مەملەكەت باسشىسىنىڭ توراعالىعىمەن قاۋىپسىزدىك كەڭەسىنىڭ شۇعىل وتىرىسى ءوتتى

وتىرىس بارىسىندا ىشكى ىستەر ءمينيسترى ق.قاسىموۆتىڭ, ۇلتتىق قاۋىپسىزدىك كوميتەتىنىڭ توراعاسى ۆ.جۇماقانوۆتىڭ, سونداي-اق قاۋىپسىزدىك كەڭەسىنىڭ باسقا دا مۇشەلەرىنىڭ الماتى قالاسىنداعى وقيعالارعا قاتىستى باياندامالارى تىڭدالدى.

قازاقستان پرەزيدەنتى قازا بولعاندار مەن زارداپ شەككەندەردىڭ وتباسىلارىنا كوڭىل ايتتى جانە ولارعا مەملەكەتتىك ورگانداردىڭ بارلىق قاجەتتى كومەكتى كورسەتۋىن تاپسىردى.
– بۇگىن الماتىدا, وكىنىشكە قاراي, تاعى دا ادام قۇرباندىعىنا ۇشىراتقان تەررورلىق اكت بولدى. زارداپ شەككەندەر مەن قازا بولعانداردىڭ جاقىندارىنا كوڭىل ايتامىن, ولارعا ءتيىستى پسيحولوگيالىق جانە ماتەريالدىق قولداۋ كورسەتۋ كەرەك. سونداي-اق قۇقىق قورعاۋ ورگاندارىنا قالاداعى قۇقىق ءتارتىبىن قامتاماسىز ەتۋ تۇرعىسىنان بارلىق قاجەتتى شارانى قابىلداۋدى تاپسىرامىن, – دەدى نۇرسۇلتان نازارباەۆ.
مەملەكەت باسشىسى ازاماتتاردى اقپاراتتىق كەڭىستىكتەگى ىقتيمال ارانداتۋشىلىقتارعا بوي الدىرماۋعا شاقىردى.
– قازىر قۇقىق قورعاۋ ورگاندارى جۇمىس ىستەپ جاتىر, قاسكۇنەمدەردىڭ كىم جانە قانداي ماقسات كوزدەگەنىن انىقتاۋدا. جۇرت كوپ جينالاتىن ورىنداردى قورعاپ, جارالانعاندارعا مەديتسينالىق كومەك كورسەتۋ جونىندە جەدەل شارالار قابىلداۋ كەرەك. قىلمىسكەرلەردى انىقتاۋ ءۇشىن شۇعىل تۇردە تولىق تەرگەۋ جۇرگىزۋ قاجەت. سونداي-اق الماتى تۇرعىندارىنا تۇراقتى تۇردە مالىمەت بەرىپ, جالپى قوعامدىق تىنىشتىقتى قامتاماسىز ەتۋ كەرەك. قاۋەسەت تاراتۋشىلاردىڭ اياۋسىز تۇردە جولىن كەسىپ, ارانداتۋشىلاردى انىقتاۋ ماڭىزدى. الماتىداعى جانە رەسپۋبليكاداعى بارلىق ازاماتتار ءتارتىپتى رەتكە كەلتىرۋ ءۇشىن ەڭ قاتاڭ شارالار قابىلدانىپ جاتقانىنا سەنىمدى بولۋعا ءتيىس, – دەدى قازاقستان پرەزيدەنتى.
وتىرىس قورىتىندىسى بويىنشا نۇرسۇلتان نازارباەۆ ىشكى ىستەر مينيسترىنە وقيعا ورنىنا بارۋدى جانە الماتى قالاسىنىڭ اكىمىمەن بىرلەسىپ, قالاداعى جاعدايدى تۇراقتاندىرۋ جونىندە شارالار قابىلداۋدى تاپسىردى.
سونىمەن قاتار مەملەكەت باسشىسى اقپارات جانە كوممۋنيكاتسيالار مينيسترلىگىنە ازاماتتاردىڭ بارلىق ساۋالدارىنا جەدەل جاۋاپ بەرىپ, حالىققا ۋاقتىلى جانە تولىق اقپارات بەرىپ وتىرۋدى تاپسىردى.

akorda.kz