ۇبت اتتى ۇلى دۇرمەك تە بيىلعى ەلوردالىق تۇلەكتەر ءۇشىن اياقتالدى. «تويدىڭ بولارىنان بولادىسى قىزىق» دەمەكشى, كەيبىرەۋى – جىلداپ, كەيبىرەۋى ايلاپ ازىرلەنگەن بۇل سىناق نەبارى ون كۇننىڭ ىشىندە ءوتتى دە كەتتى.
بيىل نۇر-سۇلتان قالاسى بويىنشا 6274 بالا مەكتەپ بىتىرگەن ەدى. ونىڭ ىشىندە 294 تۇلەك «التىن بەلگى» يەلەنگەن بولاتىن. بۇل ماراپات تەك مەكتەپ تاراپىنان بەرىلەتىنىن, ياعني ونىڭ ۇبت ناتيجەسىنە ەش قاتىسى جوقتىعىن ەسكەرسەك, ونى ولجالاعان ۇل-قىزداردىڭ تەستىلەۋ كەزىندە قانشالىقتى جوعارى بالل جيناعانىن بىلۋگە دەگەن قىزىعۋشىلىقتىڭ تۋى دا زاڭدى. ارينە, 294 تۇلەكتىڭ تۇگەلى بىردەي تەستكە قاتىسقان جوق. ويتكەنى ارالارىندا وتاندىق نەمەسە شەتەلدىك جوعارى وقۋ ورىندارىنان شاقىرتۋ الىپ قويعاندارى جەتەرلىك. ال قاتىسقاندارى قانشالىقتى ساي بولدى مەكتەپ ارتقان ۇمىتكە؟
وسى جىلى استانادا «التىن بەلگى» بويىنشا العا شىققان وقۋ ورداسى №1 مەكتەپ-ليتسەي بولدى. وندا 16 تۇلەك اتالعان ءتوس بەلگىنى العان. مەكتەپ ديرەكتورىنىڭ وقۋ ءىسى جونىندەگى ورىنباسارى گۇلجان داۋلەتبەكوۆانىڭ ايتۋىنشا, ولاردىڭ تەك 8-ءى ۇبت-عا قاتىسىپتى.
– تۇلەكتەرىمىز جامان ناتيجە كورسەتكەن جوق. «التىن بەلگى» العاندار كورسەتكىشتەرىنىڭ ەڭ تومەنى – 90, ەڭ جوعارىسى 115 بالل, – دەيدى ول.
№48 مەكتەپتەن 13 شاكىرت «التىن بەلگىگە» قول جەتكىزگەن-ءدى, بۇل – ەلوردا مەكتەپتەرى بويىنشا ەكىنشى ورىن. سول 13 وقۋشى ۇبت-دا 91 مەن 133 اراسىندا بالل جيناعان. جالپى, «التىن بەلگىلىكتەردىڭ» ءوزى تەستىلەۋ سۇراقتارىنىڭ وقۋ باعدارلاماسىنا ساي بولعانىن ايتادى. ماسەلەن, №48 مەكتەپتىڭ تۇلەگى, «التىن بەلگى» يەگەرى اقساۋلە بايعازى وزىنە كەلگەن سۇراقتاردىڭ ىشىندە بۇرىن مۇلدە كەزدەسپەگەن تاقىرىپ بولماعانىن جەتكىزدى. ويىنداعى بالىن ەنشىلەگەن جاس تۇلەك ەندى ەۋرازيا ۇلتتىق ۋنيۆەرسيتەتىنىڭ جۋرناليستيكا فاكۋلتەتىنە تۇسۋگە تالاپتانىپ وتىر.
ۇبت سۇراقتارىنىڭ جالپى سانى – 140. سوندا 90-نىڭ اينالاسىنداعى بالدى جيناعان تۇلەكتەر جالپى سۇراقتىڭ شامامەن 65 پايىزىن عانا ەڭسەرگەن بولىپ تۇر. مەكتەپ باعدارلاماسىن تۇگەلدەي ۇزدىك مەڭگەرگەنى ءۇشىن «التىن بەلگى» العان بالالاردىڭ ەڭ باستى قورىتىندى سىناقتا وسىنداي ناتيجە كورسەتۋى قانشالىقتى قيسىندى؟
وسى ماسەلەگە وراي الەۋمەتتىك جەلى قولدانۋشىلاردىڭ اراسىندا ساۋالناما جاساعانبىز.
– ون ءبىر جىل بويى وزات وقىعان بالاعا «التىن بەلگى» بەرگەندە تۇرعان نە بار؟! ۋنيۆەرسيتەتكە ءتۇسۋ كونكۋرسىندا ءبارىبىر ونىڭ ماڭىزى جوق. ياعني ۇبت كەزىندە تۇلەكتەردىڭ بارلىعى بىردەي ءادىل بايقاۋعا تۇسەدى. «التىن بەلگى» بىرەۋدىڭ الدىن وراپ كەتتى دەگەن سەكىلدى اڭگىمەلەر بولمايدى, – دەيدى ءوزىن ريشات امانجولوۆ دەپ تانىستىرعان ازامات.
الايدا وسى جەردە بالانىڭ پسيحولوگيالىق جاعدايى ءسال ۇمىت قالىپ تۇرعان سياقتى. «التىن بەلگى» العان بالادا ۇبت قارساڭىنداعى سترەستىڭ باسقالاردان بىرنەشە ەسە كوپ بولاتىنى بەلگىلى. ەرتەڭگى كۇنى تومەن بالل جيناسا, مۇنىسى ءۇشىن قۇرداستارىنان, مۇعالىمدەرىنەن ۇيالىپ, ىڭعايسىز كۇيگە ءتۇسۋى مۇمكىن. ءبىز مۇندا ساتسىزدىكتىڭ كەسىرىنەن بولاتىن ءبىردى-ەكىلى وقيعالاردى ايتىپ وتىرعان جوقپىز. ماسەلە – مەكتەپتەردىڭ «قازانشىنىڭ ءوز ەركى قايدان قۇلاق شىعارساعا» سالىپ, تۇلەكتەرىنە توپىرلاتىپ «التىن بەلگى» تاعۋىندا. ال وقۋشى ساباقتى ۇزدىك وقىسا, نەگە «التىن بەلگى» الماسقا دەيسىز بە؟ بۇل تۇستا شاكىرتتى «ۇزدىك» دەپ باعالاعان وقۋ جۇيەسىندە كىناراتتىڭ بار ەكەنى بايقالادى.
