«حان شاتىر» ساۋدا-ويىن-ساۋىق ورتالىعىندا استانا قالاسى تىلدەردى دامىتۋ باسقارماسىنىڭ ۇيىمداستىرۋىمەن قازاقستان حالقى تىلدەرىنىڭ ءحVىى قالالىق فەستيۆالى اياسىندا «ۇزدىك جارناما» بايقاۋى ءوتتى.
بايقاۋعا «رپك سويۋز», «پروفي دم», «نارۋجكا KZ», «ءايسات KZ» جاۋاپكەرشىلىگى شەكتەۋلى سەرىكتەستىكتەرى مەن «رتس دەكو», «سايان ستۋديا» جانە «اكسيوما مونتاج» جارناما اگەنتتىكتەرى قاتىستى.
قازاق حاندىعىنىڭ 550 جىلدىعى مەن قازاقستان حالقى اسسامبلەياسىنىڭ 20 جىلدىعى جانە قر كونستيتۋتسياسىنىڭ 20 جىلدىعى تاقىرىبىندا جارناما جوباسىن دايىنداعان بارلىق ۇمىتكەرلەردىڭ دە ايانباي ەڭبەكتەنگەنى انىق بايقالدى. اسىرەسە, بوياۋلارى قانىق, ءماتىن ماعىناسى تۇسىنىكتى قازاقتىڭ كەڭ دالاسى مەن سارى جايلاۋىن, ەل بيلەگەن حاندارى مەن سالت-ءداستۇرىن وبرازدىق نەگىزدە بەينەلەگەن «رپك سويۋز» بەن «پروفي دم» كاسىپورنىنىڭ بانەرلەرى كوپشىلىك كوڭىلىنەن شىعىپ جاتتى.
ال, ەكىنشى اتالىم بويىنشا ماڭدايشا جازۋلارىن ساۋاتتى جازىپ, تارتىمدى ەتىپ ازىرلەگەن «رتس دەكو» جانە «سايان ستۋديا» جارناما اگەنتتىكتەرى بەزەندىرۋى مەن ديزاينەرلىك شەبەرلىكتەرىن ادەمى كورسەتە ءبىلدى.
دەگەنمەن, «جۇيرىكتەن جۇيرىك وزار جارىسقاندا» دەمەكشى, بايقاۋ قورىتىندىسىندا ءبىرىنشى ورىن «اكسيوما مونتاج» جارناما اگەنتتىگىنە بۇيىرسا, ەكىنشى ورىنعا «رپك سويۋز» جشس, ءۇشىنشى ورىنعا «پروفي دم» جشس يە بولدى.
باس جۇلدە العان جارناما اگەنتتىگىنىڭ جۇمىسى تۋرالى «قازاقستان رترك» اق باسقارما توراعاسىنىڭ ورىنباسارى, قازىلار القاسىنىڭ توراعاسى قاينار ولجاي:
– بۇل – قازاقستان حالقى تىلدەرى فەستيۆالى اياسىندا جىل سايىن ءداستۇرلى وتەتىن ءىس-شارا. بيىل قازاق حاندىعىنىڭ 550 جىلدىعى تاقىرىبىنا لايىق بايقاۋدىڭ وتكىزىلۋ ورنى رەتىندە «حان شاتىردىڭ» تاڭدالۋى دا جاراسىپ تۇر. ۇمىتكەرلەردىڭ بارلىعى دا تىڭعىلىقتى دايىندىقپەن كەلگەن. سونىڭ ىشىندە «اكسيوما مونتاج» نەسىمەن ۇنادى دەيتىن بولساق, ولار ءوز ەڭبەكتەرىندە قازاقتىڭ قوڭىر تىرلىگىن قوڭىر بوياۋمەن ادەمى ورنەكتەگەن. ءبىر جارنامانىڭ ىشىنە الاشتىڭ كوگىندە قىران قالىقتاعان ۇلى دالاسى مەن نايزا ۇستاپ, ەل قورعاعان جاۋجۇرەك باتىرلارىن دا, حالقىنىڭ اق كيىزگە وراپ كوتەرگەن حاندارىن دا سىيعىزا بىلگەن.
ەكىنشىدەن, مەكەمە قاسبەتىنىڭ بەزەندىرۋىنە جاقىندا عانا اشىلعان استاناداعى «بارىس» مۇز ايدىنى سارايىن تاڭداپتى. ول دا قازاقى ۇعىمعا ساي كوركەم ديزاينەرلىك شەبەرلىكپەن ايشىقتالعان. سوندىقتان, قازىلار القاسى ءبىراۋىزدان وسى جارناما جوباسىن ۇزدىك دەپ تانىدى, – دەدى.
بايقاۋ سوڭىندا استانا قالاسى تىلدەردى دامىتۋ باسقارماسىنىڭ باسشىسى تىلەۋعالي قىشقاشباەۆ جۇلدەگەرلەرگە ديپلومدار مەن باعالى سىيلىقتار تاپسىرىپ, بارلىق قاتىسۋشىلاردى العىس حاتپەن ماراپاتتادى.
تاڭاتار تولەۋعاليەۆ
