بيىل ورىستىڭ ۇلى اقىنى الەكساندر پۋشكيننىڭ تۋعانىنا 220 جىل تولىپ وتىر. سوعان وراي ەلورداداعى اقىن ەسكەرتكىشى الدىندا رەسەي عىلىم جانە مادەنيەت ورتالىعىنىڭ ۇيىتقى بولۋىمەن كورنەكتى تۇلعانىڭ مەرەيتويىنا ارنالعان پوەزيا وقۋلارى مەن فلەشموب ۇيىمداستىرىلدى.
بۇل شاراعا م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ قازاقستان فيليالىندا وقيتىن ستۋدەنتتەر, مەكتەپ وقۋشىلارى, سۋرەتكەر شىعارماشىلىعىن ءسۇيىپ وقيتىن قالا تۇرعىندارى قاتىسىپ, اقىن ولەڭدەرىن وقىدى.
قازىر پۋشكين مۇراسىن زەرتتەۋ الەمدىك دەڭگەيگە كوتەرىلگەن. قازاق قالامگەرى, بەلگىلى عالىم ساۋىتبەك ابدراحمانوۆ «ءبىزدىڭ پۋشكين» اتتى ەڭبەگىندە: «اقىن مۇراسىنىڭ مۇقيات زەرتتەلگەنى سونداي, ەگەر قازىر پۋشكيننىڭ اكادەميالىق باسىلىمدارىنداعى ءبىر ءسوزدى تۇزەتىپ جازۋدىڭ قاجەتتىگىن دالەلدەگەن ءبىر ماقالا جاريالانا قالسا, ول ادەبيەتتانۋ الەمىندە اشىق كۇنگى نايزاعايداي وقيعا بولار ەدى» دەپ جازادى. جالپى, اقىننىڭ تويى باس قالادا عانا ەمەس, باسقا دا شاھارلاردا باستالدى. وسى كۇنى «پۋشكين قازاقستاندى شارلايدى» دەگەن اكتسيا ۇيىمداستىرىلدى.
«ءبىز بۇل شارانى جاستار ءۇشىن قىزىقتى وتكىزىپ وتىرمىز. ويتكەنى اقىننىڭ تۋعان كۇنى باسقا ەلدەردەگى شارالارعا ۇقساماسا دەپ ويلادىق. بۇگىن الماتى, كوكشەتاۋ, ستەپنوگورسك قالاسىندا دا وسىنداي كەشتەر ءوتىپ, تۇرعىندارعا اقىن مۇراسى كەڭىرەك ناسيحاتتالدى» دەدى رەسەي عىلىم جانە مادەني ورتالىعى مادەني باعدارلامالارىنىڭ ۇيلەستىرۋشىسى ولگا سكالچۋك.
