بۇگىنگى قوعامدى قاتتى الاڭداتاتىن وزەكتى ماسەلەنىڭ ءبىرى – ەسىرتكىلەردى, اسىرەسە سينتەتيكالىق پرەپاراتتاردى تاراتۋ. استانا قالالىق پوليتسيا دەپارتامەنتى وسى باعىتتا ءتيىستى جۇمىس جۇرگىزۋدە. دەگەنمەن ەسىرتكى اينالىمىنا جاستار مەن جاسوسپىرىمدەردىڭ كوپ تارتىلۋى ەرەكشە الاڭداۋشىلىق تۋعىزىپ وتىرعانى جاسىرىن ەمەس.
استانا قالالىق ەسىرتكى قىلمىسىنا قارسى ءىس-قيمىل جونىندەگى باسقارماسى بيىل وتكەن 10 اي ىشىندە ەسىرتكىگە قاتىستى 843 قۇقىق بۇزۋشىلىق فاكتىسىن تىركەدى. زاڭسىز اينالىمنان 265 كەلىدەن استام ءتۇرلى ەسىرتكى زاتى تاركىلەنگەن. بۇل كورسەتكىش بىلتىر 252 كگ بولعان. اتاپ ايتقاندا, بيىل ماريحۋانا, گەروين, ناشا, سينتەتيكا, كاننابيس شايىرى, قاراسورا سياقتى ەسىرتكى تۇرلەرى زاڭسىز اينالىمنان انىقتالعان. ەسىرتكىمەن بايلانىستى 124 قىلمىستىق ءىس اياقتالىپ, سوتقا جولدانعان.
ەسەپتى كەزەڭدە ەلوردا اۋماعىندا 5 ەسىرتكى زەرتحاناسى قىزمەتىنىڭ جولى كەسىلسە, سونىڭ ىشىندە تورتەۋى فيتوزەرتحانا بولدى, بۇل رەتتە ءۇي جاعدايىندا ءتۇرلى تاسىلمەن ەسىرتكى زاتتاردان تۇراتىن وسىمدىكتەردى جاساندى تۇردە وسىرۋمەن, ەسىرتكى دايىنداۋمەن اينالىساتىن ەلوردالىق تۇرعىندار ۇستالدى. سونىمەن قاتار قاراعاندى وبلىسى اۋماعىندا سينتەتيكالىق ەسىرتكى زاتتارىن ءوندىرۋ بويىنشا زەرتحانا جۇمىسىن جۇرگىزگەن ۋكراينانىڭ 3 ازاماتى قولعا ءتۇستى. جەدەل ىزدەستىرۋ ءىس-شارالارىن وتكىزۋ كەزىندە 22 كەلىدەن استام سينتەتيكالىق ەسىرتكى مەن ولاردى وندىرۋگە ارنالعان 2 توننادان كوپ پرەكۋرسور تاركىلەندى. بۇگىنگى تاڭدا قاراعاندى وبلىسى پروكۋراتۋراسىمەن بىرگە قر قك 264-بابىنا سايكەس قىلمىستىق ءىس قوزعاۋ ماسەلەسى قارالىپ جاتىر. ودان بولەك, ەسىرتكى كونترابانداسى فاكتىسى انىقتالىپ, قازاقستان اۋماعى ارقىلى اسقازانىنا سالماعى 300 گرامنان كوپ «MDMA-ەكستازي» سينتەتيكالىق ەسىرتكىسىن سالىپ الىپ وتپەك بولعان رەسەي ازاماتى ۇستالعان. ەسىرتكى زاتتارىنان تۇراتىن وسىمدىكتەردى جاساندى جاعدايدا وسىرۋمەن اينالىساتىندار بويىنشا 5 فاكتى تىركەلىپ, قۇرامىندا ەسىرتكى زاتتارى بار 273 وسىمدىك كوشەتى جويىلدى.
– تاعى ءبىر جەدەل-ىزدەستىرۋ ءىس شاراسى كەزىندە مويسەەۆ دەگەن ازاماتتىڭ ءوز پاتەرىن ەسىرتكىگە ءتاۋەلدى ادامدارعا ەسىرتكى زاتتارىن پايدالانۋ ءۇشىن ۇسىنعانى انىقتالدى. بۇل دەرەك سوتقا دەيىنگى تەرگەپ تەكسەرۋدىڭ بىرىڭعاي تىزىلىمىندە قر قك 302-بابى بويىنشا تىركەلدى. سوتتىڭ شەشىمىمەن اتالعان ازامات 5 جىل باس بوستاندىعىنان ايىرىلدى. ال 1 ماۋسىم مەن 31 قازان ارالىعىندا وتكەن «قاراسورا-2023» كەڭ اۋقىمدى جەدەل-پروفيلاكتيكالىق ءىس-شاراسى كەزىندە 515 قۇقىق بۇزۋشىلىق انىقتالدى. ءبىزدىڭ تاراپىمىزدان ەسىرتكى قىلمىسىنا قارسى ءىس-قيمىل بويىنشا قىلمىستاردى دەر كەزىندە انىقتاۋ جانە ناشاقورلىقتىڭ الدىن الۋدا بارلىق ءتيىستى شارالار قابىلدانىپ وتىر, – دەيدى استانا قالالىق پد ەسىرتكى قىلمىسىنا قارسى ءىس-قيمىل جونىندەگى باسقارما باستىعىنىڭ مىندەتىن اتقارۋشى, پوليتسيا پولكوۆنيگى ەركەش قالىقوۆ.
ءبىر وكىنىشتىسى, قازىرگى تاڭدا ەسىرتكىلەرگە ۇيدەن شىقپاي-اق, «ەشكىممەن تىكەلەي كەزدەسپەي-اق», الەۋمەتتىك جەلىدەگى, ماسەلەن, Google ارقىلى ىزدەپ قول جەتكىزۋگە بولادى. وسى رەتتە ەسىرتكى زاتتارىن تاراتۋ بويىنشا اقپاراتتاردان تۇراتىن «ەسىرتكى دۇكەندەرى» كونتەنتىن انىقتاۋ ءۇشىن ارنايى توپ قۇرىلدى, ولار كۇن سايىن عالامتور كەڭىستىگىنە مونيتورينگ جۇرگىزۋمەن اينالىسادى.
– سونىمەن قاتار پوليتسيا دەپارتامەنتىنىڭ باستاماسىمەن ەلوردا تۇرعىندارى مەن قوناقتارى ءۇشىن «Smart Astana» ەلەكتروندى تۇعىرناماسىندا «ەسىرتكىگە جول جوق!» ۇندەۋىن جولدا» دەپ اتالاتىن قوسىمشانىڭ جوباسى ازىرلەنىپ, ىسكە قوسىلدى. بۇل قوسىمشا ەسىرتكىگە قاتىستى ينتەرنەت-دۇكەندەردىڭ بارلىق جارناماسىنان حاباردار بولىپ وتىرۋعا مۇمكىندىك بەرەدى, سونىڭ ارقاسىندا پوليتسيا قىزمەتكەرلەرى قىسقا ۋاقىتتىڭ ىشىندە ەسىرتكى تاراتۋ باعىتىنداعى پاراقشالار مەن سۋرەتتەر گراففيتيىن جويۋ بويىنشا كەشەندى ءىس-شارالار قابىلدايدى. جىل باسىنان بەرى ەسىرتكى جارناماسىن جاريالايتىن 60 سايتتىڭ قىزمەتى بۇعاتتالدى. ەسىرتكى زاتتارىن زاڭسىز جارنامالاۋ جانە ناسيحاتتاۋ بويىنشا قر قك 299-1-بابىنا سايكەس 11 ءىس تىركەلدى, – دەيدى پوليتسيا پولكوۆنيگى.
«2023-2025 جىلدارعا ارنالعان قر ناشاقورلىققا قارسى ءىس-قيمىل ءىس-شارالارىنىڭ كەشەندى جوسپارى» شەڭبەرىندە مەملەكەت باسشىسىنىڭ تاپسىرمالارىن ورىنداۋ بويىنشا استانا قالاسى اكىمدىگى بارلىق مەملەكەتتىك جانە مەملەكەتتىك ەمەس ۇيىمداردى تارتا وتىرىپ, «استانا – ەسىرتكىسىز قالا» ءىس-شارالار جوسپارىن ازىرلەپ, بەكىتتى. سونىڭ شەڭبەرىندە ۋاكىلەتتى ورگانداردىڭ قاتىسۋىمەن زاڭسىز ەسىرتكى اينالىمىنداعى قىلمىستاردى انىقتاۋ جانە ناشاقورلىقتىڭ الدىن الۋعا باعىتتالعان بىرقاتار ءىس-شارا جۇزەگە اسۋدا.
