«ازبۋكا جيليا» كومپانياسىنىڭ «Expo Town» تۇرعىن ءۇي كەشەنىنە اقشاسىن سالعان ۇلەسكەرلەردىڭ ءۇمىتى قايتا وياندى. قۇرىلىس الاڭىنداعى قىزۋ جۇمىستاردى كوزبەن كورگەن تۇرعىندار ارنايى باسقوسۋ وتكىزىپ, قالا بيلىگىنە العىس ايتتى.
الاياقتارعا الدانعان ۇلەسكەرلەر بىرنەشە جىلدان بەرى قالالىق اكىمدىكتىڭ تابالدىرىعىن توزدىرۋمەن كەلدى. ەلىمىزدىڭ ءار وبلىسىنان كەلگەن تۇرعىندار «Expo Town» تۇرعىن ءۇي كەشەنىنە بار اقشاسىن سالىپ, سوڭىندا سان سوعىپ قالعان. كومپانيا باسشىلىعى بار اقشانى قالتاعا باسىپ, ءبىر كۇندە شەتەل اسىپ كەتكەنىن ەل ۇمىتقان جوق.
سونداي ۇيلەردىڭ ءبىرى – «Expo Town». «ەكسپو-2017» حالىقارالىق كورمەسىنە جاقىن ورنالاسقان كەشەن وسى ۋاقىتقا دەيىن بوس جەر كۇيىندە تۇردى. تىعىرىقتان شىعۋدىڭ جولى قالا اكىمىنىڭ ءبىرىنشى ورىنباسارى, ۆەدومستۆوارالىق كوميسسيانىڭ توراعاسى سەرگەي حوروشۋننىڭ قاتىسۋىمەن وتكەن وتىرىستا شەشىمىن تاپقان.
«استانا قالاسى اكىمدىگىنىڭ ۇسىنىسىمەن الدانعان ۇلەسكەرلەر بىرىگىپ, تۇرعىن ءۇي كووپەراتيۆىن قۇردىق. ودان كەيىن قالالىق پروكۋراتۋراعا ءوتىنىش-حات جولدادىق. سوت شەشىمىمەن قۇرىلىسى اياقسىز قالعان نىسان ۇلەسكەرلەردىڭ پايداسىنا شەشىلدى. ارمەن قاراي ءوز بەتىمىزشە قۇرىلىستى جۇرگىزەتىن ينۆەستورلار تاپتىق. شىنىن ايتقاندا, «ەكسپو تاۋن ۋسپەح» دەپ اتالاتىن كووپەراتيۆىمىز سوڭىنا دەيىن كۇرەستى. تالاي رەت سوت وتىرىسىنا قاتىستىق, تالاي رەت پروكۋراتۋراعا شاعىمداندىق. جوعارى سوتقا دەيىن كومەك سۇرادىق. ناتيجەسىندە, قۇرىلىس قارقىن الىپ, بۇگىندە ءۇش قاباتى كوتەرىلدى. «Expo Town» دەگەن اتاۋدى «ۆەنسكي كۆارتال» دەپ قايتا اتادىق. بۇل – ءبارىمىزدىڭ ورتاق جەڭىسىمىز. بارلىق ۇلەسكەرلەردىڭ اتىنان استانا قالاسىنىڭ اكىمدىگىنە العىس ايتامىز» دەيدى كووپەراتيۆ ءتورايىمى ولگا ليگاي.
ايتا كەتەيىك, ەلىمىزدە «تۇرعىن ءۇي قۇرىلىسىنا ۇلەستىك قاتىسۋ تۋرالى» جاڭا زاڭ قابىلداندى. اتالعان قۇجات ۇلەسكەرلەردىڭ قۇقىقتارى مەن مۇددەلەرىن قورعايدى. اتالمىش زاڭ بويىنشا ەندى كوپقاباتتى ءۇيدى تۇرعىزباس بۇرىن تۇرعىن ءۇي قۇرىلىسىنا كەپىلدىك بەرۋ قورىنىڭ كەپىلدىگىن الۋ, جوباعا ەكىنشى دەڭگەيدەگى بانكتىڭ قاتىسۋى, ۇلەسكەرلەردىڭ اقشاسىن تۇرعىن عيماراتتىڭ قاڭقاسى تۇرعىزىلعاننان كەيىن تارتۋ مىندەتتەلگەن. زاڭ جوباسىندا كورسەتىلمەگەن وزگە تاسىلدەرمەن ۇلەسكەرلەردىڭ اقشاسىن تارتۋعا تىيىم سالىندى.
گۇلميرا ايماعانبەت
