ۇكىمەت دەلەگاتسياسى اقتوبەدە بولدى
كەشە قازاقستان رەسپۋبليكاسىنىڭ پرەمەر-ءمينيسترى كارىم ءماسىموۆ باستاعان ۇكىمەت دەلەگاتسياسى اقتوبە قالاسىندا جۇمىس ساپارىمەن بولدى.
ساپار بارىسىندا ۇكىمەت باسشىسى 5 ماۋسىمداعى لاڭكەستىك ارەكەت سالدارىنان قازا بولعانداردىڭ وتباسىلارىنا باردى. اتاپ ايتساق, مەرحان تاجىباەۆتىڭ, ميحايل ماتروسوۆتىڭ, نيكولاي ونيششەنكونىڭ جانە اندرەي ماكسيمەنكونىڭ شاڭىراقتارىنا باس سۇعىپ, مارقۇمداردىڭ تۋىستارىنا كوڭىل ايتتى. سونداي-اق, كارىم ءماسىموۆ جەدەل مەديتسينالىق جاردەم اۋرۋحاناسىندا بولىپ, تەررورلىق اكتىدەن زارداپ شەككەن ازاماتتارمەن كەزدەستى. ولاردى قۇتقارۋعا قاتىسقان مەديتسينالىق قىزمەتكەرلەرگە العىس حاتتار تابىستادى.
بۇدان سوڭ پرەمەر-مينيستر «باتىس-2» شاعىن اۋدانىندا بولىپ, 200 پاتەرلى تۇرعىن ءۇيدىڭ جانە 320 ورىندىق بالاباقشانىڭ قۇرىلىسىمەن تانىستى. بالاباقشا مەملەكەتتىك-جەكەمەنشىك ءارىپتەستىك تەتىگى اياسىندا سالىنىپ جاتقانىن ايتا كەتكەن ءجون. مەكتەپكە دەيىنگى مەكەمە جاڭا ويىن الاڭقايلارىمەن جانە زاماناۋي جابدىقتارمەن قامتاماسىز ەتىلگەن. جوبانىڭ جالپى قۇنى – 1 ميلليارد تەڭگە.
ءوڭىر باسشىلارى كارىم ماسىموۆكە تۇرعىن ءۇي باعدارلاماسى مەن مەملەكەتتىك-جەكەمەنشىك ارىپتەستىك جوبالارىن جۇزەگە اسىرۋ پروتسەسى تۋرالى مالىمدەدى. وبلىس اكىمدىگىنىڭ مالىمەتىنە سايكەس, پرەزيدەنتتىڭ باستاماسىمەن بيىلعى جىلى وڭىردەگى تۇرعىن ءۇي قۇرىلىسىنا ۇلتتىق قوردان 19,2 ميلليارد تەڭگە بولىنگەن.
اقتوبە قالاسىنىڭ جۇمىسپەن قامتۋ ورتالىعىن ارالاۋ كەزىندە ۇكىمەت باسشىسى «جۇمىسپەن قامتۋدىڭ جول كارتاسى – 2020» باعدارلاماسىن جۇزەگە اسىرۋ ىسىمەن جانە «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ قىزمەتىمەن تانىستى.