قازاقستان رەسپۋبليكاسىنىڭ پرەمەر-ءمينيسترى كارىم ءماسىموۆ فرانتسيانىڭ استاناداعى ەلشىلىگىنە بارىپ, نيتستسادا ورىن العان تەررورلىق وقيعاعا بايلانىستى فرانتسيا حالقىنىڭ قايعىسىنا ورتاقتاسىپ, كوڭىل ايتتى. وسى وقيعا كەزىندە 4 قازاقستاندىق وپات بولدى.
ۇكىمەت باسشىسى كارىم ءماسىموۆ قازا تاپقان قازاقستاندىقتاردىڭ تۋعان-تۋىستارىنا قايعىرىپ, كوڭىل ايتاتىنىن جەتكىزدى.
14 شىلدە كۇنى نيتستسادا بولعان لاڭكەستىك ارەكەتتەن ءتورت قازاقستان ازاماتى كوز جۇمدى. ولاردىڭ ىشىندە پاۆلودارلىق وتباسىنىڭ ءۇش بىردەي مۇشەسى – 32 جاستاعى ليۋبوۆ پانچەنكو, 32 جاستاعى مارينا پانچەنكو جانە 2 جاسار سيلۆيا باقيلىق بولدى. سونداي-اق, 57 جاستاعى وتتا ناتاليا قۇربان بولعان.
سىرتقى ىستەر مينيسترلىگى دە نيتستسادا قازا تاپقان قازاقستاندىقتاردىڭ دەنەلەرىن ەلگە جەتكىزۋ ءۇشىن قاجەتتى شارالاردى جاساپ جاتقانىن مالىمدەدى.
نيتستسا جاعالاۋىندا باستيليانى باسىپ الۋ كۇنىن مەرەكەلەپ جاتقان حالىقتى جۇك كولىگى تاپتاپ ءوتىپ, كولىك ىشىنەن وق اتىلعان. بۇل لاڭكەستىك وقيعادا 84 ادام وپات بولىپ, 200-گە جۋىعى اۋىر جاراقاتتانعان.
كەشە سونداي-اق, استانادا نيتستساداعى تەررورلىق ارەكەت قۇرباندارىن ءبىر مينۋت ۇنسىزدىكپەن ەسكە الۋ جاريالاندى. ەلشىلىك قىزمەتكەرلەرى تومەن تۇسىرىلگەن فرانتسيا تۋىنا گۇل شوقتارىن قويدى. «لاڭكەستىك كەزىندە تەك ءبىر عانا ۇلت ەمەس, بىرنەشە ەلدىڭ وكىلى قازا بولدى. ەلىمىزگە شابۋىل جاساۋشىلار ءبىزدى قورقىتا الماق ەمەس» دەدى ءوز سوزىندە فرانتسيانىڭ قازاقستانداعى توتەنشە جانە وكىلەتتى ەلشىسى فرانسيس ەتەن.
