«27 ماۋسىمدا ميلاندا قازاقستاندىق-يتاليالىق بيزنەس فورۋمى اياسىندا استانا قالاسى اكىمىنىڭ ورىنباسارى ءنۇرالي اليەۆ يتاليا ونەركاسىبى وكىلدەرىمەن جانە ۆەنگريا باسشىلىعىمەن ىنتىماقتاستىقتى ودان ءارى نىعايتۋ جونىندەگى بىرنەشە كەزدەسۋ وتكىزدى» دەپ حابارلادى قالا اكىمىنىڭ ءباسپاسوز قىزمەتى.
كەزدەسۋدە قازاقستان ماشينا جاساۋشىلار وداعى, يتاليالىق «ANIMA» ماشينا جاساۋشى جانە ونەركاسىپ اسسوتسياتسيالارى فەدەراتسياسى مەن استانا قالاسىنىڭ اكىمدىگى اراسىندا ماشينا جاساۋ جانە ونەركاسىپتىك ءوندىرىس سالالارىنداعى ءوزارا ىنتىماقتاستىق تۋرالى ءۇش جاقتى كەلىسىمگە قول قويىلدى. اتالعان كەلىسىم شەڭبەرىندە استانانىڭ يندۋستريالى ايماقتارىن دامىتۋ كوزدەلگەن. بۇل ەلورداعا تىكەلەي شەتەل ينۆەستيتسيالارىن تارتادى.
سونداي-اق, 29 ماۋسىمدا بۋداپەشت قالاسىنىڭ مەرياسىنىڭ شاقىرۋىمەن ءنۇرالي اليەۆ ۆەنگريا استاناسىنا باردى. رەسمي ساپار بارىسىندا ن.اليەۆ بۋداپەشت مەرىنىڭ ورىنباسارى گابور باگديمەن كەزدەستى. تاراپتار ەكى استانانىڭ ۋربانيستيكالىق دامۋ, اسىرەسە, قوعامدىق كولىك سالاسىندا ىنتىماقتاستىقتى كەڭەيتۋ, «Smart city» يننوۆاتسيالىق تەحنولوگيالارىن, سونداي-اق, اقىلى كولىك تۇراقتارىن دامىتۋ جونىندەگى كوپتەگەن ماسەلەلەردى تالقىلادى.
سونىمەن قاتار, ن.اليەۆ ۆەنگريانىڭ ۇلتتىق ەكونوميكا ءمينيسترى ميحاي ۆارگامەن كەزدەستى. كەزدەسۋدە ۆەنگەر كومپانيالارىنىڭ «استانا ەكسپو-
2017» حالىقارالىق مامانداندىرىلعان كورمەسىنە قاتىسۋ ماسەلەسى تالقىلاندى. تاراپتار بۇعان دەيىن قول جەتكىزىلگەن اۋىل شارۋاشىلىعىنداعى جوبالاردى قارجىلاندىرۋدىڭ بىرلەسكەن قورىن قۇرۋ
تۋرالى كەلىسىمدەردى ىسكە اسىرۋ, قالانى سۋمەن جابدىقتاۋ, قوسالقى بولشەكتەر شىعارۋ, جيھاز جاساۋ جانە باسقا دا سالالاردا ىنتىماقتاستىق ورناتۋ مۇمكىندىكتەرىن قاراستىردى.
بۇعان قوسا, ن.اليەۆ ۇلتتىق دامۋ ءمينيسترى ميكلوش شەستاكپەن ەكى جاقتى كەزدەسۋ وتكىزدى. كەلىسسوزدەر بارىسىندا شەستاك مىرزا ۆەنگريانىڭ استاناداعى «EXPO-2017» كورمەسىنە قاتىساتىنىن جەتكىزدى. تاراپتار جوعارى تەحنولوگيالار, ەنەرگەتيكا, كولىك سالالارىندا ىنتىماقتاستىق ورناتۋ كەلەشەگىن, ۆەنگەر اقىلى جولدار جۇيەسىن پايدالانۋ, سونداي-اق, «نۇرلى جول» مەملەكەتتىك باعدارلاماسى اياسىندا قازاقستاندا ينفراقۇرىلىمدىق جوبالاردى جۇزەگە اسىرۋ جايىن ءسوز ەتتى.
