يتاليانىڭ ترەنتينو قالاسىندا وتكەن بۇكىلدۇنيەجۇزىلىك قىسقى ۋنيۆەرسيادا جارىستارىندا قازاقستان ستۋدەنتتەرىنىڭ قۇراماسى جالپىكوماندالىق ەسەپتە 15-ءشى ورىنعا تابان تىرەدى. قۇراما قورجىنىنا 2 التىن, 2 كۇمىس جانە 1 قولا مەدال ءتۇستى.
العاشقى التىن مەدالدى جارىستىڭ ءبىرىنشى كۇنى شاڭعىشى تاتيانا وسيپوۆا جەكەلەي سايىستا جەڭىپ الدى. ەكىنشى التىن جۇلدەنى ەرلەر اراسىندا وتكەن ەستافەتا جارىسىندا مارك ستاروستين, گەننادي ماتۆيەنكو جانە اعايىندى الەكساندر مەن سەرگەي مالىشەۆتار يەلەندى.
كۇمىس مەدالگە شاڭعىشى مارك ستاروستين جەكەلەي سايىستا يە بولسا, حوككەيشى جىگىتتەرىمىز فينالدا كانادا قۇراماسىنا جول بەرىپ, ۋنيۆەرسيادانىڭ كۇمىس جۇلدەگەرى اتاندى. ال بايراقتى جارىستىڭ قولا جۇلدەسىنە ەستافەتا جارىسىندا قاتىسقان قىزدارىمىز ولگا ماندرىكينا, مارينا ماتروسوۆا جانە تاتيانا وسيپوۆا قول سوزدى.
ۋنيۆەرسيادا قورىتىندىسىندا كوماندالىق ءبىرىنشى ورىندا رەسەي قۇراماسى (15 التىن, 16 كۇمىس, 19 قولا), ەكىنشى ورىندى پولشا قۇراماسى (10-10-9), ءۇشىنشى ورىندى وڭتۇستىك كورەيا قۇراماسى (8-9-7) يەلەندى.
