«استانا» حالىقارالىق قارجى ورتالىعىنىڭ (احقو) رەسمي اشىلۋ ءراسىمى بيىلعى 5 شىلدەدە وتەدى. بۇل جاڭالىقتى سەيسەنبىدەگى ۇكىمەت وتىرىسىندا احقو-نىڭ باسقارۋشىسى قايرات كەلىمبەتوۆ جاريا ەتتى.
«قازاقستاننىڭ ەلورداسى – استانا قالاسىنىڭ 20 جىلدىعىن اتاپ ءوتۋ اياسىنداعى ءىس-شارالار جوسپارىنىڭ شەڭبەرىندە مەملەكەت باسشىسىنىڭ قاتىسۋىمەن «استانا» حالىقارالىق قارجى ورتالىعىنىڭ رەسمي اشىلۋ ءراسىمىن وتكىزۋ جوسپارلانعان. بۇل تۇساۋكەسەر ءراسىمى ەكسپو اۋماعىنداعى كونگرەسس-ورتالىق عيماراتىندا بيىلعى 5 شىلدەدە وتەدى. راسىمگە قاتىسۋعا ءىرى حالىقارالىق قارجىلىق كومپانيالاردىڭ, دامۋ ينستيتۋتتارىنىڭ, قارجى ۇيىمدارىنىڭ باسشىلارى, اتاپ ايتقاندا, ەۋروپالىق قايتا قۇرۋ جانە دامۋ بانكىنىڭ (ەققدب – ت.ت.) پرەزيدەنتى سۋما چاكرابارتي, Blackstone Group توراعاسى ستيۆەن شۆارتسمان, ازيا ينفراقۇرىلىمدىق ينۆەستيتسيالار بانكىنىڭ پرەزيدەنتى تسزين ليتسيۋن, دۋباي قارجى ورتالىعىنىڭ باسقارۋشىسى يسسا كازيم جانە ت.ب. شاقىرىلدى» دەدى قايرات كەلىمبەتوۆ.
احقو باسقارۋشىسىنىڭ ايتۋىنشا, رەسمي تۇساۋكەسەر الدىندا 13-ءىنشى دۇنيەجۇزىلىك يسلامدىق ەكونوميكالىق فورۋمىن جانە نازارباەۆ ورتالىعىندا احقو-نىڭ قۇقىقتىق ماسەلەلەر بويىنشا العاشقى حالىقارالىق كونفەرەنتسياسىن وتكىزۋ جوسپارلانىپ وتىر. ق.كەلىمبەتوۆ سونداي-اق استانا قالاسىنىڭ كولىكتىك قولجەتىمدىلىگى قارجى ورتالىعىنىڭ دامۋ دەڭگەيىنىڭ باستى كورسەتكىشتەرىنىڭ ءبىرى ەكەنىن اتاپ ايتتى. قارجى ورتالىعىن رەسمي ىسكە قوسقاننان كەيىن بۇل ماسەلە ايرىقشا وزەكتى بولماق. «بۇل ورايدا قازاقستاننىڭ استاناسىن شانحاي, نيۋ-يورك, سينگاپۋر, گونكونگ, توكيو, تسيۋريح سياقتى جانە ت.ب. الەمنىڭ ەڭ ءىرى قارجى ورتالىقتارىمەن تۇراقتى, تىكەلەي اۋە بايلانىستارىمەن قامتاماسىز ەتۋ ەلىمىزدىڭ كاپيتال نارىعىنا شەتەلدىك ينۆەستيتسيالاردى ودان ءارى تارتۋعا قاتىستى مۇمكىندىكتەردى كەڭەيتە تۇسەدى» دەدى ول. ءماجىلىس سوڭىندا ۇكىمەت باسشىسى باقىتجان ساعىنتاەۆ بۇل ماسەلەگە ارنالعان بولەك وتىرىس وتەتىنىن ەسكەرتتى.
تولەن تىلەۋباي
