ەلوردا تورىندە «بولاشاق ەنەرگياسى: بارشاعا قۋات» حالىقارالىق فورۋمى ءوز جۇمىسىن باستادى. اتالمىش جيىنعا 60-تان استام حالىقارالىق ۇيىم قاتىستى.
فورۋم كورمەنىڭ «بولاشاق ەنەرگياسى» تاقىرىبىن نازارعا الدى. وندا ەنەرگەتيكا سالاسىنىڭ مايتالمان ماماندارى, جەتەكشى ساراپشىلار, عالىمدار, قوعامدىق جانە ۇكىمەتتىك ەمەس ۇيىم مۇشەلەرى, مەملەكەتتىك ورگان سەكتورى قاتىستى.
باسقوسۋ اياسىندا تۇراقتى ەنەرگەتيكا, ەنەرگوۇنەمدىلىك پەن ەنەرگوتيىمدىلىك, سو2 شىعىندارىن ازايتۋ ماسەلەلەرى الەۋەتىنىڭ دامۋى تالقىلانىپ, بۇل ماقساتقا جەتۋدەگى حالىقارالىق ۇيىمنىڭ ءرولى قانشالىقتى قاجەت ەكەنى ايقىندالدى.
«ءبىز استانادا بولاتىن كورمەگە حالىقارالىق قاۋىمداستىق تاراپىنان ۇلكەن قىزىعۋشىلىقتىڭ بار ەكەندىگىن كورىپ وتىرمىز. بۇگىندە «ەكسپو-2017» كورمەسىنە 103 مەملەكەت پەن 18 حالىقارالىق ۇيىم قاتىساتىندىعىن راستادى» دەدى فورۋمنىڭ سالتاناتتى اشىلۋ ساتىندە «استانا ەكسپو-2017» ۇك» اق باسقارما توراعاسى احمەتجان ەسىموۆ.
بۇگىندە كورمە نىساندارىنىڭ قۇرىلىسى كەستەگە سايكەس جۇرگىزىلىپ كەلەدى. قۇرىلىس جۇمىستارىنىڭ 85 پايىزى اياقتالدى دەسەك تە بولادى.
سونىمەن قاتار, «ەكسپو-2017» كورمەسىنە حالىقارالىق دەڭگەيدە بيلەت ساتىلۋ ناۋقانى باستالعانىن الدىن الا حابارلاعان ەدىك. حالىقارالىق كورمەلەر بيۋروسىمەن كەلىسۋ ناتيجەسىندە بيلەت قۇنىن مەيلىنشە تومەن باعادا ساقتاپ قالۋعا قول جەتكىزىلدى. بۇل ەلىمىزدىڭ تۇكپىر-تۇكپىرىندەگى ازاماتتاردىڭ كورمەگە قاتىسۋى جانە شەتەلدىك تۋريستەردى تارتۋ ءۇشىن جاسالدى.
– «ۇزدىك تاجىريبەلەر ايماعى» پاۆيلونىنا ورنالاستىرۋ ءۇشىن دۇنيەجۇزى بويىنشا قولدانىستاعى ۇزدىك تاجىريبەلەردى ىرىكتەۋ بويىنشا بايقاۋ اياقتالىپ قالدى. ۇزدىك تاجىريبەلەر ايماعى, نەگىزىنەن, كورمە تاقىرىبىنا قاتىستى الەمدەگى جۇزەگە اسىرىلىپ جاتقان ەڭ مىقتى تەحنولوگيالار, جوبالار, قۇرال-جابدىقتار, ونىمدەر جيناقتالعان «كورمەنىڭ جۇرەگى», – دەيدى ا. ەسىموۆ.
حالىقارالىق قاۋىمداستىقتىڭ دامۋى جولىنداعى ەكسپو-2017 ماڭىزدىلىعىن حالىقارالىق كورمەلەر بيۋروسىنىڭ باس حاتشىسى ۆيسەنتە لوسسەرتالەس ەرەكشە اتاپ ءوتتى. «ەكسپو-2017» حالىقارالىق كومپانيالاردى قولداۋدا, اسىرەسە, بۇگىنگى ەكونوميكانىڭ ەڭ ءبىر پەرسپەكتيۆالى سالاسى – بالامالى ەنەرگيا كوزدەرىن يگەرۋدە ايرىقشا مۇمكىندىك ۇسىنىپ وتىر.
