الماتى مەكتەپتەرىنىڭ وقۋشىلارى ءۇش جىل قاتارىنان ۇلتتىق تەستىلەۋدە ۇزدىك ناتيجە كورسەتىپ كەلەدى. سونىڭ ارقاسىندا ولار رەسپۋبليكا ايماقتارىندا جوعارى كورسەتكىشكە قول جەتكىزۋدە. بۇل تۋرالى الماتىداعى ورتالىق كوممۋنيكاتسيالار قىزمەتىندە وتكەن بريفينگتە قر ءبىلىم جانە عىلىم ءمينيسترى اسلان ءسارىنجىپوۆ ءمالىم ەتتى.
«2-8 ماۋسىم ارالىعىندا 155 ورىندا وتكەن ۇبت-عا 87600 ءبىتىرۋشى نەمەسە ولاردىڭ 95% قاتىستى. ءجۇز بالدان جوعارى ناتيجەنى 13100 تالاپكەر نەمەسە 15% كورسەتتى. وتكەن جىلى جۇزدەن جوعارى بالل جيناعاندار 12% قۇراسا, ول بۇگىندە 3%-عا ارتقان. ەڭ جوعارعى 125 ۇپايدى 4 وقۋشى يەلەندى», – دەدى ۇبت-نىڭ قورىتىندىسىنا ارنالعان جيىندا ءبىلىم ءمينيسترى.
ءمينيستردىڭ ايتۋىنشا, اپەللياتسياعا 402 سۇراق كەلىپ تۇسكەن. 14 ماۋسىمعا دەيىن ونىڭ 64 سۇراعى قاناعاتتاندىرىلعان.
ال, شەكتىك 50 بالدى 20200 تالاپكەر نەمەسە 23% جيناي الماعان. وتكەن جىلى شەكتىك باللدى 27,5 مىڭ وقۋشى نەمەسە 28% جيناي الماعان بولاتىن. دەمەك, كورسەتكىش 5%-عا جاقساردى دەۋگە بولادى.
جالپى, مينيسترلىكتىڭ بەرگەن ماعلۇماتى بويىنشا رەسپۋبليكادا ورتاشا بالل 2,4 باللعا ارتقان.
«بۇل كورسەتكىشتى ۇبت-عا دايىندىقتىڭ جاقسارعانىنىنىڭ دالەلى رەتىندە قاراستىرۋعا بولادى. ەگەر, وتكەن جىلى ورتاشا بالل 74,5 باللدى قۇراسا, بيىل ول ەلىمىز بويىنشا 76,9-عا جەتتى», – دەدى اسلان ءسارىنجىپوۆ.
– ۇلتتىق بىرىڭعاي تەستىلەۋ قورىتىندىسى بويىنشا, قالا مەن اۋىل اراسىنداعى ايىرماشىلىق الى دە 10 بالل كورسەتكىشىندە ساقتالىپ كەلەدى دەدى مينيستر.
«وبلىستاردى جەكە قاراستىراتىن بولساق, بارلىق ءوڭىردىڭ ناتيجەسى بيىل جاقسارعان. ءبىرىنشى ورىندا الماتى قالاسىنىڭ تۇلەكتەرى تۇر. بيىلعى كورسەتكىش 92,6 بالل, وتكەن جىلى بۇل 86,7 باللدى قۇراعان. ەكىنشى ورىنعا 87,5 باللمەن استانا قالاسى ورنالاستى. ءۇشىنشى ورىندا – اقتوبە وبلىسى. ودان كەيىن باتىس قازاقستان, اقمولا, قوستاناي وبلىستارى سايكەسىنشە ورنالاسقان», – دەدى قر ءبىلىم جانە عىلىم ءمينيسترى.
ونىڭ ايتۋىنشا, ۇبت قورىتىندىسى بويىنشا ورتاشا بالل قالادا دا, اۋىلدا دا وسكەن. بىراق, قالا مەن اۋىل اراسىنداعى 10 بالل ايىرماشىلىق ءالى دە ساقتالىپ كەلەدى.
«وتكەن جىلى قالاداعى ورتاشا بالل 79 بولسا, بيىل 81,5 بالل, ال اۋىلدا بىلتىر بۇل كورسەتكىش 70,3 بالدى قۇراعان بولسا, بيىل ورتاشا بالل – 72,19», – دەدى اسلان ءسارىنجىپوۆ.
