيرامحانالاردى دايىنداۋمەن قاتار, شەتەلدىك قوناقتاردى مادەنيەتىمىزبەن تانىستىراتىن كاسىپقوي گيدتەردىڭ بىلىكتىلىگىن كوتەرۋگە دە باسا نازار اۋدارىلادى.
«استانا كونۆەنشن بيۋرو» جشس قىزمەتكەرى اينۇر ءجانابىلوۆانىڭ ايتۋىنشا, قازىر گيدتەر مەن ەكسكۋرسيا جەتەكشىلەرىن «Recommended by EXPO 2017» باعدارلاماسىنا ەنگىزۋ جوسپارلانىپ جاتىر. ياعني, اتالعان ماماندار قىزمەت كورسەتۋ سالاسىنىڭ كاسىپورىندارى سەكىلدى ۇسىنىلاتىن بولادى. جاقىن ارادا بۇل تىزىمگە حوستەلدەر مەن كولىك كومپانيالارى كىرگىزىلەدى.
– گيدتەرگە قويىلاتىن تالاپتار ازىرلەنۋدە. ولار مەملەكەت پەن قالانىڭ تاريحىن, شاھاردىڭ كورىكتى جەرلەرىن جاتقا بىلەتىن, شەت ءتىلىن جەتىك مەڭگەرگەن بولۋى ءتيىس. ءبىز قىتاي ءتىلىن وقىتۋعا ەرەكشە نازار اۋدارىپ وتىرمىز. ويتكەنى, بولجام بويىنشا, قوناقتار وسى ەلدەن كوپ كەلۋى مۇمكىن. بۇدان باسقا, گيدتىڭ بويىندا ءتۋريستى قىزىقتىراتىنداي ارتىستىك قابىلەتى دە بولۋى شارت. جالپى العاندا, گيدتەر ەلوردانىڭ وڭ ءيميدجىن قالىپتاستىرۋعا تىكەلەي ىقپال ەتەدى, – دەيدى اينۇر ءجانابىلوۆا.
بۇگىندە استانادا گيدتەردىڭ كاسىبيلىگىن جوعارىلاتۋ ماقساتىندا ءتۇرلى ترەنينگتەر مەن كەزدەسۋلەر ءوتكىزىلەدى. جيىندارعا عالىمدار, ولكەتانۋشىلار, گەوگرافتار شاقىرىلادى. ولار قالا تۋرالى ەگجەي-تەگجەيلى مالىمەتتەرمەن ءبولىسىپ, تاريحي دەرەكتەردىڭ بۇرمالانباۋىن قاداعالايدى.
كورمەگە دايىندىق اياسىندا بىلتىر ەلوردالىق اۋەجاي مەن تەمىرجول ۆوكزالىندا تۋريستەرگە ارنالعان اقپاراتتىق دۇڭگىرشەكتەر اشىلدى. وندا ءبىرىنشى بولىپ ىرىكتەۋدەن وتكەن گيدتەر قوناقتاردى قارسى الىپ, جاتىن ورىن, تاماقتاناتىن جەرلەر مەن جول ءجۇرۋ تۋرالى اقپاراتتى ۇسىنادى.
بوتاگوز ماراتقىزى
ماتەريالدى «استانا اقشامى» گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.
