ەلوردا اكىمدىگىنىڭ باسىمدىلىق بەرىلگەن مىندەتتەرىنىڭ ءبىرى – مۇگەدەك بالالاردى اسىراپ وتىرعان وتباسىلارعا كومەك كورسەتۋ. مۇنداي وتباسىلاردى مەملەكەت قانداي جەڭىلدىكتەرمەن قامتاماسىز ەتەدى جانە ولاردىڭ اتا-انالارىنىڭ, قامقورشىلارىنىڭ, اسىراۋشىلارىنىڭ قۇقىعى قانداي – بۇگىنگى «كەرەك كەڭەس» وسى تاقىرىپقا ارنالعان.
مۇگەدەك بالالاردى اسىراپ وتىرعان اتا-انالارعا, قامقورشىلارعا, اسىراۋشىلارعا بالانى كۇتۋ بويىنشا جاردەماقى بەلگىلەنەدى. اتالعان جاردەماقى ءوتىنىش تۇسىرىلگەن كۇننەن باستاپ بەلگىلەنەدى. سونداي-اق 2018 جىلدىڭ 1 شىلدەسىنەن باستاپ جاڭا جاردەماقى ءتۇرى ەنگىزىلدى – بالا كۇنىنەن ءى توپ مۇگەدەكتەرىن اسىراعانى ءۇشىن جاردەماقى.
جاسى بويىنشا زەينەتاقى
«زەينەتاقىمەن قامتاماسىز ەتۋ تۋرالى» قر زاڭىنا سايكەس, مۇگەدەك بالالاردىڭ انالارى 58 جاسقا تولعاندا زەينەتكەرلىككە شىعۋعا قۇقىلى.
بەس جانە ودان كوپ بالا تاپقان جانە ولاردى 8 جاسقا دەيىن تاربيەلەپ وسىرگەن انالارعا ودان ەرتە جاستا, ياعني 53 جاسقا تولعاننان باستاپ زەينەتكەرلىك تاعايىندالادى.
بۇل جاعدايدا ولارعا زەينەتاقى تاعايىنداۋ ءۇشىن جەڭىلدىكتەر بەلگىلەنەدى, وعان ەسەپتەلەتىن:
• جۇمىس ىستەمەيتىن انالاردىڭ ءار بالا ءۇش جاسقا تولعانعا دەيىن كامەلەتكە تولماعان بالالاردى كۇتۋ ۋاقىتى, جالپى العاندا, 12 جاسقا دەيىن;
• اتوم سىناقتارى, ەكولوگيالىق اپاتتار سالدارىنان نەمەسە يممۋن تاپشىلىعى ۆيرۋسىن جۇقتىرعان نەمەسە جيتس-پەن اۋىرعان مۇگەدەك بالالاردى 16 جاسقا دەيىن باققان ۋاقىتى;
• I توپتاعى مۇگەدەكتەردى باققان ۋاقىتى.
ازاماتتاردىڭ باسقا ساناتتارىنا, ونىڭ ىشىندە مۇگەدەك بالالاردىڭ انالارىنا زەينەتاقى جاسىن تومەندەتۋ قاراستىرىلماعان.
ساۋىقتىرۋ
«قر-دا مۇگەدەكتەردى الەۋمەتتىك قورعاۋ تۋرالى» زاڭعا سايكەس, ساۋىقتىرۋ الەۋەتىنە ساي, ءاربىر مۇگەدەككە مەديتسينالىق, الەۋمەتتىك جانە كاسىبي تۇرعىدان ساۋىقتىرۋدىڭ جەكەلەگەن باعدارلاماسى جاسالادى.
ساۋىقتىرۋدىڭ جەكەلەگەن باعدارلاماسىنا سايكەس, مۇگەدەكتەر جەرگىلىكتى بيۋدجەت قارجىسى ارقىلى الەۋمەتتىك قولداۋدىڭ قوسىمشا تۇرلەرىمەن قامتاماسىز ەتىلەدى (مۇگەدەكتەر ارباسىمەن, پروتەز-ورتوپەديالىق بۇيىمدارمەن, تيفلوتەحنيكالىق جانە سۋردوتەحنيكالىق, مىندەتتى گيگيەنالىق قۇرالدارمەن, ساناتوريالىق-كۋرورتتىق ەممەن, جەكە كومەكشى قىزمەتىمەن, جەست ءتىلى مامانىمەن).
ءبىلىم الۋداعى جەڭىلدىكتەر
I جانە II توپتاعى مۇگەدەكتەر مەن مۇگەدەك بالالار ءۇشىن ورتا كاسىبي جانە جوعارى كاسىبي ءبىلىم بەرەتىن ءبىلىم بەرۋ مەكەمەلەرىنە وقۋعا ءتۇسۋ ءۇشىن 0,5 پايىز مولشەرىندە كۆوتا قاراستىرىلعان.
مەملەكەتتىك تاپسىرىس نەمەسە گرانت بويىنشا ورتا كاسىبي جانە جوعارى كاسىبي ءبىلىم بەرەتىن ءبىلىم بەرۋ مەكەمەلەرىندە وقيتىن مۇگەدەكتەرگە شاكىرتاقىمەن قامتاماسىز ەتۋ بويىنشا جەڭىلدىكتەر بەرىلەدى.
