باس قالاداعى «قازاقستان» ورتالىق كونتسەرت زالىندا دارىندى ءداستۇرلى ءانشى, قازاقستاننىڭ مادەنيەت قايراتكەرى ەربولات شالدىبەكوۆتىڭ «شىرقا, داۋىسىم» اتتى ءان كەشى بولدى. ۇلتتىق ءداستۇرلى ونەردى ۇلىقتاعان ايتۋلى شارا ايگىلى اقىن, كومپوزيتور كەنەن ازىرباەۆتىڭ تۋعانىنا 135 جىل تولۋىنا ارنالدى.
ەربولات – جەر ءجانناتى – جەتىسۋ انشىلىك-جىرشىلىق مەكتەبىنىڭ وكىلى. ونىڭ ورىنداۋىنداعى اندەر ۇلتتىق ناقىشقا باي, جىگەرلى, ءارى اسەم, ءارى اسقاق كەلەدى. تالانتتى ونەرپاز بۇعان دەيىن كوپتەگەن حالىقارالىق, رەسپۋبليكالىق بايقاۋلاردىڭ لاۋرەاتى اتانعان. «مادەني مۇرا» باعدارلاماسى بويىنشا جارىق كورگەن «قازاقتىڭ مىڭ ءانى» جيناعىنا ە.شالدىبەكوۆتىڭ 9 ءانى ەنىپتى.
كەشتە ءانشى ءسۇيىنباي, جامبىل, كەنەن اتالارىمىزدىڭ تولعاۋلارى مەن اندەرىن شىرقاپ, ءداستۇرلى ونەرگە سۋساپ قالعان تىڭدارمانداردى ءتانتى ەتتى. سونداي-اق ول كەنەن ازىرباەۆتىڭ «شىرقا, داۋىسىم, «تۋعان جەر», «جاس ەكپىن» دەگەن اندەرىن «استانا سازى» ەتنوفولكورلىق ءانسامبلىنىڭ سۇيەمەلدەۋىمەن ورىندادى. سونىمەن بىرگە كونتسەرت بارىسىندا بەلگىلى كۇيشى جانعالي ءجۇزباي, ءانشى ارداق بالاجانوۆا جانە ەربولاتتىڭ شاكىرتتەرى دە ونەر كورسەتىپ, كەشتىڭ شىرايىن كەلتىردى.
