ەلباسى حالىققا جولداۋىندا «… ءبىز ەڭ ۇساق قۇقىق بۇزۋشىلىقپەن, بۇزاقىلىقپەن ىمىراعا كەلمەۋىمىز كەرەك. ويتكەنى وسىنىڭ ءوزى قوعام تىنىشتىعىن بۇزادى, ءومىردىڭ ساپاسىنا سەلكەۋ تۇسىرەدى» دەگەن بولاتىن.
راسىندا دا, ءتارتىپ پەن ىشكى مادەنيەت اقساعان جەردە ءۇلكەن ولقىلىقتارعا جول بەرىلەتىنى بەلگىلى. مىنە, وسىنداي كەلەڭسىزدىكتەردىڭ الدىن الىپ, بولدىرماۋ ماقساتىندا استانا قالاسىنىڭ قوعامدىق ءتارتىپ ساقشىلارى كەشەندى تۇردە اۋقىمدى ءىس-شارالاردى جۇزەگە اسىرۋدا.
سونىڭ ءبىرى – كەشە سارىارقا اۋدانى ىشكى ىستەر باسقارماسىنىڭ عيماراتىندا «ەلورداداعى قاۋىپسىزدىك پەن جايلىلىق» اياسىندا وتكىزىلگەن كوشپەلى سوت وتىرىسى.
سۋديا ايگەرىم سادۋاقاسوۆانىڭ توراعالىعىمەن وتكەن سوت وتىرىسىندا قازاقستان رەسپۋبليكاسى اكىمشىلىك قۇقىق بۇزۋشىلىق كودەكسىنىڭ 434-بابى بويىنشا ۇساق قۇقىق بۇزۋشىلىق جاساعان 12 ادامنىڭ ءىسى قارالدى. وسى جاۋاپكەرشىلىككە تارتىلىپ تۇرعان جاپ-جاس جىگىتتەردىڭ بارلىعى دا قوعامدىق ورىنداردى لاستاپ, بەيادەپ سوزدەر ايتقان نەمەسە بىرەۋدىڭ ورىنسىز جەكە باسىنا ءتيىسىپ, بالاعاتتاعاندار. راس, قاتەلىكتەرىن مويىنداپ وتىر.
ال نەگە ونداي ءتارتىپ بۇزۋشىلىققا بارعاندىعىن سۇراعاندا, «سولاي بولىپ قالدى» دەپ يىعىن كوتەرگەننەن باسقا ەشتەڭە ايتا المادى.
سونىمەن, استانا قالاسى پروكۋراتۋراسىنان پروكۋرور قانات ءابديحانوۆتىڭ قاتىسۋىمەن وتكەن كوشپەلى سوت وتىرىسىندا ون ءبىر ادامعا ون ايلىق ەسەپتىك كورسەتكىش كولەمىندە ايىپپۇل سالىنىپ, ءبىر ادام ءبىر تاۋلىككە قاماۋعا الىندى.
سوت وتىرىسىنا ىشكى ىستەر ورگاندارىندا ەسەپتە تۇرعان ادامدار شاقىرىلىپ, وتىرىس سوڭىندا سۋديا ءا.سادۋاقاسوۆا ولارمەن «ۇساق بۇزاقىلىققا مۇلدە توزبەۋشىلىك» تاقىرىبىندا اڭگىمە وتكىزدى.
استانا قالاسى ىشكى ىستەر دەپارتامەنتى جەرگىلىكتى پوليتسيا قىزمەتكەرلەرى جىل باسىنان بەرى 434-باپ بويىنشا قۇقىق بۇزعان 1248 ادامعا اكىمشىلىك حاتتاما تولتىرىپ, ولاردىڭ 66-سى جەتى تاۋلىككە دەيىنگى مەرزىمگە قاماۋعا الىنعان. ال 1182-سىنە ايىپپۇل سالىنعان.
تاڭاتار تولەۋعاليەۆ
