ءماسليحاتتىڭ قۇرىلىس, ەكولوگيا, كولىك, ساۋدا جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسياسىنىڭ قوعامدىق تىڭدالىمى ءوتتى. كۇن ءتارتىبى بويىنشا استانا قالاسى اۋىل شارۋاشىلىعى باسقارماسىنىڭ باسشىسى ارداق دوسانوۆ بايانداما جاساپ, قالاداعى يتتەر مەن مىسىقتاردى اسىراۋ ەرەجەسى تۋرالى مالىمەت بەردى.
ەستەرىڭىزدە بولسا, وتكەن جىلدىڭ قازانىندا ءۇي حايۋاناتتارىن ۇستاۋ ءتارتىبى ءماسليحاتتا قارالعان بولاتىن. سونىڭ ناتيجەسىندە قولدانىستاعى ەرەجەنىڭ تالاپتارىن جەتىلدىرۋ جونىندە دەپۋتاتتار تاراپىنان ۇسىنىستار ايتىلىپ, قايتا قاراۋعا جىبەرىلگەن ەدى. بۇگىنگى قوعامدىق تىڭدالىمدا وسى قۇجات قايتا كوتەرىلىپ, كوپشىلىك تالقىسىنا ءتۇستى.
اتاپ ايتقاندا, يت يەلەرىنە قاتىستى ناقتى تالاپتار ايقىندالىپ, ۇيدە يت ۇستاۋ, كوپشىلىك جەرلەردە قىدىرتۋعا قاتىستى ەرەجەگە تالاپتارى كۇشەيتىلەتىن بولادى. بايانداماشى حايۋاندارعا قاساقانا قيانات كورسەتكەن, باقىلاۋسىز يتتەردىڭ سانىن كوبەيتىپ, اينالاسىنداعى سانيتارلىق جاعدايدى بۇزعاندارعا جاۋاپكەرشىلىكتى ارتتىرۋ قاجەتتىگىن ايتتى. ءتارتىپ تالابىن بۇزعان جاعدايدا سالىناتىن ايىپپۇل مولشەرى قايتا قارالۋدا ەكەن.
بۇل رەتتە يت يەلەرىنىڭ جاۋاپكەرشىلىگىن ارتتىراتىن شارالار ارقىلى قالاداعى قاڭعىباس يتتەردىڭ سانىن كەمىتۋگە, ولاردىڭ ءتۇرلى اۋرۋ تاراتىپ, قالالىقتارعا قاۋىپ كەلتىرمەۋدىڭ جولىن قاراستىرۋ قاجەتتىگى ايتىلدى.
بۇگىندە «استاناۆەتسەرۆيس» ۇيىمىندا ءۇي حايۋاناتتارىن تىركەۋ جۇرگىزىلەدى.
وندا تىركەلگەن 18 882 ءۇي جانۋارلارىنىڭ 14 مىڭنان استامى يتتەر ەكەن.
ەلورداداعى ءۇي حايۋاناتتارىن ۇستاۋعا قاتىستى وتكەن جىلى 1894 يت پەن مىسىق يەلەرى اكىمشىلىك جاۋاپقا تارتىلىپ, 1,3 ملن تەڭگە ايىپپۇل سالىنعان. حايۋاناتتاردى تىيىم سالىنعان ورىنداردا تۇمىلدىرىقسىز قىدىرتىپ, ومىرگە قاتەر كەلتىرگەن 1760 ادامعا ەسكەرتۋ جاسالىنعان. جىلدام جانە ءتيىمدى ءادىستىڭ ناقتى تەتىگى زاڭنامادا كورسەتىلمەگەن سەبەپتى, ءتارتىپ بۇزعان يت يەلەرىن جاۋاپكەرشىلىككە تارتۋدىڭ امالىنىڭ بوساڭدىعى وسى وتىرىستا كوتەرىلدى.
قوعامدىق تىڭدالىمدا كوتەرىلگەن ماسەلەلەردىڭ ءبىرى يت ۇستاۋ ەرەجەلەرىن ناسيحاتتاۋ ماقساتىنداعى اقپاراتتىق جۇمىستاردىڭ جايى بولدى. ەگەر شەتەلدىك تاجىريبەگە سۇيەنسەك, گەرمانيا سياقتى بىرقاتار ەۋروپا ەلدەرىندە يت ۇستاعانى ءۇشىن ارنايى سالىق تولەيدى. انگليا تۇرعىنى ۇيىندە يت اسىراعىسى كەلسە, ليتسەنزيا الادى, ول ءۇشىن ارنايى دايىندىقتان ءوتىپ, ەمتيحان تاپسىرادى ەكەن.
قوعامدىق تىڭدالىمعا قاتىسقان قالالىق كينولوگيالىق ۇيىمداردىڭ وكىلدەرى قاڭعىباس يتتەردى اۋلاۋ كەزىندە قاتىگەزدىكپەن ەمەس, جۇمىستى وركەنيەتتى جولمەن ۇيىمداستىرۋ قاجەتتىگىنە ءمان بەردى.
ايگۇل ۋايسوۆا
