«استانا وپەرا» تەاترىنىڭ ديرەكتورى عالىم احمەدياروۆ پەن سانكت-پەتەربۋرگ مۋزىكا ءۇيىنىڭ جەتەكشىسى, رەسەيدىڭ حالىق ءارتىسى, پروفەسسور سەرگەي رولدۋگين قوس ەل مادەنيەتىنىڭ دامۋىنا سەبى تيەتىن ىنتىماقتاستىق تۋرالى كەلىسىمگە قول قويدى.
ونەردە شەكارا بولمايدى دەگەن ءسوز راس. بۇل قۇجات وسى ۇعىمدى تاعى ءبىر دالەلدەيدى. قوس ونەر ورداسىنىڭ ارىپتەستىك ماقساتى ءتۇرلى بايقاۋلار مەن شەبەرلىك ساباقتارىن, تاعىلىمدامالاردى بىرلەسىپ وتكىزىپ, تاجىريبە الماسۋدى كوزدەيدى.
شارا بارىسىندا تەاتر ديرەكتورى عالىم احمەدياروۆ: «ءبىز ۇلتتىق ونەرىمىزدىڭ ۇزدىك تۋىندىلارىن الىس-جاقىن شەت مەملەكەتتەرگە كەڭىرەك تانىستىرۋدى الدىمىزعا مىندەت ەتىپ وتىرمىز. وسى باعىتتا سانكت-پەتەربۋرگ مۋزىكا ءۇيىمەن قولعا العان جوبالاردى بىرگە جۇزەگە اسىرۋعا مۇمكىندىك تۋىپ وتىر» دەدى.
الداعى تاڭدا رەسەيلىك پروفەسسورلار ەلىمىزدەگى مۋزىكالىق ءبىلىم بەرۋ مەكەمەلەرىنە شەبەرلىك دارىستەرىن وتكىزۋدى جوسپارلاۋدا. وسى تامىزدا وتاندىق ءۇش دارىندى جەتكىنشەك قىرىمداعى «ارتەك» لاگەرىنە شاقىرىلىپ وتىر. بالالار ول جەردە دەمالىپ قانا قويماي, ەۋروپانىڭ جەتەكشى مۋزىكانتتارىمەن جۇمىس ىستەيدى.
