ۇستىمىزدەگى جىلدىڭ 20-سىنشى شىلدەسى كۇنى كەشكى ساعات 20.00-دە «استانا ارەنا» الاڭىندا «استانا» فۋتبول كلۋبى مەن ليتۆالىق «جالگيريس» كوماندالارى اراسىندا قارىمتا ماتچ وتەدى.
وسىعان وراي ماتچ وتەتىن كۇنى 19.00-دەن باستاپ قابانباي باتىر جانە تۇران داڭعىلىنىڭ كەرەي جانىبەك حاندار كوشەسىنەن حۋسەين بەن تالال كوشەسىنە دەيىن جول قوزعالىسى ۋاقىتشا توقتاتىلادى. شەكتەۋ ويىن اياقتالعانعا دەيىن سوزىلادى. «جۇرگىنشىلەرگە وسى مەرزىم ارالىعىندا ورىنبور كوشەسى ارقىلى اينالىپ ءوتۋ قوزعالىسى ۇسىنىلادى. جەرگىلىكتى پوليتسيا قىزمەتى جۇرگىزۋشىلەردەن جولدا مۇقيات بولۋىن جانە جەكە جول كولىكتەرىنەن باس تارتىپ ماتچقا قوعامدىق كولىكتەرمەن بارۋدى سۇرايدى. سونداي-اق, حالىقارالىق اۋەجايعا جول ءجۇرۋدى جوسپارلاعان ازاماتتار مەن سول ماڭايداعى اۋدان تۇرعىندارىنا الدىن الا بالامالى جول قوزعالىسىن جوسپارلاپ الۋدى ۇسىنامىز» دەيدى استانا قالاسى ءىىد جەرگىلىكتى پوليتسيا قىزمەتىنىڭ باستىعى باقىتجان مالىباەۆ.
ەسەسىنە ماتچ وتەتىن ستاديونعا ارنايى رەيستەر ۇيىمداستىرىلماق. بۇل رەيستەرگە «قازاقستان» سك, قالالىق تسيرك, مۇڭايتپاسوۆ اتىنداعى الاڭنىڭ كولىك تۇراقتارىنان, سونداي-اق, «حازىرەت سۇلتان» جانە «نۇر استانا» مەشىتتەرىنىڭ الدىنان وتىرۋعا بولادى. «فۋتبول ماتچىنىڭ جانكۇيەرلەرىن جيناۋ جانە جەتكىزۋ ماقساتىندا جاساقتالعان ارنايى رەيستەر كەشكى 18.00-دەن باس-تاپ جۇرە باستايدى. جول ءجۇرۋ قۇنى ادەتتەگىدەي 90 تەڭگە. 21.30-دان باستاپ كۇشەيتىلگەن رەجيمدەگى تاعى 100 اۆتوبۋس قوساتىن بولامىز. ناقتى ايتار بولساق, 10, 12, 27, 37, 40, 43, 53, 51 سەكىلدى تاعى 8 ءتۇرلى مارشرۋت قاتىنايدى» دەدى «استانا LRT» جشس جولاۋشىلار كولىگى ءبولىمىنىڭ باسشىسى بەيبىت ەسجانوۆ.
بۇركىت نۇراسىل
